ថៃ

​ប្រមុខបក្សប្រឆាំងថៃជាប់បណ្តឹងពីបទប្រមាថព្រះចេស្តាព្រះមហាក្សត្រ

លោក​មហាសេដ្ឋី Thanathorn Juangroongruangkit រង​បណ្តឹង​ពី​បទ​ប្រមាថ​រាជា​និយម
លោក​មហាសេដ្ឋី Thanathorn Juangroongruangkit រង​បណ្តឹង​ពី​បទ​ប្រមាថ​រាជា​និយម Lillian SUWANRUMPHA AFP/File
ដោយ៖ អៀង សុខម៉ិញ
១៧ នាទី

រដ្ឋាភិបាល​ថៃ​បាន​និង​កំពុង​រឹត​បណ្តឹង​អំណាច​ និង​គាប​ កាន់តែ​ខ្លាំង​ឡើង ក្រុមប្រឆាំង​ដែល​តែង​តែ​ផ្លុំ​ពន្យុះ​ឱ្យ​មាន​សកម្ម​ប្រឆាំង​តវ៉ា​នៅ​ក្នុង​ប្រទេស។ អតីត​ប្រមុខ​​បក្សប្រឆាំង​​លោកមហាសេដ្ឋី ថាណាថន មិន​អាច​ធ្វើ​នយោបាយ​បាន​ហើយ ត្រូវ​ជាប់​ចោទ​​ពី​បទ​ប្រមាថ​រាជានិយម​ទៀត ! នៅ​ថ្ងៃពុធ​ទី ២០​មករា ២០២០​នេះ រដ្ឋាភិបាល​ថៃ​បាន​ដាក់​ពាក្យ​បណ្តឹង​ ប្រឆាំង​នឹងលោក​ថាណាថន ពី​បទ​ប្រមាថ​ព្រះ​ចេស្តា​ព្រះ​មហាក្សត្រ។

ផ្សាយពាណិជ្ជកម្ម

​ស្ថាបនិក​គណបក្ស​ Future Forward Party ដែលតុលាការ​ថៃ​បាន​រំលាយ​​​ទៅ​វិញ​បាត់​ទៅ​ហើយ លោក ថាណាថន ត្រូវ​ជាប់បណ្តឹង​ថ្មី​មួយ​ទៀត ពី​បទ​ប្រមាថ​រាជានិយម ដោយ​កាលពី​ថ្ងៃ​ចន្ទទី ១៨មករា លោក​បាន​បង្ហោះ​សារ ក្នុង​ប្រព័ន្ធ​សង្គម ​ក្នុង​អត្ថន័យមិន​ទុក​ចិត្ត​លើ​យុទ្ធនាការ​​ចាក់​ថ្នាំ​បង្ការ​ប្រឆាំង​នឹង​ជំងឺ​កូវីដ​១៩​នៅក្នុង​ប្រទេស​ថៃ។ សម្រាប់​​លោក ថាណាថន​ យុទ្ធសាស្ត្រ​ចាក់​ថ្នាំ​វ៉ាក់សាំង​រំពឹង​ជ្រុល​ទៅ​លើក្រុមហ៊ុន​ Siam BioScience ដែល​គ្រប់គ្រង​​ដោយ​ Crown property bureau ការិយាល័យហិរញ្ញវត្ថុ​របស់​រាជវាំង។

“ជា​ពាក្យ​​អះអាង​មិនត្រឹម​​ត្រូវ​ទេ ការ​ពិត​ត្រូវ​បាន​គេ​បំប្លែង” នេះបើ​តាម​ការ​ប្រសាសន៍​​របស់​តំណាង​ក្រសួង​សេដ្ឋកិច្ច​ថៃ។ ហេតុ​ដូច្នេះ​ហើយ​បាន​ជា​ប្រមុខ​រដ្ឋាភិបាលថៃ​លោក ប្រាយុទ្ធ​ចាន់អូចា បាន​ប្រកាស​​ភ្លាម​នៅ​ថ្ងៃអង្គារ ថា​នឹង​នាំ​គ្រប់ជន​ដែល​ផ្សព្វផ្សាយ​ព័ត៌មានមិន​ពិត​ស្តី​ពី​ផែនការ​ចាក់​ថ្នាំ​បង្ការ​ ​ទៅប្រឈម​នៅ​ចំពោះ​មុខ​ច្បាប់ ស្រប​តាម​មាត្រា​១១២​នៃ​ច្បាប់​ព្រហ្មទណ្ឌ​​ថៃ។

មាត្រា​១១២ ដែល​ចែង​ការ​ពារ​រាជានិយម​ អាច​នឹងដាក់​ទោស​ជន​គ្រប់​រូប​​ឱ្យ​ជាប់​ពន្ធនាគារ​ដល់​ទៅ​១៥​ឆ្នាំ ប្រសិនបើ​ហ៊ាន​ជេរ ប្រមាថ រិះគន់ ឬនិយាយ​ពាក្យ​មិន​ពិត​​ ប៉ះពាល់​ដល់ព្រះ​មហាក្សត្រ​ វិជ្ជរ៉ាឡុងកន និង​ក្រុមគ្រួសារ​រាជវង្ស។ អាក់​ខានមិន​​បាន​ប្រើ​អស់​រយៈ​ពេល​ជាង​ពីរ​ឆ្នាំ​មក​ ​​​ច្បាប់​ប្រឆាំងនឹងការប្រមាថ​រាជានិយម​ជាផុស​ឡើង​ជា​​ថ្មី។ បន្ទាប់​ពីមាន​ចរន្ត​​ប៉ះបោរបាន​ផ្ទុះឡើង​ខ្លាំង​ ក្នុង​ចំណោមសិស្ស​និស្សិត នៅក្រុង​បាងកក ទាមទារធ្វើ​កំណែទម្រង់របប​រាជនិយម​ថៃ​ កាលពី​ពាក់កណ្តាលឆ្នាំ​មុនមក អាជ្ញាធរ​ថៃបានត្រលប់​មក​ប្រើច្បាប់​នេះ​វិញ​​យ៉ាង​ពេញ​ទំហឹងសម្រាប់​ បង្ក្រាប​រាល់​គ្រប់​សំឡេង​ប្រឆាំង។

គិត​ចាប់​ពីមានរលក​បាតុកម្មនៅ​ខែ​កក្កដា ២០២០​មក មាន​មនុស្ស​៤៣​នាក់​បាន​រងការចោទ​ប្រកាន់​ពី​បទ​ប្រមាថ​រាជា​និយម។

អ្នក​នាំពាក្យ​រដ្ឋាភិបាល​ថៃ​បដិសេធ​មិន​ធ្វើ​អត្ថាធិប្បាយ​ទេ ជុំ​វិញ​ការ​ដាក់​ពាក្យ​បណ្តឹង​ប្រឆាំង​នឹង​លោក​ថាណាថន​ នៅ​ថ្ងៃ​នេះទេ។

នេះ​ជា​បណ្តឹង​ប្រឆាំង​នឹង​លោក​ថាណាថន មួយ​បន្ថែមពីលើ​​បណ្តឹង​ជា​ច្រើន​ដែល​តុលាការ​បាន​សម្រេច​ហាមឃាត់​មិន​ឱ្យ​​លោក​ថាណាថន ព្រមទាំង​អ្នក​ទទួល​ខុស​ត្រូវ​បក្ស​មួយ​ចំនួន​ទៀត  លែង​មាន​សិទ្ធិ​ធ្វើ​នយោបាយ​ និង​រំលាយ​គណបក្ស ដែល​បានក្លាយ​ជា​ចរន្ត​នយោបាយ​លំដាប់​ទីបី​ក្នុង​សម័យ​បោះឆ្នោត​សភា​ឆ្នាំ ២០១៩។ ការរំលាយ​បក្ស និង​សមាជិកភាព​សភា​របស់​គណបក្សបានជំរុញ​ឱ្យ​ពលរដ្ឋ​ថៃខឹងសម្បារ​កាន់​តែ​ខ្លាំង និង​ជា​ចំណែក​មួយ​នាំ​មាន​ផ្ទុះចលនា​បាតុកម្ម តាំង​ពី​ខែ​កក្កដា​រហូត​ដល់​ខែធ្នូ​២០២០នេះឯង។ ​ចលនា​បាតុកម្ម​បាន​ផ្អាក​នាពេល​នេះ​​ដោយ​ហេតុ​មាន​រលករាតត្បាត​កូវីដ១៩​ជា​លើកពី​រតែប៉ុណ្ណោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI