កូរ៉េខាងត្បូង-ប៉ាក់ គុនហេ

តុលាការ​កំពូល​កូរ៉េ​ខាង​ត្បូង​សម្រេច​តម្កល់​ទោស​ពន្ធនាគារ​ ២០​ឆ្នាំ​លើ​លោក​ស្រីអតីត​ប្រធានាធិបតី​ប៉ាក់​ គុនហេ

លោកស្រីប៉ាក់ គុនហេ អតីតប្រធានាធិបតីកូរ៉េខាងត្បូង ត្រូវបានផ្តន្ទាទោសនៅឆ្នាំ ២០១៨ ពីបទពុករលួយ និងរំលោភអំណាច។
លោកស្រីប៉ាក់ គុនហេ អតីតប្រធានាធិបតីកូរ៉េខាងត្បូង ត្រូវបានផ្តន្ទាទោសនៅឆ្នាំ ២០១៨ ពីបទពុករលួយ និងរំលោភអំណាច។ AP - Ahn Young-joon
ដោយ៖ អ៊ុង គឹមអ៊ាន់
១៤ នាទី

នៅ​កូរ៉េខាង​ត្បូង​ តុលាការ​កំពូល​បាន​សម្រេច​នៅ​ថ្ងៃ​ព្រហស្បតិ៍ ទី១៤ មករា​នេះ​ តម្កល់​ទោស​ជាប់​ពន្ធនាគារ​រយៈពេល​ ២០ ឆ្នាំ​ ចំពោះ​លោកស្រី​អតីត​ប្រធានាធិបតី​ប៉ាក់ គុនហេ​ ដែល​រង​ការ​ចោទ​ប្រកាន់​ពី​បទ​ប្រព្រឹត្ត​អំពើ​ពុក​រលួយ​។ សេចក្តី​សម្រេច​នេះ​បាន​នាំ​មក​នូវ​ការ​បញ្ចប់​នីតិវិធី​ផ្នែក​ច្បាប់​ និង​បើក​ផ្លូវ​ឲ្យ​មាន​ការ​លើក​លែង​ទោស​សម្រាប់​លោក​ស្រី​អតីត​ប្រធានាធិបតី​វ័យ ៦៨​ រូប​នេះ​។

ផ្សាយពាណិជ្ជកម្ម

លោកស្រី​ប៉ាក់​ គុនហេ​ បាន​ក្លាយជា​មេដឹកនាំ​ជាប់ឆ្នោត​តាមបែប​លទ្ធិ​ប្រជាធិបតេយ្យ​ដំបូង​គេ​បង្អស់​របស់​ប្រទេស​កូរ៉េខាងត្បូងដែល​ត្រូវ​បាន​គេ​ទម្លាក់​ចេញពី​តំណែង​នៅ​ក្នុងឆ្នាំ ២០១៧​។ កាលណោះ​ តុលាការ​ធម្មនុញ្ញ​បាន​អនុម័ត​លើ​ការ​បោះឆ្នោត​របស់​សភា​ដែល​បាន​ចោទ​ប្រកាន់​លោកស្រី​ពាក់ព័ន្ធ​រឿង​អាស្រូវ​ពុករលួយ និងរំលោភអំណាច។

លោកស្រី​ប៉ាក់​ ដែលជា​កូន​ស្រី​អតីត​មេដឹកនាំ​ផ្តាច់​ការ​យោធា​ ប៉ាក់ ជុងហ៊ី​ បាន​ជាប់​ឆ្នោត​ក្លាយជា​ប្រធានាធិបតី​ស្ត្រី​ដំបូង​គេ​របស់​កូរ៉េខាងត្បូង​ក្នុង​ឆ្នាំ ២០១៣​។ លោកស្រី​ត្រូវ​បាន​គេ​ទម្លាក់​ពី​តំណែងក្រោយពី​រកឃើញថាមាន​ពិរុទ្ធ​ពី​បទ ឃុបឃិត​ជាមួយ​មនុស្ស​ជំនិត​ម្នាក់​ដើម្បី​ទទួល​បាន​ប្រាក់​រាប់​ពាន់​លាន​វ៉ុន​ពី​បណ្តា​ក្រុមហ៊ុន​គ្រាក់ៗ ដើម្បី​ជួយ​គ្រួសារ​និង​ដើម្ប​យក​លុយទាំងនោះ​ទៅ​ជួយ​ទ្រទ្រង់​ដល់​មូលនិធិ​មិន​រក​ប្រាក់​ចំណេញ​របស់​លោក​ស្រី​ផ្ទាល់​។

រឿងក្ដីក្តាំ​របស់​លោក​ស្រីប៉ាក់​ ត្រូវ​បាន​បើក​សវនាការ​ជំនុំ​ជម្រះ​ទោស​នៅក្នុង​តុលាការ​ផ្សេងៗគ្នា​ជាច្រើន​ រាប់បញ្ចូលទាំង​ការកាត់ក្តី​ឡើងវិញ​កាលពី​ខែ​កក្កដា​ ឆ្នាំ​២០១៩​។ ប៉ុន្តែ​តុលាការ​កំពូល​កូរ៉េ​ខាងត្បូង បាន​សម្រេច​នៅ​ថ្ងៃ​ព្រហស្បតិ៍​ ទី១៤ មករា​នេះ​ ឲ្យ​តម្កល់​ទោស​ជាប់​ពន្ធនាគារ​រយៈពេល​ ២០ឆ្នាំ​ និង​ការ​ពិន័យ​ជា​ប្រាក់​ចំនួន​ ១៨ ពាន់​លាន​វ៉ុន ឬ​ស្មើនឹង​ប្រមាណ​ជា​ ១៦ លាន​ ៤ សែន​ដុល្លារ​អាមេរិក​។

មាន​អាយុ ៦៨​ឆ្នាំ​ លោកស្រី​ប៉ាក់​ គុនហេ​ ដែល​បាន​ជាប់​ពន្ធនាគារ​ចាប់​តាំងពី​ថ្ងៃទី ៣១ ខែ​មីនា​ ឆ្នាំ ២០១៧​ តែងតែ​បាន​អះអាង​ថា​ខ្លួន​ជាមនុស្ស​ស្អាតស្អំ​ មិន​បាន​ប្រព្រឹត្ត​ខុស​នោះទេ។ ចំណែក​នៅក្នុង​សវនាការ​កាត់ក្តី​នា​ថ្ងៃនេះ​ គេ​មិន​ឃើញ​មាន​វត្តមាន​របស់​លោក​ស្រីនៅ​ក្នុង​តុលាការ​ឡើយ​។

យ៉ាងណាក៏ដោយ​ សេចក្តី​សម្រេច​របស់​តុលាការ​កំពូល​កូរ៉េខាងត្បូង​ក្នុងការ​តម្កល់​ទោស​ពន្ធនាគារ​ ២០ឆ្នាំ​ លើ​លោកស្រី​អតីត​ប្រធានាធិបតី​គឺជា​ការ​បិទ​បញ្ចប់​នៃ​ដំណើរ​ការ​ផ្លូវច្បាប់​ប្រឆាំង​នឹង​លោកស្រី​ និងជា​ការ​បើក​ផ្លូវឲ្យ​មាន​ការលើកលែង​ទោស​ចំពោះ​លោក​ស្រី​ដូចដែល​ក្រុម​អ្នក​គាំទ្រ​របស់​លោកស្រី​ធ្លាប់​បាន​អំពាវនាវ​នៅគ្រា​កន្លងមក​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI