អានតួអត្ថបទ
ហុងកុង

ច្បាប់សន្តិសុខ​ ៖ ហុងកុង​​ ​ចាប់​ខ្លួន​សកម្មជន​ប្រជាធិបតេយ្យ​ក្នុង​នោះ​មាន​ពលរដ្ឋអាមេរិក​ម្នាក់

ប៉ូលិសហុងកុងចាប់​ខ្លួនសកម្មជនប្រជាធិបតេយ្យ​ប្រមាណ​ជិត​៥០​នាក់ នៅ​ថ្ងៃពុធ​ទី ៦​មករា២០២១
ប៉ូលិសហុងកុងចាប់​ខ្លួនសកម្មជនប្រជាធិបតេយ្យ​ប្រមាណ​ជិត​៥០​នាក់ នៅ​ថ្ងៃពុធ​ទី ៦​មករា២០២១ Peter PARKS AFP
ដោយ៖ អៀង សុខម៉ិញ
១២ នាទី

ជា​យុទ្ធនាការ​ចាប់​ខ្លួន​ទ្រង់ទ្រាយ​ធំ​មិន​ធ្លាប់​កើត​ទេ​ពី​មុនមក​នៅ​ហុងកុង។ មានសកម្មជនបក្ស​ប្រឆាំងដែល​ជា​អ្នក​​ប្រជាធិបតេយ្យ ប្រមាណ៥០នាក់ ក្នុង​នោះ​មាន​ម្នាក់​ជា​ពលរដ្ឋ​អាមេរិក​ផង ត្រូវ​បានប៉ូលិស​ចាប់​ខ្លួន នៅ​ថ្ងៃពុធ​ទី ៦​មករា​២០២១​នេះ។ ជា​ការ​ចាប់​ខ្លួន​ ​ដោយ​ផ្អែក​​លើ​​ច្បាប់​សន្តិសុខ​ជាតិ​ហុងកុងថ្មី ដែល​តាក់តែង​ឡើង​ដោយ​ប៉េកាំង។ សម្រាប់​រដ្ឋាភិបាល​ចិន ការ​ចាប់​ខ្លួន​មិន​ប៉ះពាល់​ដល់​សេរីភាព​របស់​ប្រជាពលរដ្ឋ​ទេ តែជា​ការ​ចាប់​ចរន្ត​មក​ពីក្រៅ និងក្រុម​ជន​​ដែល​បង្ក​អស្ថិរភាព​ នៅ​ហុងកុង​និង​ចិន។

ផ្សាយពាណិជ្ជកម្ម

អតីតសមាជិកសភា​ពីរ​រូប សកម្មជន​ប្រជាធិបតេយ្យក្មេងៗជំនាន់ក្រោយ​​​ជា​ច្រើន​នាក់ ​អតីត​អ្នកកាសែតវ័យ​៣០​ឆ្នាំម្នាក់​ ទីប្រឹក្សាឃុំសង្កាត់​វ័យ​២៧​ឆ្នាំ ... ជា​សរុប​មាន​សកម្មជន​ប្រជា​ធិបតេយ្យ​​ យ៉ាង​ហោច​៤៨នាក់ ដែល​ត្រូវបានប៉ូលិស​ហុងកុងចាប់​ខ្លួន​​នៅ​​ព្រឹក​​ថ្ងៃពុធ​​ទី ៦​មករានេះ ពី​បទ​ប៉ុនប៉ង​ធ្វើ​វិទ្ធង្សនា។ នេះ​បើ​តាមការប្រភព​​បក្ស​ប្រជាធិបតេយ្យ​ ដោយ​យល់​ថា ​ ជា​ការ​​​​ចាប់​ខ្លួន​ ​ ដែល​​មានពាក់ព័ន្ធ​នឹង​ការ​បោះឆ្នោត​​ផ្ទៃក្នុង​បក្ស។ កាលពី​ថ្ងៃទី១១​កក្កដា ២០២០កន្លង​ទៅ ក្រុម​អ្នក​ប្រជាធិបតេយ្យ​បានរៀប​ចំ​ការ​បោះឆ្នោត​​ជ្រើសរើស​បេក្ខជន​សមាជិក​សភា ៣៥រូប សម្រាប់​ទៅ​ប្រកួត​ប្រជែង​ក្នុង​ការ​បោះឆ្នោត​សភា​ទូទៅ​ហុងកុង។ ប៉ុន្តែ​សម្រាប់​អាជ្ញាធរ​ហុងកុង​ ការ​រៀប​ចំបោះឆ្នោតដោយ​សន្តិវិធី​ដែល​មានមនុស្ស​ជាង​៦សែន​នាក់​ចូល ជា​ទង្វើបង្ក​ហេតុ​ដ៏​ធ្ងន់ធ្ងរ បែប​​វិទ្ធង្សនា បើ​យោង​តាម​ច្បាប់​សន្តិសុខ​ជាតិ​ថ្មី។

ក្រៅអំពីការចាប់​ខ្លួន ប៉ូលិស​ហុងកុងបានចុះឆែកឆេរក្នុង​ផ្ទះ Joshua Wong ​ តំណាង​បក្សប្រឆាំង​ដ៏​ល្បី​ ដែល​កំពុង​ជាប់​ពន្ធនាគារស្រាប់ និងការិយាល័យ​ប្រព័ន្ធ​ឃោសនា​ព័ត៌មាន​បី។ គួរ​ឱ្យ​កត់សម្គាល់ជាជា​ពិសេស​ទៀត ប៉ូលិស​ហុងកុង​បាន​ចុះទៅ​ឆែកឆេរ​ការិយាល័យ​មេធាវី​​​ការពារសិទ្ធមនុស្ស ដោយ​បានចាប់ខ្លួន​មេធាវីជនជាតិ​អាមេរិកលោក John Clancey ម្នាក់​ទៀត​ផង។

ភា្លមមួយ​រំពេច អនាគត​រដ្ឋមន្ត្រីការបរទេស​អាមេរិកថ្មី របស់​រដ្ឋបាល​លោកចូបៃដិន​ បាន​បញ្ចេញប្រតិកម្ម​បរិហារ​ការ​ចាប់ខ្លួន​នេះ ដោយសន្យាថា​ អាមេរិក​នឹងនៅក្បែរ​ប្រជាពលរដ្ឋ​ហុងកុង និងការពារ​​លទ្ធិប្រជាធិបតេយ្យ​ពីការ​បង្ក្រាប​របស់ចិន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ