អានតួអត្ថបទ

សហគមន៍​អន្តរជាតិ​សន្យា​ផ្តល់ជំនួយ ដល់អាហ្វហ្កានីស្ថាន ប៉ុន្តែ មាន​លក្ខខណ្ឌ

រដ្ឋមន្រ្តី​សេដ្ឋកិច្ច​អាហ្វហ្កានីស្ថាន លោក​Abdul Habib Zadran នៅក្រោយ​ឡើង​ថ្លែងនៅក្នុង​សន្និសីទ​ស្វែងរក​ជំនួយ​ពីសហគមន៍​អន្តរជាតិ​ពី​សហគមន៍អន្តរជាតិ នៅថ្ងៃទី ២៤​វិច្ឆិកា ២០២០
រដ្ឋមន្រ្តី​សេដ្ឋកិច្ច​អាហ្វហ្កានីស្ថាន លោក​Abdul Habib Zadran នៅក្រោយ​ឡើង​ថ្លែងនៅក្នុង​សន្និសីទ​ស្វែងរក​ជំនួយ​ពីសហគមន៍​អន្តរជាតិ​ពី​សហគមន៍អន្តរជាតិ នៅថ្ងៃទី ២៤​វិច្ឆិកា ២០២០ REUTERS - DENIS BALIBOUSE
ដោយ៖ ឈាង បុប្ផា
១៨ នាទី

នៅក្នុង​សន្និសីទ អាហ្វហ្កានីស្ថាន ឆ្នាំ ២០២០ ដែល​រៀបចំ​នៅ​ទីក្រុង​ហ្សឺណែវ ប្រទេស​ស្វ៊ីស កាលពីថ្ងៃ​ចន្ទ និង​អង្គារ ម្សិលមិញ ប្រធានាធិបតី អាហ្វហ្កានីស្ថាន​បានអំពាវនាវ​កុំ​ឲ្យ​ពិភពលោក​បែរខ្នង​ដាក់​អាហ្វហ្កានីស្ថាន នៅក្នុង​បរិបទ​ដែល​ពិភពលោក​កំពុង​រងរាតត្បាត​ដោយជំងឺកូវីដ។ សហគមន៍​អន្តរជាតិ បាន​សន្យា​ផ្តល់​ជំនួយ ហិរញ្ញវត្ថុ ដល់​រដ្ឋាភិបាល​អាហ្វហ្កានីស្ថាន ប៉ុន្តែ មាន​ភ្ជាប់​លក្ខខណ្ឌ​ជាមួយ​កញ្ចប់​ជំនួយ​ នោះគឺ អាហ្វហ្កានីស្ថាន​ត្រូវបោះជំហានទៅមុខ ទៅរក​លទ្ធិប្រជាធិបតេយ្យ និង​សុខសន្តិភាព។ 

ផ្សាយពាណិជ្ជកម្ម

សន្និសីទ​អាហ្វហ្កានីស្ថាន ឆ្នាំ ២០២០ ដែល​រៀបចំឡើង​ដោយ​អង្គការ​សហប្រជាជាតិ នៅទីក្រុង​ហ្សឺណែវ មាន​ទិសដៅ ប្រមូលថវិកា​ជួយ​អាហ្វហ្កានីស្ថាន​សម្រាប់ រយៈពេល ៤ឆ្នាំ​ទៅមុខ (២០២១ ដល់​ឆ្នាំ ២០២៤)។ នៅក្នុង​សន្និសីទ​អាហ្វហ្កានីស្ថាន ឆ្នាំ ២០១៦ អាហ្វហ្កានីស្ថាន​ធ្លាប់​ទទួល​បាន​ថវិកា​ពី សហគមន៍​អន្តរជាតិ​ប្រមាណ ១៥,២ពាន់​លាន​ដុល្លារ។

ប៉ុន្តែ សម្រាប់​អ្នកតាមដាន​នយោបាយ​អាហ្វហ្កានីស្ថាន ជំនួយ​សម្រាប់​អាហ្វហ្កានីស្ថាន​លើកនេះ នឹង​អាច​ធ្លាក់ថយចុះ ដោយសារ​តែ​ប្រទេស​ផ្តល់ជំនួយ ក៏កំពុង​មាន​សេដ្ឋកិច្ច ដើរថយក្រោយ ដោយសារ​តែ​វិបត្តិកូវីដ​១៩។ ថ្លែងតាំង​ពី​ទីក្រុង​កាប៊ូល តាមរយៈ សន្និសីទ​វីដេអូ ប្រធានាធិបតី​អាហ្វហ្កានីស្ថាន លោក Ashraf Ghani បាននិយាយ​ថា នៅក្នុង​បរិបទ​ដែល​សេដ្ឋកិច្ច​ពិភពលោក​កំពុង​ជួបវិបត្តិដោយសារ​កូវីដ កញ្ចប់ជំនួយ​នឹង​អាច​ថយចុះ ប៉ុន្តែ យ៉ាងណាក៏ដោយ លោក​អំពាវនាវ​កុំ​ឲ្យ​ប្រទេស​ផ្តល់ជំនួយ​បែរខ្នង​ដាក់ ប្រទេស​របស់លោក។

នៅ​ថ្ងៃ​អង្គារ សហភាព​អឺរ៉ុប​បាន​សន្យា ផ្តល់ជំនួយ ក្នុង​បរិមាណ​ដូចឆ្នាំ ២០១៦ មុន គឺ ១២០០​លាន​អឺរ៉ូ។ អ្នកតំណាង​របស់​កាណាដា ក៏ដូចជា​មន្រ្តី​របស់ ​ហូឡង់ បាន​សន្យា​ផ្តល់ជំនួយ ដល់​អាហ្វហ្កានីស្ថាន ប៉ុន្តែ គេ​បាន​បញ្ជាក់ថា ទឹកប្រាក់​ជំនួយ​របស់​ពួកគេ​មាន​តិច ឬ​ច្រើនគឺ​អាស្រ័យ លើ​ការវិវឌ្ឍ​ជាក់ស្តែង ក្នុង​ប្រទេស​អាហ្វហ្កានីស្ថាន។

 

ធ្លាក់ក្នុង​សង្រ្គាម រ៉ាំរ៉ៃ ចាប់តាំង​ពី​កងទ័ព​អន្តរជាតិ​វាយបណ្តេញ​ពួកតាលីបង់ ចេញពី​អំណាច​នៅឆ្នាំ ២០០១ អាហ្វហ្កានីស្ថាន​ត្រូវ​រស់ពឹង​ផ្អែក​ទាំងស្រុង​លើ​ជំនួយ​របស់​សហគមន៍​អន្តរជាតិ។ អ្នកជំនាញ​វាយតម្លៃថា ជំនួយ​របស់​សហគមន៍​អន្តរជាតិ នឹង​ជួយ​ឲ្យ​រដ្ឋាភិបាល​អាហ្វហ្កានីស្ថាន មាន​ទឹកមាត់  ក្នុង​ការចរចា​ជាមួយ ពួកតាលីបង់ ដែល​កំពុង អួតខ្លួន​ឈ្នះ នៅក្រោយ អាមេរិក​សម្រេច​ដកកងទ័ព​ចេញពី​អាហ្វហ្កានីស្ថាន ឲ្យអស់​នៅពាក់កណ្តាល​ឆ្នាំ ២០២១ ទៅតាម​កិច្ចព្រមព្រៀង អាមេរិក តាលីបង់ កាលពីខែ កុម្ភៈ​កន្លង​ទៅ។

គ្រប់គ្នា​កំពុង​សំឡឹងតាមដាន​មើល​ការចរចា​សន្តិភាព រវាងភាគី​តាលីបង់ និង​រដ្ឋាភិបាល​អាហ្វហ្កានីស្ថាន ដែល​កំពុង​ប្រព្រឹត្តទៅ​នៅប្រទេស​កាតា។ ក្រុមប្រទេស​ផ្តល់ជំនួយ​បារម្ភថា ក្នុងករណី តាលីបង់​ត្រលប់​ចូល​កាន់អំណាច​នៅ​អាហ្វហ្កានីស្ថាន ក្រុមនេះ នឹង​អាច​បង្កើតឡើងវិញ របបឃោឃៅ ដកសិទ្ធិសេរីភាព ពីប្រជាជន​អាហ្វហ្កានីស្ថាន​ដូចមុន។ សម្រាប់​អនុប្រធាន​គណៈកម្មការ​អឺរ៉ុប ពួកតាលីបង់​ត្រូវ​តែ​បង្ហាញ​ជំហរ​ចង់​កសាង​សន្តិភាព តាមរយៈ ការបញ្ឈប់​ជាបន្ទាន់ ការវាយប្រហារ​ដ៏ហិង្សា ទៅលើ​ប្រជាជន​ស៊ីវិល អាហ្វហ្កានីស្ថាន។ គេជឿថា តាលីបង់​បាន​រំលោភ​បទឈប់បាញ់ ជាច្រើនដង ដោយ​បាន​បង្កើន​ការវាយប្រហារ​ទៅលើ​ទីតាំង របស់​រដ្ឋាភិបាល​អាហ្វហ្កានីស្ថាន ដើម្បី បង្កើនទម្ងន់ នៅក្នុង​ការចរចា​ជាមួយ ជាមួយ​រដ្ឋាភិបាល​ក្រុងកាប៊ូល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ