ភូមា

ភូមា ៖ រលករដ្ឋប្រហារ​រសាត់ឆ្ងាយ យោធាសន្យាគោរព និង​ថែរក្សា​​រដ្ឋធម្មនុញ្ញ

យោធា​ភូមា​សន្យា​គោរព​រដ្ឋធម្មនុញ្ញ
យោធា​ភូមា​សន្យា​គោរព​រដ្ឋធម្មនុញ្ញ Sai Aung Main AFP/File

យោធា​ភូមា​ដែល​ជា​ស្ថាប័ន​ដ៏​មាន​អំណាច​នៅ​ភូមា បាន​ធានា​អះអាង​នៅ​ថ្ងៃ​សៅរ៍​ទី ៣០​មករា​២០២១នេះ​ថា នឹង​គោរព​ ច្បាប់​រដ្ឋ​ធម្មនុញ្ញ​ជាតិ​។ ​ពោល​គឺ​ផ្ទុយ​ស្រលះ​ពី​ពាក្យ​ព្រមានរបស់​មេទ័ព​ លោក​មីន អ៊ុងឡាំង Min Aung Hlaing កាលពី ថ្ងៃ​ពុធដែលព្រលយ​អំពី​លទ្ធភាព​​​នៃ​ការ​ធ្វើ​រដ្ឋប្រហារ​ទម្លាក់​រដ្ឋាភិបាល​​កំពុង​កាន់​អំណាច។

ផ្សាយពាណិជ្ជកម្ម

“Tatmadaw (ឈ្មោះ​ផ្លូវការ​របស់​កង​កម្លាំងយោធា​ភូមា) គោរពធម្មនុញ្ញបច្ចុប្បន្ន ហើយ​នឹង​បន្តគោរព​ការ​ពារច្បាប់​ដែល​មាន​ចែង​ក្នុង​​រដ្ឋធម្មនុញ្ញ​នេះ​” នេះបើ​តាម​សេចក្តី​ថ្លែងការណ៍​របស់​ស្ថាប័ន​យោធា​ជាតិ​ ដោយ​ពន្យល់​បំភ្លឺ​ថាអង្គការ​និង​សារព័ត៌មានផ្សេងៗ​ បាន​យល់ច្រលំ​ និងបាន​បកស្រាយ​ខុសខ្លឹមសារ​នៃ​សុន្ទរកថា​របស់លោក​​មេទ័ព មីន អ៊ុងឡាំង ​កាលពី​ពុធទី ២៧​មករា​មុន។

លោក​មេទ័ព មីន អ៊ុងឡាំង អគ្គមេបញ្ជាការ​យោធា ​ដ៏​មានអំណាច​បំផុត​នៅ​ភូមា បានប្រកាស​ថា កងទ័ពទំនង​ជា​ចាំបាច់​ត្រូវ​​លុប​ចោលរដ្ឋធម្មនុញ្ញ​ ឆ្នាំ​២០០៨ នៅក្នុង​កាលៈទេសៈ​ណាមួយ។ ពាក្យ​មួយ​ឃ្លា​នេះ​ដែល​ត្រូវ​បាន​​បកប្រែ​ជាភាសា​អង់គ្លេស និង​ផ្សព្វផ្សាយក្នុង​ទំព័រ​កាសែត​យោធា បាន​បំផុស​បង្អើល​កាន់​ខ្លាំង​ឡើងខ្លាច​មាន​​រដ្ឋប្រហារ​នៅ​ភូមា។ ក្តីព្រួយ​បារម្ភ​បាន​ផ្អើល​​ដល់​សហគមន៍​អន្តរជាតិ។ គណបក្សនយោបាយ​តូចៗនៅ​​ភូមា បាន​ទទូច​លោកឱ្យ​បក្ស​កាន់​អំណាចទៅ​ចរចា​ជាមួយ​យោធា ...

មុន​សេចក្តី​ប្រកាសរបស់​មេទ័ព​ ភូមា​ធ្លាក់​ក្នុង​ភាព​តាន​តឹង​​ស្រាប់​ទៅហើយ ដោយ​កាល​ពីថ្ងៃ​អង្គារ​ទី ២៦​មករា​ អ្នក​នាំពាក្យយោធា​ធ្លាប់​បាន​ព្រលយ​​អំពី​លទ្ធភាព​​ធ្វើ​រដ្ឋប្រហារម្តង​ហើយ។ ហើយ​​តាំង​ពី​ជា​ច្រើន​ថ្ងៃកន្លង​​មក​នេះ ​ក្រុមយោធា​បានធ្វើ​កា​ររិះគន់​ភាព​មិនប្រក្រតី​នៃ​ការ​បោះឆ្នោត​សភា​កាលពី​ខែ​វិច្ឆិកា ដែល​គណបក្ស​សម្ព័ន្ធ​ប្រជាធិបតេយ្យ​របស់​លោកស្រី​ អ៊ុង សានស៊ូជី​ ជា​អ្នក​ឈ្នះ​។ បើ​តាមយោធា​ភូមា មានការ​លួច​បន្លំ​ឆ្នោត​ដល់​ទៅ​ប្រមាណ​១០​លាន​ករណី​។ យោធា​​បាន​ស្នើ​ឱ្យ​គណៈកម្មការ​គ្រប់គ្រង​ការ​បោះឆ្នោត​ជាតិ ផ្សាយ​បញ្ជី​ឈ្មោះ​បោះឆ្នោត​ដើម្បី​ផ្ទៀង​ផ្ទាត់ តែ​គណៈកម្មការ​បដិសេធ។

​យោធា​ភូមា​ធ្លាប់​ធ្វើ​រដ្ឋ​ប្រហារ​លុប​ចោលរដ្ឋធម្មនុញ្ញ​​ដណ្តើមអំណាច និង​បង្កើតរបបសឹកគ្រប់គ្រង​ប្រទេសពីរដង​ហើយ ​នៅឆ្នាំ ១៩៦២ និង​ឆ្នាំ ១៩៨៨៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI