ហុងកុង

សកម្មជន​ប្រជាធិបតេយ្យ​​ហុងកុង ​៤៧នាក់ ​ជាប់ចោទ​​ពីបទ​ធ្វើ​សកម្មភាព​វិទ្ធង្សនា

លោកសាស្ត្រាចារ្យ​ Benny Tai ពេលចូលខ្លួនទៅ​ប៉ុស្តិនគរបាលហុងកុង ថ្ងៃទី២៨ កុម្ភៈ ២០២១
លោកសាស្ត្រាចារ្យ​ Benny Tai ពេលចូលខ្លួនទៅ​ប៉ុស្តិនគរបាលហុងកុង ថ្ងៃទី២៨ កុម្ភៈ ២០២១ REUTERS - TYRONE SIU

មនុស្ស​ចំនួន​៤៧នាក់ ត្រូវជាប់ចោទពី​បទធ្វើសកម្មភាព​​វទ្ធង្សនា ដោយយោងលើច្បាប់​សន្តិសុខជាតិ។ នេះបើ​ផ្អែក​តាម​ប្រកាសឲ្យ​ដឹង ពីសំណាក់ នគរបាល​ហុងកុង នៅថ្ងៃទី​២៨កុម្ភៈ។ នេះគឺការចោទប្រកាន់ ទៅលើមនុស្ស​ច្រើននាក់បំផុត ដែលក្នុងចំណោមអ្នកដែលរងការចោទប្រកាន់ គឺសុទ្ធតែជាសកម្មជនប្រជាធិបតេយ្យ និងបញ្ញវន្តអ្នកចេះដឹង ដែលចេញមុខខ្លាំង ក្នុងការទាមទារសិទ្ធិសេរីភាពនៅហុងកុង។

ផ្សាយពាណិជ្ជកម្ម

នគរបាលហុងកុង បានអះអាងថា មនុស្ស៤៧នាក់ ត្រូវ​ជាប់ចោទពីបទ ធ្វើសកម្មភាព​ឃុបឃិតគ្នា ​ក្នុងទិសដៅធ្វើវិទ្ធង្សនា បំផ្លាញ និងផ្តួលរំលំរដ្ឋាភិបាល។ បទចោទប្រកាន់នេះ មានចែងនៅក្នុងច្បាប់សន្តិសុខជាតិ​ សម្រាប់តំបន់ហុងកុង។

ក្នុងចំណោមអ្នកដែលត្រូវ​គេចោទ​ទាំងនេះ គឺមាន​អ្នកនយោបាយ និង​បញ្ញវន្តហុងកុងជាច្រើននាក់ ក្នុងនោះមាន​ដូចជា ៖ អតីតសមាជិកសភា​ លោក James To និងអ្នកស្រី Claudia លោក​សាស្ត្រាចារ្យ​សកលវិទ្យាល័យដ៏ល្បីឈ្មោះ Benny Tai លោក Wu Chi-wai ប្រធានគណបក្សប្រជាធិបតេយ្យ​ហុងកុង លោក Alvin Yeung Ngok-kiu មេដឹកនាំគណបក្សពលរដ្ឋហុងកុង មេធាវី បុគ្គលិកអង្គការ​សង្គមស៊ីវីល និង​យុវជនប្រជាធិបតេយ្យ​ ដូចជាលោក Joshua Wong ជាដើម។ បន្ទាប់ពីបានចូលខ្លួន​តាមការកោះហៅ របស់នគរបាល នៅរសៀលថ្ងៃអាទិត្យ​ ក្រុមអ្នកជាប់ចោទទាំងអស់ សន្យាថានឹងចូលខ្លួន​ទៅក្នុងតុលាការ នៅថ្ងៃចន្ទ ទី១មិនាស្អែក។

សូមរំលឹកថា អ្នកដែលជាប់ចោទ​ទាំង​៤៧នាក់ គឺស្ថិតក្នុងចំណោមមនុស្ស​ ៥៥នាក់ ដែល​មត្ថកិច្ចហុងកុង បានចុះឡោមព័ទ្ធចាប់ កាលពីថ​្ងៃទី ៦មករា។ មនុស្ស​ទាំងនេះ ត្រូវបាន​សមត្ថកិច្ច​ហុងកុង ចោទថាបានរៀបចំការបោះឆ្នោតខុសច្បាប់មួយ​ កាលពី​ខែ​កក្កដា ឆ្នាំ​២០២០។ ជាការបោះឆ្នោត​ ដែលក្រុម​អ្នកប្រជាធិបតេយ្យ​ហុងកុងបាន​រៀបចំ ហើយ​ដោយ​មាន​មនុស្ស​ប្រមាណ​៦សែននាក់ចូលរួម​។

គួរកត់សំគាល់ថា នេះគឺជាទំហំចំនួនចាប់ខ្លួន​អ្នក​ប្រជាធិបតេយ្យ​ ​ច្រើនបំផុត បើគិត​ពីក្រោយ​ការចូលជាធរមាន នៃច្បាប់សន្តិសុខជាតិ។ ច្បាប់សន្តិសុខជាតិ ដែលត្រូវបាន​បក្សកុម្មុយនីស្តចិនអនុម័ត និងចូលជាធរមាននៅ​ថ្ងៃទី ៣០ មិថុនា ២០២០ បានកំណត់ នូវ​ទោសឧក្រិដ្ឋ៤ប្រភេទ ក្នុងនោះមាន សកម្មភាព​វិទ្ធង្សនា សកម្មភាព​បះបោរបំបែកទឹកដី សកម្មភាព​ភេរវកម្ម និងសកម្មភាពឃុបឃិតបំរើប្រយោជន៍បរទេស។ ច្បាប់នេះ មិនបានឆ្លងកាត់ការពិភាក្សា នៅក្នុងសភាហុងកុងទេ។ អ្នកដែលជាប់ការចោទប្រកាន់ទាំងនេះ អាចប្រឈមនឹងទោសជាប់ពន្ធនាគារអស់មួយជីវិត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI