ភូមា

ភូមា ៖ សវនាការ​កាត់​ទោស​លោកស្រី អ៊ុងសាន ស៊ូជី នឹង​ចាប់បើក​ធ្វើ​នៅ​ថ្ងៃទី ១៤​មិថុនា

សវនការ​កាត់​ទោស​លោកស្រី អ៊ុងសានស៊ូជី នឹង​ចាប់​ផ្តើមនៅ​ថ្ងៃទី ១៤ មិថុនា ២០២១
សវនការ​កាត់​ទោស​លោកស្រី អ៊ុងសានស៊ូជី នឹង​ចាប់​ផ្តើមនៅ​ថ្ងៃទី ១៤ មិថុនា ២០២១ Ye Aung Thu AFP/Archivos

លោកស្រី អ៊ុងសាន ស៊ូជី អតីតមេដឹកនាំ​​ភូមា​ ដែល​ក្រុមយោធា​បាន​ធ្វើ​រដ្ឋប្រហារ​ទម្លាក់​ពី​តំណែង​កាលពី​ថ្ងៃទី ១​កុម្ភៈ​២០២១ រង​ការ​ចោទ​ប្រកាន់​ចំនួន​៦ ​ករណី មាន​តាំង​ពី​​ការ​ប្រព្រឹត្ត​អំពើ​ពុក​រលួយ​ ទទួល​សំណូក ញុះ​ញង់​ឱ្យ​​ខូច​សណ្តាប់​ធ្នាប់​សាធារណៈ ដល់​បទ​​រំលោភ​ការ​សម្ងាត់​រដ្ឋ។ ឥលូវ​ដល់​ពេល​ត្រូវ​កាត់​ទោស​ហើយ ! សវនាការ​កាត់​ទោស​លោកស្រី នឹង​ចាប់​បើក​នៅ​ថ្ងៃទី ១៤​មិថុនា​២០២១​ សប្តាហ៍​ក្រោយ។ នេះ​បើ​តាម​ក្រុម​មេធាវី​ការពារ​លោក​ស្រី​បញ្ជាក់​ប្រាប់​ភ្នាក់ងារ​សារព័ត៌មាន​បារាំង AFP នៅ​ថ្ងៃចន្ទទី ៧​មិថុនា២០២១។

ផ្សាយពាណិជ្ជកម្ម

សវនាការ​កាត់​ទោស​លោកស្រី អ៊ុងសាន ស៊ូជី​ លើ​សំណុំ​រឿង​ទី​មួយ​ នឹង​ត្រូវ​ចាប់​ផ្តើម​ នៅ​ថ្ងៃចន្ទទី ១៤​មិថុនា​ នៅ​តុលាការ​ក្រុង​ណៃពិដោរ។ ចំណែក​សំណុំ​រឿង​ ​ទីពីរ ដែល​តុលាការ​​បាន​ចោទ​ប្រកាន់ លោកស្រី និង​អតីត​ប្រធានាធិបតី ភូមា លោក វីន មីង ពី​បទញុះ​ញង់​ឱ្យ​មាន​ការ​​​បះបោរ​ នឹង​បើក​ធ្វើ​ ចាប់​ពី​ថ្ងៃអង្គារ​ទី ១៥​មិថុនា​ នៅ​ក្រុង​ណៃពិដោរ​ដែរ។ សវនាការ​កាត់​ទោស​លោកស្រី អ៊ុងសាន ស៊ូជី ទាំង​ពីរ​ករណី​​​នឹង​​ត្រូវ​ចប់​ ​នៅ​ចុង​ខែ​កក្កដា ២០២១។ នេះ​បើ​តាម​ការ​អះអាង​របស់​លោកស្រីមេធាវី Min Min Soe ក្រោយ​ពី​បាន​ជួប​សន្ទនា​ជាមួយ​កូន​ក្តី លោកស្រី អ៊ុងសានស៊ូជី រយៈ​ពេល​៣០​នាទី និង​ជា​លើក​ទីពីរ​ប៉ុណ្ណោះ គិត​ចាប់​តាំង​ពី​ថ្ងៃ​ចាប់​ខ្លួន​មក។

ចំណែក​បទ​ចោទ​ប្រកាន់ ​​​ដែ​លមាន​លក្ខណៈ​ធ្ងន់ធ្ងរ​ខ្លាំង​ជាង​គេ​ ស្តីពីការ​​​រំលោភច្បាប់​​សម្ងាត់​​រដ្ឋ (​ច្បាប់​កាលពី​សម័យក្រោម​​អាណានិគម) នឹង​ត្រូវ​តុលាការ​ក្រុង​រ៉ង់ហ្គូន​កោះ​ហៅ​នៅពេល​ក្រោយ​។

ជា​ឆាក​ឈុត​​សវនាការ​ដែល​របប​ខុស​ច្បាប់​ភូមា​បានរៀបចំ​​​ប្រឌិត​​​ឡើង​ដើម្បី​ទម្លាក់​ប្រជាប្រិយភាព​របស់​មេដឹកនាំ​ដែល​ប្រសូត​ចេញ​ពី​ការ​បោះឆ្នោត​តែ​ប៉ុណ្ណោះ។ នេះ​បើ​តាម​កា​របរិហារ​របស់​អ្នក​សង្កេតការណ៍​។

ធ្លាប់​​ជាប់​ឃុំ​ឃាំង​ក្នុង​គេហដ្ឋាន​អស់​រយៈ​ពេល​១៥​ឆ្នាំ លោកស្រី ដែល​មាន​អាយុ​៧៥​ឆ្នាំ​ទៅ​ហើយ ​អាចនឹងត្រូវ​ជាប់​ពន្ធនាគារជាច្រើនឆ្នាំ និង​ពុំអាច​ធ្វើ​នយោបាយ​បាន​ទៀត​ទេ ប្រសិន​បើ​តុលាការ​រក​ឃើញ​ថា​លោកស្រី ពិត​ជា​បាន​ប្រព្រឹត្ត​កំហុសមែន។

លោកស្រីជ័យលាភីណូបែល​សន្តិភាពឆ្នាំ​១៩៩១ ត្រូវ​បាន​ក្រុម​យោធា​​ភូមា ចាប់​ខ្លួន​នៅ​ព្រឹក​ព្រហាម​ថ្ងៃទី ១​ កុម្ភៈ និ​ងយក​ទៅ​ឃុំ​នៅ​ទី​កន្លែង​សម្ងាត់​មួយ ដោយ​ទើប​តែ​អាច​លេច​ជា​​សាធារណៈ​ជា​លើក​ទី​មួយ នៅ​ចំពោះ​មុខ​តុលាការ នៅ​ថ្ងៃទី ២៤​ឧសភា​២០២១។ ក្រុម​​យោធាភូមា​ ថែម​ទាំង​បាន​គំរាម​រំលាយ​គណបក្ស​សម្ព័ន្ធ​ដើម្បី​ប្រជាធិបតេយ្យ​របស់​លោកស្រី​អ៊ុងសានស៊ូជី​ទៀត​ផង ពី​បទ​លួច​បន្លំ​សន្លឹក​ឆ្នោត​នៅ​ក្នុង​​សម័យ​បោះឆ្នោត​សភា​កាលពី​ឆ្នាំ​២០២០។​ ការ​អង្កេត​បាន​បញ្ចប់​ហើយ សេចក្តី​សម្រេច​នឹង​ត្រូវ​ប្រកាស​ឱ្យ​ដឹង​នៅ​ក្នុង​ពេល​ឆាប់ៗ​ ដោយ​គណៈកម្មការ​រៀប​ចំ​បោះឆ្នោត​ ស្និទ្ធ​នឹង​ក្រុម​ឧត្តមសេនីយ៍​កាន់​អំណាច៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI