ជប៉ុន តៃវ៉ាន់ វ៉ាក់សាំង

ជប៉ុន​បញ្ជូនវ៉ាក់សាំង​បង្ការកូវីដ ជាង​១លានដូស​​ ទៅ​ឲ្យ​តៃវ៉ាន់ ដើម្បី​បញ្ឈឺចិត្តចិន?

យន្តហោះជប៉ុនដែលផ្ទុកវ៉ាក់សាំង សម្រាប់តៃវ៉ាន់ ត្រូវហោះហើរចេញពីព្រលានយន្តហោះ អន្តរជាតិ Narita នៅថ្ងៃទី​៤​មិថុនា ២០២១
យន្តហោះជប៉ុនដែលផ្ទុកវ៉ាក់សាំង សម្រាប់តៃវ៉ាន់ ត្រូវហោះហើរចេញពីព្រលានយន្តហោះ អន្តរជាតិ Narita នៅថ្ងៃទី​៤​មិថុនា ២០២១ VIA REUTERS - TAIWAN ECONOMIC AND CULTURAL REP

រដ្ឋាភិបាល​​ជប៉ុន​បាន​​ប្រកាស​កាលពីថ្ងៃ​សុក្រ​ទី​៤​មិថុនា ថា​នឹងផ្តល់​ជំនួយ វ៉ាក់សាំង បង្ការកូវីដ ចំនួន ១,២លាន​​ដូស​​ទៅឲ្យតៃវ៉ាន់។ តាម​រដ្ឋមន្រ្តីការបរទេស​ជប៉ុន វ៉ាក់សាំង​បង្ការកូវីដ ប្រភេទ AstraZeneca ជាង​​១លានដូស នឹង​ត្រូវ​​បញ្ជូន​ភ្លាមៗ ទៅ​តៃវ៉ាន់។ តៃវ៉ាន់ ដែលកំពុង​ប្រឈមនឹង​ករណីឆ្លងកូវីដ កើនឡើង​នៅមួយរយៈចុងក្រោយ​នេះ បាន​ចង្អុរមុខ​ចោទប្រកាន់​ប្រទេស​ចិន​ ថា​បាន​អន្តរាគមន៍ រារាំង មិន​ឲ្យ​តៃវ៉ាន់​​បាន​​ទទួល​វ៉ាក់សាំង Pfizer ដែល​ផលិតឡើង​ នៅ​​ប្រទេស​អាល្លឺម៉ង់។

ផ្សាយពាណិជ្ជកម្ម

តាម​រដ្ឋមន្រ្តីការបរទេស​ជប៉ុន លោក Toshimitsu Motegi មាន​ប្រទេស និង​រដ្ឋាភិបាល​ជាច្រើន​បាន​ស្នើ​សុំ​វ៉ាក់សាំង​ពីប្រទេស​ជប៉ុន។ នៅក្នុង​ករណី​តៃវ៉ាន់ ជប៉ុន​នឹង​ផ្តល់​វ៉ាក់សាំង ដោយ​ឥតគិត​ថ្លៃ ទៅតាម​សំណើសុំ​របស់​តៃវ៉ាន់ ហើយ​ការបញ្ជូន​វ៉ាក់សាំង​ជាង ១លានដូស ទៅតៃវ៉ាន់ នឹង​ធ្វើឡើង យ៉ាងយូរ ​នៅថ្ងៃ​សុក្រ។

នៅល្ងាចថ្ងៃ​សុក្រ ​រដ្ឋមន្រ្តី​ការបរទេស​តៃវ៉ាន់ បាន​បញ្ជាក់ថា វ៉ាក់សាំង​របស់​ជប៉ុន បាន​ទៅ​ដល់​ទីក្រុង​តៃប៉ិ រួចហើយ។ ប្រមុខការបរទេស​តៃវ៉ាន់ បានស្វាគមន៍​ និងថ្លែងអំណរគុណ ដល់​ប្រទេស​ជប៉ុន ដែលបាន​ចែករំលែក តម្លៃជាសកល​នៃសេរីភាព និង​ប្រជាធិបតេយ្យ ជាមួយ​តៃវ៉ាន់។ សម្រាប់ តៃវ៉ាន់ នេះ​ជាលើក​ទី១ ដែល​តៃវ៉ាន់​បាន​ទទួល​វ៉ាក់សាំង​បង្ការកូវីដ ក្នុង​បរិមាណ​ដ៏ច្រើនបែបនេះ។

តៃវ៉ាន់ បាន​កុម្ម៉ង់ទិញ វ៉ាក់សាំង ៣០លានដូស ប៉ុន្តែ នៅមុនទទួល​បាន​អំណោយ​វ៉ាក់សាំង​ពីជប៉ុន តៃវ៉ាន់​បាន​ទទួល​វ៉ាក់សាំង​ AstraZeneca ជាង ៧សែនដូស និង​វ៉ាក់សាំង Moderna ១សែន ៥ម៉ឺនដូស តាមរយៈ​យន្តការកូវ៉ាក់ ពោលគឺ​មិនបាន ១លានដូសផង សម្រាប់​តៃវ៉ាន់ ដែល​មាន​ប្រជាជនសរុប ២៥លាននាក់។ កំពុង​ប្រឈម​នឹង​ការកើនឡើង​នៃករណី ឆ្លងរាលដាល​ជំងឺកូវីដ រហូត​ដល់ ១ម៉ឺនករណី​ និង​មានអ្នកស្លាប់​ដោយសារ​កូវីដ ចំនួន​១៨៧នាក់ តៃវ៉ាន់​បាន​ព្យាយាម ស្វះស្វែង​រកវ៉ាក់សាំង សម្រាប់​ចាក់ឲ្យ​ប្រជាជន​របស់​ខ្លួន ឲ្យ​បាន​លឿនបំផុត។

នៅក្នុង​បទសម្ភាសន៍​ជាមួយ​ទូរទស្សន៍ក្នុងស្រុក ប្រធានាធិបតី​តៃវ៉ាន់ លោកស្រី ឆៃ អ៊ីងវេន បាន​ចោទប្រកាន់​ប្រទេស​ចិន​ថា បាន​រារាំង​ មិនឲ្យ​ក្រុមហ៊ុន នៅ​សៀងហៃ លក់ វ៉ាក់សាំង​Pfizer របស់​អាល្លឺម៉ង់ ទៅ​ឲ្យ​តៃវ៉ាន់។

ប្រតិកម្ម​ទៅនឹង​ជប៉ុន ផ្តល់​អំណោយវ៉ាក់សាំង​ទៅ​តៃវ៉ាន់ អ្នកនាំពាក្យ​របស់ក្រសួងការបរទេស​ចិន លោក Wang Wenbinបាន​និយាយ​បែបចំអកថា ចិន​សង្ឃឹមថា ជប៉ុន និង​តៃវ៉ាន់ ពិតជា​មានបេះដូង ចង់ជួយជីវិតមនុស្ស​ពិតៗ ប៉ុន្តែ មិនមែន​គ្រាន់តែ​ឆាកល្ខោន បិទបាំង​គោលដៅ​អ្វី​ផ្សេងនោះទេ។ លោក Wang Wenbin បាន​ឆ្លៀត​ផងដែរ និយាយ​រិះគន់​ អាកប្បកិរិយា​របស់​អាជ្ញាធរ​តៃវ៉ាន់ ព្រោះថា ដើម្បី​ផលប្រយោជន៍​នយោបាយ រដ្ឋាភិបាល​តៃវ៉ាន់ បាន​និយាយ​បំផុសបំផុល និង​រារាំង បិទខ្ទប់ មិន​ឲ្យ​ប្រើប្រាស់​វ៉ាក់សាំង​ចិន សម្រាប់​យុទ្ធនាការ​ចាក់វ៉ាក់សាំង នៅតៃវ៉ាន់។

សូមបញ្ជាក់ដែរថា វ៉ាក់សាំងជាង ១លានដូស ដែល​ជប៉ុន​ផ្តល់អំណោយ​ទៅ​តៃវ៉ាន់ ជា​វ៉ាក់សាំង AstraZeneca ផលិតឡើង​នៅប្រទេស​ជប៉ុន។ ជប៉ុន ដែល​យឺតយ៉ាវ ក្នុង​យុទ្ធនាការ​ចាក់វ៉ាក់សាំង ដល់​ប្រជាជន​របស់ខ្លួន ទើប​បាន​ផ្តល់​ការអនុញ្ញាត ភ្លើងខៀវ​សម្រាប់​វ៉ាក់សាំង Moderna និង​AstraZeneca កាលពី ២សប្តាហ៍មុន។ ប៉ុន្តែ ផ្ទុយពី Pfizer Moderna ជប៉ុន បាន​ស្តុក មិនទាន់​ប្រើប្រាស់​វ៉ាក់សាំង AstraZeneca​នៅឡើយទេ ដោយសារ​បញ្ហាដុំឈាម ក្នុង​សរសៃឈាម ដែលអាច​ទាក់ទង​នឹង ការចាក់​វ៉ាក់សាំង AstraZeneca។

ក្រៅតែ​ពីទទួល​វ៉ាក់សាំង​របស់​ជប៉ុន តៃវ៉ាន់ ស្ថិតនៅក្នុង​ចំណោម​ប្រទេស​ដែល​អាមេរិក គ្រោង​នឹង​ផ្តល់ជំនួយ វ៉ាក់សាំង​ចំនួន ៨០លានដូស នៅ​ចុងខែ​មិថុនា​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI