អានតួអត្ថបទ
កម្ពុជា

កម្ពុជា​រកឃើញ​ករណី​វិជ្ជមាន​កូវីដ​-​១៩​ថ្មី​ចំនួន​៧នាក់​ ហើយថា​ ជាករណីឆ្លងក្នុង​សហគមន៍​ជាលើកដំបូង

ប្រជាជនកម្ពុជាគ្រប់ៗរូបត្រូវការពារខ្លួនពីវីរុសកូវីដ១៩ (រូបភាពទូទៅ)
ប្រជាជនកម្ពុជាគ្រប់ៗរូបត្រូវការពារខ្លួនពីវីរុសកូវីដ១៩ (រូបភាពទូទៅ) REUTERS - STRINGER
ដោយ៖ វ៉ា សំណព្វ
១៨ នាទី

ក្រសួងសុខាភិបាល​ នៅព្រឹកថ្ងៃទី​២៩​ ខែវិច្ឆិកានេះ ​បាន​ប្រកាសពី​ការរកឃើញ​ករណី​វិជ្ជមាន​កូវីដ-១៩​ថ្មី ចំនួន​៧ករណី និង​ជាសះស្បើយ​ចំនួនពីរ​ករណី។​ ប៉ុន្តែ​ក្នុងចំណោម​ករណីឆ្លងថ្មី​៧​ករណី មាន​៦​ករណី មិន​ដឹងប្រភព​ច្បាស់ ​និង​១ករណី​ទៀត​ ជាករណី​នាំចូល​។​ ករណីនេះ​ ត្រូវបាន​លោកនាយករដ្ឋមន្ត្រី ​ហ៊ុន សែន ​បានចាត់​ទុក​ថា ​ជាករណី​ឆ្លងចូល​សហគមន៍​ជាលើកដំបូង ​ហើយអំពាវនាវ​អោយប្រជាពលរដ្ឋ​ប្រុងប្រយ័ត្ន​ខ្ពស់​។ 

ផ្សាយពាណិជ្ជកម្ម

យោងតាម​សេចក្តី​ប្រកាសព័ត៌មាន​របស់​ក្រសួងសុខាភិបាល ​ស្ត្រីជនជាតិ​ខ្មែរ​អាយុ ​៥៦​ ឆ្នាំ ​ដែល​មាន​អាស័យដ្ឋាន​នៅសង្កាត់​ជ្រាវ ​ក្រុងសៀមរាប​ ខេត្តសៀមរាប ​និង​នៅបុរីប៉េងហួត ​ផ្លូវ៦០ម៉ែត្រ ​រាជធានី​ភ្នំពេញ​ ត្រូវបាន​ធ្វើតេស្តរក​ឃើញ​វិជ្ជមាន​ជំងឺកូវីដ​១៩​ ដោយ​វិទ្យាស្ថាន​ប៉ាស្ទ័រកម្ពុជា កា​លពីយប់​ថ្ងៃទី ​២៨​ វិច្ឆិកា ​បន្ទាប់ពីគាត់​មានអាការៈមិន​ស្រួលខ្លួន​។​

ចំណែកស្វាមី​របស់គាត់​វ័យ​៥៦ឆ្នាំ ​ដែលមាន​តួនាទី​ជាអគ្គនាយក​ពន្ធនាគារ​នៃ​ក្រសួង​មហាផ្ទៃ ​រួមជាមួយ​សមាជិក​គ្រួសារ​ចំនួន​៤នាក់ទៀត​ក៏វិជ្ជមាន​កូវីដ១៩​នេះដែរ​។​ ក្នុងនោះ​រួមមាន​ស្ត្រីអាយុ​៣៦​ឆ្នាំម្នាក់​, កុមារាអាយុ១២​ឆ្នាំម្នាក់​, បុរសអាយុ​៣៦​ឆ្នាំម្នាក់ ​និង​បុរសអាយុ៣០ឆ្នាំ​ម្នាក់ទៀត​ ​ដែលនៅក្នុងផ្ទះ​ជាមួយគ្នា​។​ បច្ចុប្បន្ន​ពួកគេទាំង​៦​នាក់​ ត្រូវបាន​ដាក់អោយ​សម្រាកព្យាបាល​នៅឯ​មន្ទីរ​ពេទ្យមិត្ត​ភាពខ្មែរ​-​សូវៀត​។

តែទោះ​ជាយ៉ាងនេះ​ក្តី ​អ្វីដែល​កំពុង​ព្រួយបារម្ភ​នៅពេលនេះ​ គឺ​ក្រសួងសុខាភិបាល​នៅមិនទាន់​អាចកំណត់​បាននៅ​ឡើយទេ​ថា​ តើស្ត្រីវ័យ​៥៦​ឆ្នាំរូបនេះ​ ដែលបាន​ធ្វើដំណើរ​ឡើងចុះពី​ខេត្តសៀមរាប​មកភ្នំពេញ​ និង​ទៅបណ្តា​ខេត្តផ្សេងៗ​ទៀតនោះ ​បានឆ្លង​ជំងឺកូវីដ​១៩នេះ​ពីប្រភពណា​នៅឡើយទេ​។​ ហើយ​អ្វីដែលកាន់​តែព្រួយបារម្ភ​ជាងនេះទៅ​ទៀតនោះ ​តើក្នុងអំឡុង​ពេល​មុនរក​ឃើញវិជ្ជមាន​កូវីដ​១៩​នេះ​ តើស្ត្រីរូបនេះ​និង​ស្វាមី​បានធ្វើដំណើរ​ទៅទីណា​ខ្លះដែរ​។​

ប៉ុន្តែនៅចំពោះ​មុខនេះ ​ក្រសួងសុខាភិបាល​បាន​ប្រកាសបិទ​ផ្សារទំនើប​អ៊ីអនទី១​ជាបណ្តោះអាសន្ន ​និង​អំពាវនាវអោ​យអ្នកប៉ះពាល់ផ្ទាល់​ និង​ប្រយោល​ទៅធ្វើតេស្តរក​ជំងឺកូវីដ​១៩​នៅទីនោះ ​ចាប់ពីវេលា​ម៉ោង​៧​និង៣០​នាទីព្រឹក​តទៅ។ ​ផ្សារទំនើបអ៊ីអនទី១ ​ជាទីដែល​ស្ត្រីវ័យ​៥៦​ឆ្នាំរូបនេះ ​បានធ្វើ​ដំណើរទៅ។​ ចំណែក​ពាក់ព័ន្ធ​នឹង​សកម្មភាព​ស្វាមី​របស់ស្ត្រី​វ័យ​៥៦​ឆ្នាំរូបនេះ​វិញ ត្រូវ​បានគេដឹង​ថា​ ទើបមាន​កិច្ចប្រជុំ​មួយជា​មួយ​រដ្ឋមន្ត្រី​ក្រសួង​មហាផ្ទៃ ​លោក ស ខេង​ និង​បាន​ធ្វើដំណើរទៅកាន់​ខេត្តមួយ​ចំនួនទៀត​ ដូចជា​ ខេត្តសៀមរាប​ ខេត្តបន្ទាយមានជ័យ​, ស្ទឹងត្រែង​, មណ្ឌលគិរី ​និង​ទីតាំងផ្សេងៗទៀត​នៅក្នុង​រាជធានី​ភ្នំពេញ​។​

ប្រឈមករណីនេះ ​ក្រសួងសុខាភិបាល​ បានអំពាវនាវ​អោយ​អ្នកពាក់ព័ន្ធ​នៅក្នុង​កិច្ចប្រជុំ​នៅក្រសួង​មហាផ្ទៃ ​និង​ពន្ធនាគារ​ព្រៃសរ​ មកធ្វើតេស្ត​រកជំងឺកូវីដ​១៩​។​ ក្នុងចំណោម​នោះ ក៏​មានលោក​ឧបនាយករដ្ឋមន្ត្រី ​ស ខេង​ រដ្ឋមន្ត្រី​ក្រសួង​មហាផ្ទៃ ​និង​លោក កើត រិទ្ធ ​រដ្ឋមន្ត្រីក្រសួង​យុត្តិធម៌​ គឺ​សុទ្ធសឹង​ជាអ្នក​ដែលស្ថិត​នៅក្នុង​ចំណោម​អ្នកចូលរួម​កិច្ចប្រជុំនោះ។​ នេះបើតាម​សារសំឡេង​របស់​លោកនាយរដ្ឋមន្ត្រី ​ហ៊ុន សែន​ កាលពី​យប់ថ្ងៃទី ​២៨ ​ខែវិច្ឆិកា​។​

ករណីនេះ​ ត្រូវបាន​លោកនាយករដ្ឋមន្ត្រី ​ហ៊ុន សែន​ បានចាត់​ទុកថា ​ជាករណី​ឆ្លងចូល​សហគមន៍​ជាលើកដំបូង​ ហើយអំពាវនាវ​អោយ​ប្រជាពលរដ្ឋ​ប្រុងប្រយ័ត្នខ្ពស់​។​ នៅក្នុងសេចក្តី​ប្រកាសរបស់​ខ្លួន ​ក្រសួង​សុខាភិបាល​ក៏បានណែនាំ​អោយអ្នក​ដែលបាន​ប៉ះពាល់​ជាមួយ​អ្នកជំងឺទាំង​៦​នាក់​ខាងលើ ​ចាំបាច់​ត្រូវធ្វើចត្តាឡីស័ក​ចំនួន១៤​ថ្ងៃនៅតាមផ្ទះ​របស់ខ្លួន​ និង​នៅមណ្ឌល​ចត្តាឡីស័ក​ នៅខេត្តសៀមរាប​ ខេត្តស្ទឹងត្រែង​ ខេត្តមណ្ឌលគីរី​ និង​ខេត្តបន្ទាយមានជ័យ​ ជាទីដែល​អ្នកជំងឺ​បាន​ធ្វើដំណើរ​ទៅ។​

គួរជំរាប​ជូនថា ​គិតត្រឹមព្រឹកថ្ងៃទី ​២៩ ​ខែវិច្ឆិកានេះ ​កម្ពុជា​បានរកឃើញ​ករណីអ្នកមាន​ជំងឺកូវីដ​១៩​ ចំនួន៣១៥​នាក់ ​ក្នុងនោះ​ព្យាបាលជាសះស្បើយ​ចំនួន៣០១នាក់ ​និងអ្នកកំពុង​សម្រាកព្យាបាល​នៅមន្ទីរពេទ្យមាន​ចំនួន​១៤​នាក់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ