អានតួអត្ថបទ
ហុងកុង

​ហុងកុង៖ Joshua Wong និងយុវជន​ប្រជាធិបតេយ្យ​២នាក់ទៀត​ ត្រូវ​តុលាការ​សម្រេច​ឃុំខ្លួន​​បណ្តោះ​អាសន្ន

Joshua Wong (ឆ្វេង) Ivan Lam (កណ្តាល) និង​កញ្ញា Agnes Chow ពេលទៅដល់មុខតុលាការ​ហុងកុង ថ្ងៃទី​២៣ វិច្ឆិកា ២០២០
Joshua Wong (ឆ្វេង) Ivan Lam (កណ្តាល) និង​កញ្ញា Agnes Chow ពេលទៅដល់មុខតុលាការ​ហុងកុង ថ្ងៃទី​២៣ វិច្ឆិកា ២០២០ REUTERS - TYRONE SIU
ដោយ៖ ម៉ម ពិសី
១៥ នាទី

យុវជនប្រជាធិបតេយ្យហុងកុងដ៏ល្បី ឈ្មោះ Joshua Wong និងយុវជន២នាក់ផ្សេងទៀត ត្រូវបាន​តុលាការ​ហុង​សម្រេចឃុំខ្លួន​បណ្តោះអាសន្ន នៅថ្ងៃចន្ទ​ទី ២៣វិច្ឆិកានេះ។ នៅចំពោះមុខចៅ​ក្រម យុវជនទាំង៣នាក់ បានសារភាពទោស​កំហុស ថាពិតជាបានដឹកនាំ​ចលនាបាតុកម្ម ទាមទារ​លទ្ធិប្រជាធិបតេយ្យ នៅឆ្នាំ​២០១៩។

ផ្សាយពាណិជ្ជកម្ម

យុវជនប្រជាធិបតេយ្យ​ហុងកុង៣នាក់ ដែលគេស្គាល់សឹងពេញមួយ​ពិភពលោក គឺលោក​ Joshua Wong  លោក​Ivan Lam  និងកញ្ញា​ Agnes Chow ត្រូវតុលាការហុងកុងសម្រេច​ យកទៅដាក់​ឃុំ​បណ្តោះអាសន្ន។ អ្នកទាំង៣ បានរងការចោទប្រកាន់ ថាបានដឹកនាំ ពន្យុះ និងចូលរួមក្នុងសកម្មភាព​ហិង្សា នៅខាង​មុខស្នងការដ្ឋាន​នគរបាល​​ហុងកុង កាលពី​ថ្ងៃទី​២១ មិថុនា ២០១៩។

គួរបញ្ជាក់ថា ជនជាប់ចោទទាំង៣ សុទ្ធតែបាន​ ទទួលស្គាល់ ទោសកំហុសរបស់ខ្លួន ដោយឥតប្រកែក​នឹងការចោទប្រកាន់ របស់រដ្ឋអាជ្ញាហុងកុងឡើយ។ តុលាការហុងកុង នឹងសម្រេចទោស នៅថ្ងៃទី​២ធ្នូខាងមុខ។​ ដោយ​ផ្អែកលើបទចោទប្រកាន់នេះ យុវជនប្រជាធិបតេយ្យ​ហុងកុងទាំង៣នាក់ ហាចប្រឈមនឹងទោសជាប់ពន្ធនាគារ រហូតដល់​៣ឆ្នាំ។

មុននឹងសមត្ថកិច្ច​ក្រៀកចេញពីអង្គសវនាកាលោក​ Joshua Wong បានស្រែកថា « សូមកុំអស់សង្ឃឹម គ្រប់គ្នា​ត្រូវតែអត់ធ្មត់តទៅទៀត! »។ ពេលទៅដល់មុខតុលាការ មុនបើកសវនាកា លោក​​បានថ្លែង​ប្រាប់​អ្នកយកព័ត៌មានថា « លោកនៅតែបន្តការតស៊ូដើម្បី​សិទ្ធិសេរីភាព​ហុងហុង ដោយ​មិន​ចុះញ៉មនឹងអំណាចផ្តាច់​ការរបស់ប៉េកាំង ជាដាច់ខាត »។ ដូចគ្នាដែរលោក Ivan Lam បានលើកឡើងថា « លោក​មិន​ស្តាយក្រោយ​អ្វីទាំងអស់ នូវសកម្មភាព​ដែល​លោក​បានធ្វើកន្លងមក ព្រោះវាជា​ការតស៊ូដើម្បី​ប្រជាធិបតេយ្យ​ហុងកុង »។

សូមរំលឹកថា បាតុកម្មដ៏ធំមហិមាបានផ្ទុះឡើងនៅហុងកុង នៅរវាង​ខែមីនាឆ្នាំ​២០១៩ បន្ទាប់ពី រដ្ឋបាល​ហុងកុង មាន​គម្រោងស្នើ​ច្បាប់ « ធ្វើបត្យាប័ន » ដែលតាមរយៈច្បាប់នេះ គឺមានន័យថា អាជ្ញាធរចិន​ដីគោក​ អាចលូកដៃ​មកក្នុង​ប្រព័ន្ធយុត្តិធម៌ហុងកុង។​ បាតុកម្ម​របស់ប្រជាជនហុងកុង​ជាច្រើនលាននាក់ ត្រូវបាន​សមត្ថកិច្ច​បង្រ្កាប យ៉ាងហិង្សា។ ក្រោយមកក្រុមបាតុករ បានទាមទារ​ឲ្យ​មាន​ការស៊ើបអង្កេតដោយ​ឯករាជ្យ ស្តីអំ​ពីការប្រើ​កម្លាំងហួសប្រមាណ ​របស់​សមត្ថកិច្ចទៅលើ​ក្រុម​បាតុករ​​។ គឺការទាមទារនេះហើយ ដែលបាន​ធ្វើឲ្យ​យុវជនបាតុករ ឈានទៅ​គប់ដុំថ្ម គប់ពងមាន់ពងទា និង​បាញ់ថ្នាំសរសេរអក្សរ​ លើ​ជញ្ជាំង​អាគារ​ស្នងការដ្ឋាននគរបាលហុងកុង នៅចុងខែមិថុនា​។

សូមបញ្ជាក់បន្ថែមថា ក្រៅពីរងបទចោទប្រកាន់ថាបានធ្វើអំពើ​ហិង្សា បំផ្លាញ​អាគារស្នងការនគរបាល​នេះ យុវជន​ប្រជាធិបតេយ្យ​ហុងកុងទាំង៣នាក់ កំពុង​ប្រឈម​នឹងបទចោទប្រកាន់ជាច្រើ​ន​ផ្សេងទៀត ក្នុងនោះ គឺមាន​ការជួបជុំគ្នាដោយ​បំពាន​ច្បាប់ នៅថ្ងៃទី៤មិថុនា២០២០ ដើម្បីរំលឹក​វិញ្ញាណក្ខន្ធអ្នកស្លាប់នៅទីលានធានអានមិន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ