ឥណ្ឌា-វ៉ាក់សាំង​បង្ការកូវីដ​១៩

ឥណ្ឌា​ផ្តើម​យុទ្ធនាការ​ចាក់វ៉ាក់សាំងបង្ការកូវីដ ទោះបីមានការបារម្ភ​ពី​​សុវត្ថិភាព​របស់​វ៉ាក់សាំង

នៅទីក្រុង​ប៊ុមបៃ ស្ត្រីឥណ្ឌា​ម្នាក់​ដើរកាត់​រូបគំនូរ​ដែល​និយាយ​ពី​កម្មវិធី​ចាក់វ៉ាក់សាំង​បង្ការ​កូវីដ ដែល​នាយករដ្ឋមន្រ្តី​ឥណ្ឌា លោក​ណារិនដ្រា ម៉ូឌី​ប្រកាស​ចាប់ផ្តើម​នៅថ្ងៃ​សៅរ៍ ទី ១៦​មករា ២០២១
នៅទីក្រុង​ប៊ុមបៃ ស្ត្រីឥណ្ឌា​ម្នាក់​ដើរកាត់​រូបគំនូរ​ដែល​និយាយ​ពី​កម្មវិធី​ចាក់វ៉ាក់សាំង​បង្ការ​កូវីដ ដែល​នាយករដ្ឋមន្រ្តី​ឥណ្ឌា លោក​ណារិនដ្រា ម៉ូឌី​ប្រកាស​ចាប់ផ្តើម​នៅថ្ងៃ​សៅរ៍ ទី ១៦​មករា ២០២១ REUTERS - FRANCIS MASCARENHAS
ដោយ៖ ឈាង បុប្ផា
២១ នាទី

ឥណ្ឌា​នឹង​ចាប់ផ្តើម​យុទ្ធនាការ​ចាក់វ៉ាក់សាំង​បង្ការ​ជំងឺកូវីដ ក្នុង​ទ្រង់ទ្រាយធំ នៅ​ទូទាំង​ប្រទេស នៅ​ថ្ងៃសៅរ៍ទី ១៦​មករា ឆ្នាំ ២០២១។ នៅពេល​ប្រជាជន​ឥណ្ឌា ប្រមាណ ៣០០​លាននាក់ នឹង​ត្រូវ​ទទួល​វ៉ាក់សាំង បង្ការ​កូវីដ ១៩ ពីពេលនេះ រហូត​ដល់​ខែ កក្កដា គ្រូពេទ្យ និងអ្នក​ជំនាញ ឥណ្ឌា បាន​សំដែងក្តី​បារម្ភ ព្រោះថា ក្នុង​ចំណោម​វ៉ាក់សាំង ២ប្រភេទ ដែល​រដ្ឋាភិបាល​ឥណ្ឌា​អនុញ្ញាត​ឲ្យ​ប្រើ​សម្រាប់​យុទ្ធនាការ​ចាក់វ៉ាក់សាំងបន្ទាន់ មាន​វ៉ាក់សាំង មួយប្រភេទ កំពុង​ស្ថិតនៅក្នុង​ដំណាក់កាល​ធ្វើតេស្ត​សាកល្បង ទី៣​នៅឡើយ។ 

ផ្សាយពាណិជ្ជកម្ម

ឥណ្ឌា​ដែល​មាន​ចំនួន​អ្នកឆ្លង​ជំងឺកូវីដ លំដាប់​លេខ ២​ក្នុង​ពិភពលោក ប្រមាណ ១០លាននាក់ បន្ទាប់ពី​អាមេរិក និង​មាន​អ្នកស្លាប់​ច្រើនជាង ១សែន ៥ម៉ឺននាក់ ចាប់ផ្តើម​យុទ្ធនាការ​ចាក់វ៉ាក់សាំង នៅទូទាំង​ប្រទេស នៅ​ថ្ងៃ​សៅរ៍នេះ។ តាម​ការិយាល័យ​របស់​នាយករដ្ឋមន្រ្តី​ឥណ្ឌា លោក​ណារិនដ្រា​ម៉ូឌី នឹង​បើកសម្ពោធ កម្មវិធី​ចាក់វ៉ាក់សាំង​បង្ការ​ជំងឺកូវីដ តាមរយៈ សន្និសីទ​វីដេអូ ដែលមាន​ផ្សាយផ្ទាល់ ពី​ទីតាំង​ចាក់វ៉ាក់សាំង ជាង ៣ពាន់ នៅទូទាំង​ប្រទេស​ឥណ្ឌា។

សម្រាប់ យុទ្ធនាការ​ចាក់វ៉ាក់សាំង បង្ការ​កូវីដ នៅទូទាំង​ប្រទេស រដ្ឋាភិបាល​ឥណ្ឌា​បាន​ផ្តល់​ភ្លើងខៀវ នៅ​ដើម​ខែ មករា ដោយ​អនុញ្ញាត​ឲ្យ​ប្រើ​វ៉ាក់សាំង​ផលិត​ក្នុង​ស្រុក​ចំនួន ពីរ គឺ Covishield​វ៉ាក់សាំង​របស់​ក្រុមហ៊ុន អង់គ្លេស AstraZeneca ដែល​ផលិត​ឡើង​វិទ្យាស្ថាន​Serum របស់​ឥណ្ឌា ដែល​ជា​ក្រុមហ៊ុន​ផលិត​វ៉ាក់សាំង​ធំជាង​គេ​ក្នុង​លោក ហើយនិង​វ៉ាក់សាំង Covaxin ដែល​ផលិត អភិវឌ្ឍ ដោយក្រុមហ៊ុន​ក្នុង​ស្រុក​ឥណ្ឌាBharat Biotech ។

យុទ្ធនាការ​ចាក់វ៉ាក់សាំង របស់រដ្ឋាភិបាល​បាន​ធ្វើ​ឲ្យ​ក្រុមអ្នកជំនាញ​ពេទ្យ និងអ្នកវិទ្យាសាស្រ្ត​ឥណ្ឌា រន្ធត់ និង​មិនទុកចិត្ត ព្រោះថា ក្នុង​ចំណោម​វ៉ាក់សាំង ពីរ​ដែល​គេ​ត្រូវ​ប្រើ​សម្រាប់​ចាក់​មនុស្ស ពីថ្ងៃ​សៅរ៍នេះ មាន​មួយ ជា​វ៉ាក់សាំង ដែលនៅ​មិនទាន់​បញ្ចប់ ការធ្វើតេស្ត​សាកល្បង ដំណាក់កាល​ទី​៣​នៅឡើយ។ រដ្ឋាភិបាល ឥណ្ឌា​បាន​ផ្តល់​ភ្លើងខៀវ សម្រាប់​ការប្រើប្រាស់​បន្ទាន់ វ៉ាក់សាំង Covaxin នោះបើទោះបី​ជា​ក្រុមហ៊ុន​ផលិត​វ៉ាក់សាំង ក្នុង​ស្រុក នៅមិនទាន់​បង្ហាញ​ទិន្នន័យ ជាក់ស្តែង​ស្តីពី​លទ្ធផល​ប្រសិទ្ធិភាព​របស់​វ៉ាក់សាំង​ក៏ដោយ។ គណបក្ស​ប្រឆាំង Congress Party បាន​ចោទប្រកាន់​រដ្ឋាភិបាល​ថា បានយក​អាយុជីវិត​របស់​ប្រជាជន​ឥណ្ឌា​ទៅ ប្រថុយនឹង​គ្រោះថ្នាក់។ គេ​នៅបាន​រិះគន់​រដ្ឋាភិបាល​របស់​លោក​ណារិនដ្រា ម៉ូឌី ដែរថា បាន​ប្រញាប់​ផ្តល់​ភ្លើងខៀវ​ដល់​វ៉ាក់សាំង ដែលនៅមិនទាន់​បញ្ចប់​ដំណាក់កាល​ធ្វើតេស្ត​សាកល្បង ក៏ដោយសារ​តែ​នយោបាយ​ជាតិនិយម ប្រើវ៉ាក់សាំង​ក្នុង​ស្រុក និង​ដើម្បី សន្សំសំចៃ​លុយ​មិនទិញ​វ៉ាក់សាំង បរទេស។ រដ្ឋាភិបាល​របស់​លោក​ណារិនដ្រា ម៉ូឌី​ធ្លាប់​ឆ្លើយតប​នឹង​ការរិះគន់​ដោយ​ថា វ៉ាក់សាំង​ផលិត​ក្នុង​ស្រុក មាន​សុវត្ថិភាព ១១០ % និង​មាន​ប្រសិទ្ធិភាព​ជាង​វ៉ាក់សាំង​ដទៃ ដែល​បង្កើតឡើង ដោយ​ប្រើ​បច្ចេកវិទ្យា​ថ្មី។

សម្រាប់ អ្នកជំនាញ និង​ក្រុមគ្រូពេទ្យ​ឥណ្ឌា នៅក្រោយ ការបិទបញ្ចប់ ការធ្វើតេស្ត​សាកល្បង គេ​ជឿថា វ៉ាក់សាំង របស់​ក្រុមហ៊ុន​Bharat Biotech នឹងអាច​ជា​វ៉ាក់សាំង​ដែល​ល្អប្រពៃជាងគេ ព្រោះ​វាមាន​តម្លៃថោក ងាយទុកដាក់ ក្នុងការប្រើប្រាស់ ជាពិសេស សម្រាប់បណ្តា​ប្រទេស​កំពុង​អភិវឌ្ឍ។ ប៉ុន្តែ គេ​មិនជឿថា វា​ជារឿង​ត្រឹមត្រូវ នោះទេ ដែល​រដ្ឋាភិបាល​ត្រូវ​ប្រញាប់​ប្រើវ៉ាក់សាំង ដែលគ្មាន​ទិន្នន័យ​ជាក់ស្តែង ស្តីពី​ប្រសិទ្ធិភាព និង​សុវត្ថិភាព​របស់​វ៉ាក់សាំង​នោះ។ ដំណើរការ​ធ្វើតេស្ត​សាកល្បង របស់​ក្រុមហ៊ុន​ផលិត​វ៉ាក់សាំង Covaxin ទៀតសោត ក៏​កំពុង​ធ្វើ​ឲ្យ​គេ​សង្ស័យ មិនទុកចិត្ត ព្រោះថា តាមក្រុម​ប្រឆាំង ក្រុមហ៊ុន​រកមិនបាន​មនុស្ស​គ្រប់ចំនួន សម្រាប់​ចូលរួម​ក្នុងការធ្វើតេស្ត​សាកល្បង​វ៉ាក់សាំង។ នៅ​ទីក្រុង​បូផល Bhopal អ្នកដែល​ទទួល​វ៉ាក់សាំង​អះអាង​ថា ពួកគេ​បាន​ទទួល​ប្រាក់​ម្នាក់ៗ ៨ដុល្លារ ប៉ុន្តែ គ្មាន​បាន​ទទួល​ការតាមដាន សាកសួរ ព័ត៌មាន ពីខាង​ក្រុមហ៊ុន ​នៅក្រោយ​ទទួល​វ៉ាក់សាំង នោះទេ។

សូមបញ្ជាក់ថា គិត​ចាប់តាំង​មានការផ្ទុះឡើងជំងឺកូវីដ នៅទីក្រុង​វូហាន ប្រទេសចិន នៅ​ខែ​ធ្នូ ២០១៩ ជំងឺកូវីដ ១៩ បាន​សម្លាប់​មនុស្ស ២លាននាក់ និង​ចម្លង​ទៅ មនុស្ស​៩៣​លាននាក់ នៅក្នុង​ពិភពលោក គិត​មកត្រឹម​ថ្ងៃ​សុក្រ​ទី ១៥​មករា ២០២១៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI