បោះឆ្នោតភូមា ៖ លោកស្រី អ៊ុងសានស៊ូជី កំពុងឈានទៅរកជោគជ័យអាណត្តិទីពីរ
ចុះផ្សាយនៅថ្ងៃ៖
ក្នុងពេលដែលពិភពលោកកំពុងអបអរលទ្ធផលនៃការបោះឆ្នោតប្រធានាធិបតីសហរដ្ឋអាមេរិក នៅថ្ងៃអាទិត្យទី ៨ វិច្ឆិកា ២០២០ ភូមាប្រទេសក្មេងខ្ចីផ្នែកលទ្ធិប្រជាធិបតេយ្យ កំពុងរៀបចំការបោះឆ្នោតសភាជាលើកទីពីរ។ កាលពីឆ្នាំ២០១៥ គណបក្សសម្ព័ន្ធជាតិដើម្បីប្រជាធិបតេយ្យដឹកនាំដោយលោកស្រីអ៊ុងសានស៊ូជី បានឈ្នះឆ្នោតភ្លូកទឹកភ្លូកដី ដោយប្រមូលបានអាសនៈសភាដល់ទៅ៨០%។ ចុះលើកនេះ តើលោកស្រីអ៊ុងសានស៊ូជី នឹងអាចទទួលជោគជ័យត្រចង់ដូចលើកមុនទេ ? គ្មានគូប្រជែងពិតប្រាកដ លោកស្រីប្រមុខដឹកនាំភូមា នៅតែជាអ្នកមានប្រជាប្រិយភាពខ្ពស់ក្នុងការបោះឆ្នោតនេះ។
រងការរិះគន់លើឆាកអន្តរជាតិក្នុងវិបត្តិរ៉ូហ៊ីងយ៉ា លោកស្រី អ៊ុង សានស៊ូជី នៅតែជានិម្មិត្តរូបនៃការនាំប្រទេសទៅរកលទ្ធិប្រជាធិបតេយ្យ សម្រាប់ប្រជាពលរដ្ឋភូមាក្នុងស្រុក។ វិបត្តិរ៉ូហ៊ីងយ៉ា គ្មានក្នុងប្រធានបទនៃការឃោសនានយោបាយសោះ ព្រោះសម្រាប់ភូមា លោកស្រី អ៊ុងសានស៊ូជី ជាតំណាងនៃការផ្សះផ្សាបង្រួបបង្រួមជាតិ ជាឥស្សរជនតែម្នាក់គត់ដែលអាចប្រឈមនឹងក្រុមយោធាដែលនៅកាន់អំណាច២៥%នៅក្នុងសភា និងកាន់ក្រសួងបីសំខាន់ៗរបស់ប្រទេស គឺ ក្រសួងមហាផ្ទៃ ក្រសួងការពារជាតិ និងក្រសួងព្រំដែន។
ដោយគ្មានការភ្ញាក់ផ្អើល គណបក្សសម្ព័ន្ធជាតិដើម្បីប្រជាធិបតេយ្យ នឹងត្រូវឈ្នះឆ្នោតដឹកនាំប្រទេសអាណត្តិទីពីរបានទៀត ប៉ុន្តែជោគជ័យទំនងជាមិនត្រចះត្រចង់ខ្លាំងដូចកាលពី៥ឆ្នាំមុនទេ។ មូលហេតុមកពី សំឡេងគាំទ្រត្រូវបែកខ្ញែកដោយមានការបក្សនយោបាយថ្មីៗជាង១០ចូលរួម និងជាពិសេសគឺបណ្តាលមកពី បរាជ័យនៃការស្វែងរកកិច្ចព្រមព្រៀងជាមួយក្រុមជជនជាតិភាគតិចប្រដាប់អាវុធ និងលទ្ធផលស្តួចស្តើងក្នុងវិស័យសុខភាព និងការប្រយុទ្ធប្រឆាំងនឹងភាពក្រីក្រ។ នៅពេលបានឡើងកាន់អំណាច នៅឆ្នាំ២០១៥ លោកស្រីអ៊ុងសានស៊ូជី បានសន្យាកាត់បន្ថយអំណាចនិងឥទ្ធិពលរបស់ក្រុមយោធា និងស្វែងរកកិច្ចព្រមព្រៀងជាមួយពួកឧទ្ទាមប្រដាប់អាវុធផ្សេងទៀត ដែលពុំឃើញមានលទ្ធផលដុំកំភូនសោះនៅ ៥ឆ្នាំក្រោយ។ ដោយហេតុសន្តិសុខ គណៈកម្មការបោះឆ្នោត បានបញ្ជាឱ្យលុបចោលការបោះឆ្នោត នៅតាមតំបន់រសើបៗខ្លះ ដែលជាហេតុនាំមានលេចគំនិតថា លោកស្រី អ៊ុងសានស៊ូជី ចង់តែពង្រឹងអំណាច តាមរយៈការគាំទ្ររបស់ប្រជាពលរដ្ឋភូមាភាគច្រើន កាន់ព្រះពុទ្ធសាសនា និងមិនខ្វល់ពីបក្សតូចតាចនិងជនជាតិភាគតិច។
អត្រាចូលរួមបោះឆ្នោត ក៏ទំនងជាមិនសូវខ្ពស់ដូច៥ឆ្នាំមុខដែរ ម្យ៉ាងដោយមានការគំរាមកំហែងកូវីដ១៩។ ភូមាជាប្រទេសរងគ្រោះកូវីដ១៩ខ្លាំងជាងគេមួយនៅតំបន់អាស៊ីអាគ្នេយ៍ ដោយរាប់មានករណីឆ្លងកូវីដ១៩ ជាង៦ម៉ឺននាក់ និងស្លាប់ជាង១៤០០នាក់។ អាជ្ញាធរភូមាបានស្នើសុំឱ្យលើកពេលបោះឆ្នោតសភានេះ ដោយមូលហេតុកូវីដ តែពុំបានសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ