សហរដ្ឋអាមេរិក-ចិន

សហរដ្ឋអាមេរិក និងប្រទេសចិនបង្ហាញសាច់ដុំដាក់គ្នានៅសមុទ្រចិនខាងត្បូង

មាននាវាផ្ទុកយន្តហោះចម្បាំងអាមេរិកាំងចំនួន ៤គ្រឿងបានទៅដល់សមុទ្រចិនខាងត្បូងក្នុងថ្ងៃអាទិត្យ ទី២៤ មករា ឆ្នាំ ២០២១។
មាននាវាផ្ទុកយន្តហោះចម្បាំងអាមេរិកាំងចំនួន ៤គ្រឿងបានទៅដល់សមុទ្រចិនខាងត្បូងក្នុងថ្ងៃអាទិត្យ ទី២៤ មករា ឆ្នាំ ២០២១។ - AFP/File
១៤ នាទី

នៅ​ថ្ងៃ​អាទិត្យ ទី២៤ មករា មាន​នាវា​ផ្ទុក​យន្តហោះ​ចម្បាំង​អាមេរិក​ជា​ច្រើន​គ្រឿង​បាន​បរចូល​ក្នុង​សមុទ្រចិន​ខាងត្បូង។ កាយវិការ​នេះ​ត្រូវ​បាន​រដ្ឋបាល​អាមេរិក​របស់​លោក​ប្រធានាធិបតី​ចូ បៃដិន​លើក​យក​ហេតុផល​ទៅ​ពន្យល់​ថា ដើម្បី​ការពារ​សេរីភាព​ក្នុង​ការ​ធ្វើ​ចរាចរណ៍​នៅ​ក្នុង​ដែនទឹក​អន្តរជាតិ។ តែ​សារ​ពិត​ដែល​ក្រុង​វ៉ាស៊ីនតោន​ចង់​បញ្ជូន​ទៅ​ឲ្យ​ក្រុង​ប៉េកាំង​នោះ​គឺ​ថា សហរដ្ឋអាមេរិក​ត្រៀម​ខ្លួន​គ្រប់​ពេល​ដើម្បី​ការពារ​កោះតៃវ៉ាន់​ប្រឆាំង​នឹង​គ្រប់​ទង្វើ​ឈ្លានពាន​ទាំង​អស់។

ផ្សាយពាណិជ្ជកម្ម

មាន​នាវា​ផ្ទុក​យន្តហោះ​ចម្បាំង​អាមេរិកាំង​ចំនួន ៤គ្រឿង​បាន​ទៅ​ដល់​សមុទ្រ​ចិន​ខាងត្បូង​ក្នុង​ថ្ងៃ​អាទិត្យ ទី២៤ មករា ពោល​ក្នុង​ថ្ងៃ​ដែល​ចិន​បាន​បញ្ជូន​យន្តហោះ​ទម្លាក់គ្រាប់បែក និង​យន្តហោះចម្បាំង​សរុប​ប្រមាណ​ជា ៣០គ្រឿង​ហោះ​ឆ្លង​ចូល​ព្រំដែនអាកាស​ដែល​ខ័ណ្ឌចែក​មិន​ផ្លូវការ​រវាង​កោះ​តៃវ៉ាន់ និង​ចិនដីគោក។ មែនទែន​ទៅ កាយវិការ​របៀប​នេះ​របស់​ក្រុង​ប៉េកាំង​មិន​មែន​ជា​រឿង​ថ្មី និង​បាន​កើត​មាន​ញយ​ដង​នា​រយៈពេល​ប៉ុន្មាន​ខែ​ចុង​ក្រោយ។ តែ​អ្វី​ដែល​ថ្មី និង​ខុស​ប្លែក​ពី​សព្វ​មួយ​ដង​នៅ​ត្រង់​ថា​លើក​នេះ ចិន​បាន​បញ្ជូន​សុទ្ធ​តែ​ប្រភេទ​យន្តហោះ​ប្រយុទ្ធ ពោល​មិនមែន​ប្រភេទ​យន្តហោះ​ការពារ​ដូច​មុន​ឡើយ។

ទង្វើ​នេះ​បាន​បង្ខំ​ឲ្យ​តៃវ៉ាន់​ដាក់​ពង្រាយ​ប្រព័ន្ធ​ប្រឆាំង​មីស៊ីល​ដើម្បី​បង្ការ​ទប់។ រហូត​មក​ដល់​ពេល​នេះ ក្រុង​ប៉េកាំង​នៅ​មិន​ទាន់​បាន​ធ្វើ​អត្ថាធិប្បាយ​អ្វី​ចំពោះ​វត្តមាន​នាវា​ផ្ទុក​យន្តហោះ​អាមេរិកាំង​ក្នុង​សមុទ្រ​ចិន​ខាងត្បូង​ពេល​នេះ​ទេ។ តែ​បើ​តាម​មើល​ទៅ ចិន​ប្រហែល​ជា​មិន​សប្បាយ​ចិត្ត​ចំពោះ​កាយវិការ​ដំបូង​របស់​រដ្ឋបាល​ប្រធានាធិបតី​អាមេរិក​លោក​ចូ បៃដិន​ចំពោះ​កោះ​តៃវ៉ាន់​ប៉ុន្មាន​ទេ ពិសេស​ការ​ដែល​អាមេរិក​បាន​អញ្ជើញ​អ្នក​តំណាង​តៃវ៉ាន់​ឲ្យ​ចូលរួម​នៅ​ក្នុង​ពិធី​ស្បថ​ចូលកាន់​តំណែង​របស់ លោក​ចូ បៃដិន​កាល​ពី​ថ្ងៃ​ពុធ ទី២០ មករា​កន្លង​ទៅ។

អ្នក​នាំពាក្យ​ក្រសួង​ការបរទេស​អាមេរិក​បាន​ថ្លែង​នៅ​ក្នុង​ទីក្រុង​វ៉ាស៊ីនតោន​ថា ចិន​ត្រូវ​តែ​បញ្ឈប់​ការ​ដាក់​សម្ពាធ​ផ្លូវយោធា ការទូត និង​សេដ្ឋកិច្ច​លើ​កោះ​តៃវ៉ាន់ ហើយ​ត្រូវ​សន្យា​បង្កើត​ឲ្យ​មាន​កិច្ចសន្ទនា​ប្រកប​ដោយ​ការ​ស្ថាបនា​ជាមួយ​រដ្ឋអំណាច​តៃវ៉ាន់។ ពិតណាស់ សហរដ្ឋអាមេរិក​បាន​និយាយ​ពី​វត្តមាន​នាវា​ផ្ទុក​យន្តហោះចម្បាំង​របស់​ខ្លួន​នៅ​ក្នុង​សមុទ្រចិនខាងត្បូង​ដើម្បី​​ការពារ​សេរីភាព​ក្នុង​ការ​ធ្វើ​ចរាចរណ៍​នៅ​ក្នុង​ដែនទឹក​អន្តរជាតិ។ តែ​នេះ​ក៏​ជា​សារ​មួយ​ដែល​ក្រុង​វ៉ាស៊ីនតោន​ចង់​ព្រមាន​ប្រាប់​ក្រុង​ប៉េកាំង​ថា ដែនទឹក​នៅ​សមុទ្រ​ចិន និយាយ​ជា​រួម និង​នៅ​សមុទ្រ​ចិនខាងត្បូង និយាយ​ដោយឡែក​មិនមែន​ជា​កម្មសិទ្ធ​ផ្តាច់មុខ​របស់​ប្រទេស​ណា​មួយ​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI