ភូមា

ភូមា​ ៖ ប៉ូលិស​ប្រើ​គ្រាប់​ពិត​បង្ក្រាប​បាតុករ ស្លាប់​ពីរនាក់ និងរបួស​ជា​ច្រើន​នាក់

ប៉ូលិស​បង្ក្រាប​បាតុករភូមា ថ្ងៃទី ២០ កុម្ភៈ ២០២១ ស្លាប់​ពីរ​នាក់​​ និង​របួស​ជា​ច្រើន​នាក់
ប៉ូលិស​បង្ក្រាប​បាតុករភូមា ថ្ងៃទី ២០ កុម្ភៈ ២០២១ ស្លាប់​ពីរ​នាក់​​ និង​របួស​ជា​ច្រើន​នាក់ AP

ជាការ​ប៉ះទង្គិច​ដ៏​​ហិង្សា​បំផុត​ គិត​ចាប់​តាំង​ពីថ្ងៃទី ១ កុម្ភៈ​២០២១​មក នៅ​ប្រទេស​ភូមា។ នៅ​ថ្ងៃ​សៅរ៍​ទី ២០​កុម្ភៈ​នេះ ប្រឈម​នឹង​ចលនា​បាតុកម្ម​ដែល​មិន​ចុះ​ថមថយ កងកម្លាំង​ប៉ូលិស​​ភូមា​បាន​បាញ់​បំបែក​ហ្វូង​បាតុករ​ប្រឆាំង​រដ្ឋាភិបាល ដោយ​ធ្វើ​បាតុករ​យ៉ាង​ហោច​ណាស់​ ២​នាក់​ ស្លាប់ និង​របួស​ជាង​៣០​នាក់​ផ្សេង​ទៀត។

ផ្សាយពាណិជ្ជកម្ម

នៅក្នុង​ចំណោមជន​រងគ្រោះ​បាត់​បង់​ជីវិត​ មាន​ម្នាក់​ជា​​ក្មេង​មិន​ទាន់​ពេញ​វ័យ​ទេ ដោយ​ត្រូវ​គ្រាប់​កាំភ្លើង​នៅ​នឹងក្បាល។ នេះ​បើ​តាម​ការរៀប​រាប់​របស់​ក្រុមគ្រូពេទ្យ​សង្គ្រោះ​មក​កាន់​ភ្នាក់ងារ​សារព័ត៌មាន​បារាំង​AFP ដោយ​បញ្ជាក់​ថា​ចំណែក​អ្នករង​របួស​ពាក់​កណ្តាល​គឺបណ្តាល​មក​ពី​ត្រូវ​រង​គ្រាប់​កាំភ្លើង​​របស់​ប៉ូលិស។

ប៉ូលិស​ដែល​ត្រូវ​បាន​ដាក់​ពង្រាយ​ក្នុង​ចំនួន​រាប់​សិប​រយ​នាក់ នៅ​ជុំ​វិញ​ការដា្ឋនសាងសង់​​នាវា​ ទី​ដែល​កម្មករបានប្រមូល​ផ្តុំ​​គ្នា​ធ្វើ​បាតុកម្ម​ប្រឆាំង​រដ្ឋប្រហារ​យោធា​ទម្លាក់​រដ្ឋាភិបាលលោកស្រី​អ៊ុងសានស៊ូជី។ ដើម្បី​រារាំង​កុំឱ្យប៉ូលិស​ចាប់​ខ្លួនបាន ​​​ក្រុមបាតុករ​នាំ​គ្នា​គោះ​ឆ្នាំង​ ខ្លះ​ចោល​វត្ថុ​រឹង​ទៅ​លើ​ប៉ូលិស​។

ភាព​ហិង្សា​ខ្លាំង​នេះ​បាន​ផ្ទុះ​ឡើង​តែ​មួយ​ថ្ងៃ​ក្រោយ​មរណភាព​របស់ស្ត្រី​អ្នក​លក់​គ្រឿង​ទេស​អាយុ​២០​ឆ្នាំម្នាក់​ដែលមិន​អាចសង្គ្រោះ​បាន​ក្រោយ​ពី​ត្រូវ​គ្រាប់​កាំភ្លើង​របស់​ប៉ូលិស​កាលពី​ថ្ងៃទី​៩កុម្ភៈ​។

តាំង​ពី​បាន​ឡើង​កាន់​អំណាច​តាម​រយៈ​រដ្ឋប្រហារ​ទម្លាក់​រដ្ឋាភិបាលស៊ីវិលមក របប​សឹក​ភូមា បាន​រឹតបន្តឹង​និង​ដាក់​គំនាប​ខ្លាំង​ឡើងៗ​លើ​ក្រុម​អ្នកប្រជា​ធិបតេយ្យ។ ប៉ុន្តែ​ក្រុម​អ្នក​ប្រឆាំង​រាប់​ពាន់​នាក់​នៅ​ជំនះ​ចុះ​ធ្វើ​បាតុកម្មដដែល។ ជាក់​ស្តែ​ង​នៅ​ថ្ងៃ​សៅរ៍​ទី ២០ កុម្ភៈ​នេះ តំណាង​ក្រុម​ជនជាតិ​ភាគតិច​ ក្នុង​សម្លៀកបំពាក់​ប្រពៃណី បាននាំ​គ្នា​ចុះថ្នល់​ស្រែក​ទាមទារ​ឱ្យ​រដ្ឋាភិបាល​សឹក ដោះលែង​អ្នក​ទោស រំលាយ​រដ្ឋធម្មនុញ្ញ​ដែលការ​ពារ​ក្រុមយោធា និង​ការវិលត្រលប់​នៃរដ្ឋាភិបាលស៊ីវិល។ រលក​បាតុកម្ម​បានកើត​មានស្ទើរ​ពេញផ្ទៃ​ប្រទេស ដែល​មាន​សន្ធឹកដូច​បដិវត្ត​លឿង​ទុំ​កាលពី​ឆ្នាំ​២០០៧ និង​ដែល​ត្រូវ​បង្ក្រាប​ក្នុង​ថ្លុកឈាម ដោយ​ពួកយោធា។

ក្នុង​រយៈពេល​តែបី​សប្តាហ៍​ក្រោយ​រដ្ឋប្រហារ​ មានអ្នក​ទទួល​ខុស​ត្រូវ​នយោបាយ ​មន្ត្រី​បាតុករ ព្រះសង្ឃ ឬ​សកម្មជន​ប្រជាធិបតេយ្យ​ យ៉ាង​ហោច​ណាស់​ជាង​៥៥០នាក់​ត្រូវ​ចាប់​ខ្លួន។ ហើយ​មានតែ​ប្រមាណ​៤០នាក់​ត្រូវ​បានដោះលែង​មកវិញ។ នេះ​បើ​តាម​អង្គការ​ក្រៅ​រដ្ឋាភិបាល​ផ្នែក​ជួយ​អ្នកទោស​នយោបាយ។

​ទង្វើ​របស់​រដ្ឋាភិបាល​សឹកបានទទួលការ​ថ្កោល​ទោស និង​ដាក់​ទណ្ឌកម្ម​ពី​សំណាក់សហគមន៍​អន្តរជាតិ​ រាប់​ទាំង​សហរដ្ឋ​អាមេរិក និង​អង់គ្លេស​ដែល​ជា​អតីត​ប្រទេស​ធ្លាប់​ធ្វើ​អាណានិគម​​លើ​ភូមា លើកលែង​តែ​ចិន​និង​រុស្ស៊ីដែល​រក្សាគោលការណ៍​មិន​ជ្រៀតជ្រែក​កិច្ចការ​ផ្ទៃក្នុង​ភូមា។ សហភាព​អឺរ៉ុប​ ត្រូវ​ជួប​ប្រជុំ​គ្នា​ជា​ថ្មី​នៅ​ថ្ងៃ​ចន្ទ​សប្តាហ៍​មុខ​ ដើម្បីចាត់​វិធានការ​ប្រឆាំងនឹងក្រុមយោធា​ភូមា។ មានតម្លៃ​ជានិម្មត្តរូប​មែន ប៉ុន្តែ​ទណ្ឌកម្មអន្តរជាតិ ​មិន​អាចប​ន្ទន់​ឥរិយាបថ​របស់​​ក្រុមយោធា​ភូមាបានទេ ដរាប​ណា​វិធានការ​នោះ​គ្មានវិសាលភាព​ប៉ះពាល់ដល់ក្រុមហ៊ុន​ផ្តល់​​ប្រយោជន៍​ធំរបស់​ពួកគេ។ នេះបើ​តាមរំលឹក​របស់​អង្គការក្រៅរដ្ឋាភិបាល Burma Campaign UK ​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI