អានតួអត្ថបទ
ម៉ាឡេស៊ី-កូវីដ១៩

ម៉ាឡេស៊ីប្រកាសដាក់ប្រទេសក្នុងភាពអាសន្នដើម្បីទប់ស្កាត់នឹងការឆ្លងរាលដាលនៃកូវីដ១៩

ព្រះមហាក្សត្រនៃប្រទេសម៉ាឡេស៊ី អាប់ឌូឡា ស្ហា
ព្រះមហាក្សត្រនៃប្រទេសម៉ាឡេស៊ី អាប់ឌូឡា ស្ហា AP - Nazri Rapai
១៧ នាទី

នៅ​ក្នុង​ប្រទេស​ម៉ាឡេស៊ី ព្រះមហាក្សត្រ​បាន​ប្រកាស​ដាក់​ប្រទេស​ក្នុង​ភាព​អាសន្ន​ចាប់​ពី​ថ្ងៃទី១២ មករា​រហូត​ដល់​ថ្ងៃទី១ សីហា។ គោលដៅ គឺ​ដើម្បី​ទប់ស្កាត់​នឹង​ការ​ឆ្លង​រាលដាល​នៃ​ជំងឺ​កូវីដ១៩ ដែល​កំពុង​មាន​សន្ទុះ​កើន​ឡើង​នា​រយៈពេល​ចុង​ក្រោយ។ តែ​វិធានការ​ដាក់​ប្រទេស​ក្នុង​ភាព​អាសន្ន​នេះ​បាន​ទទួល​រង​ការ​រិះគន់​ពី​ក្រុម​ប្រឆាំង និង​ក្រុម​អង្គការ​សង្គមស៊ីវិល​ដោយ​ពួក​គេ​ចាត់​ទុក​ជា​ល្បិចកល​នយោបាយ​របស់​នាយករដ្ឋមន្រ្តី​លោក​មូយីដឌីន យ៉ាស៊ីន​ដើម្បី​បន្ត​តោង​អំណាច។ គួរ​បញ្ជាក់​ថា ម៉ាឡេស៊ី​ដែល​មាន​ពលរដ្ឋ​ចំនួន ៣១លាននាក់​កំពុង​មាន​វិជ្ជមាន​កូវីដ១៩ ចំនួន ១៣៨ ០០០ករណី និង​មាន​មនុស្ស​ស្លាប់​ចំនួន ៥៥៥នាក់​គិត​ត្រឹម​ថ្ងៃ​អង្គារ ទី១២ មករា​នេះ។

ផ្សាយពាណិជ្ជកម្ម

គឺ​តាម​សំណើ​របស់​នាយករដ្ឋមន្រ្តី​លោក​មូយីដឌីន យ៉ាស៊ីន​ដែល​ព្រះមហាក្សត្រ​អាប់ឌូឡា ស្ហា​បាន​ប្រកាស​ដាក់​ប្រទេស​ក្នុង​ភាព​អាសន្ន​ពី​ថ្ងៃទី១២ មករា​ដល់​ថ្ងៃទី១ សីហា។ នៅ​ក្នុង​សេចក្តីប្រកាសព័ត៌មាន​របស់​ព្រះបរមរាជ្យវាំង ព្រះចៅ​អាប់ឌូឡា ស្ហា​ដែល​បាន​ជួប​សន្ទនា​ជាមួយ​លោក​យ៉ាស៊ីន​នា​ថ្ងៃ​ចន្ទ ទី១១ មករា​បាន​យល់​ឃើញ​ថា ស្ថានភាព​ជំងឺ​កូវីដ១៩ នៅ​ក្នុង​ប្រទេស​បាន​ឈាន​ដល់​ដំណាក់ការ​ព្រួយបារម្ភ​ខ្លាំង​ដែល​ចាំ​បាច់​ត្រូវ​ដាក់​ប្រទេស​ក្នុង​ភាព​អាសន្ន។ តែ​រយៈពេល​នៃ​ការ​ដាក់​ប្រទេស​ក្នុង​ភាព​អាសន្ន​នេះ​នឹង​អាច​លើក​ចេញ​វិញ​នៅ​មុន​ថ្ងៃទី១ សីហា ប្រសិន​បើ​ស្ថានភាព​នៃ​ជំងឺ​កូវីដ១៩ មាន​ភាព​ប្រសើរ​ឡើង។

ដោយឡែក​នៅ​ក្នុង​សុន្ទរកថា​ថ្លែង​តាម​កញ្ចក់​ទូរទស្សន៍​នា​ថ្ងៃ​ចន្ទ ទី១១ មករា លោក​មូយីដឌីន យ៉ាស៊ីន​បាន​ប្រកាស​ចេញ​នូវ​វិធានការ​បិទខ្ទប់​រយៈ​ពេល ២សប្តាហ៍​សម្រាប់​តំបន់​ជា​ច្រើន​ដែល​វីរុស​កូវីដ១៩ កំពុង​ធ្វើ​ចរាចរណ៍​ខ្លាំង ក្នុង​នោះ​ក៏​មាន​ទីក្រុង​គូឡាឡាំពួ​មួយ​ដែរ។ ពលរដ្ឋ​ក្នុង​ទីក្រុង​គូឡាឡាំពួ​អាច​ចេញ​ពី​ផ្ទះ​បាន​ដើម្បី​ទិញ​ម្ហូបអាហារ ហើយ​រោងចក្រ​មួយ​ចំនួន​ដែល​មិន​ចាំ​បាច់​ត្រូវ​បិទទ្វារ។ ចំណែក​ការ​ធ្វើ​ដំណើរ​ឆ្លង​ពី​រដ្ឋ​មួយ​ទៅ​រដ្ឋ​មួយ​ត្រូវ​បាន​ហាម​ឃាត់។ « ប្រព័ន្ធ​សុខាភិបាល​របស់​យើង​កំពុង​ឈាន​ទៅ​កកស្ទះ ហើយ​ស្ថានការណ៍​សព្វថ្ងៃ​គួរ​ឲ្យ​ព្រួយបារម្ភ​ខ្លាំង​ណាស់ » នេះ​ជា​ការ​ថ្លែង​របស់​លោក​យ៉ាស៊ីន។

គួរ​បញ្ជាក់​ថា ការ​ដាក់​ប្រទេស​ក្នុង​ភាព​អាសន្ន​បាន​អនុញ្ញាត​ឲ្យ​លោក​យ៉ាស៊ីន​ព្យួរ​ដំណើរការ​របស់​សភា និង​គ្រប់​សកម្មភាព​នយោបាយ។ តែ​វិធានការ​មួយ​នេះ​កំពុង​ទទួល​រង​ការ​រិះគន់​យ៉ាង​ខ្លាំង​ពី​ក្រុមប្រឆាំង និង​ក្រុម​អង្គការ​សង្គម​ស៊ីវិល​មួយ​ចំនួន។ លោក Josef Benedict មក​ពី​អង្គការ​សង្គមស៊ីវិល Civicus យល់​ថា លោក​យ៉ាស៊ីន និង​រដ្ឋាភិបាល​របស់​លោក​ដែល​កំពុង​ចុះ​ខ្សោយ​ខ្លាំង​បាន​ប្រើ​ភាព​អាសន្ន​ជា​ល្បិចកល​នយោបាយ​ដើម្បី​បន្ត​តោង​អំណាច បិទខ្ទប់​ការ​រៀបចំ​បោះឆ្នោត និង​បញ្ជៀស​ការ​ត្រួតពិនិត្យ​ពី​រដ្ឋសភា។ ចំណែក​លោកស្រី​ម៉ារីណា មហាធៀរ​ដែល​ជា​សកម្មជន និង​ជា​កូនស្រី​របស់​អតីត​នាយករដ្ឋមន្រ្តី​លោក​មហាធៀរ មហាម៉ាត់​បញ្ជាក់​ថា ការ​ប្រកាស​ដាក់​ប្រទេស​ក្នុង​ភាព​អាសន្ន​ជា​ថ្ងៃ​អាប់អួរ​សម្រាប់​លទ្ធិប្រជាធិបតេយ្យ និង​ជា​សក្ខីកម្ម​ដែល​បញ្ជាក់​ពី​ភាព​អសមត្ថភាព​របស់​លោក​យ៉ាស៊ីន​ក្នុង​ការ​គ្រប់គ្រង​ជំងឺ​កូវីដ១៩ និង​ដោះស្រាយ​បញ្ហា​កង្វល់​របស់​ប្រជាជន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ