ចិន-សហរដ្ឋ​អាមេរិក

ប៉េកាំង​​ទាមទារ​ឱ្យ​អាមេរិក​ឈប់​បង្កាច់បង្ខូច​ឈ្មោះ​ចិន និង​ឈប់​មើល​ចិន​ជា​សត្រូវ

លោកអនុរដ្ឋមន្ត្រី​ក្រសួង​ការបរទេស​ចិន.
លោកអនុរដ្ឋមន្ត្រី​ក្រសួង​ការបរទេស​ចិន. AFP - PHILIP FONG

អនុរដ្ឋមន្ត្រី​ក្រសួង​ការបរទេស​អាមេរិក​លោកស្រី Wendy Sherman បានអញ្ជើញ​ទៅ​ដល់​ក្រុង​ Tianjin ប្រទេស​​ចិនកាលពី​ថ្ងៃអាទិត្យ​ទី ២៥​កក្កដា និង​ត្រូវ​ជួប​សន្ទនាជាមួយ​សមភាគី​​ចិន​ លោក ចៀ ហ្វឹង Xie Feng នៅ​ថ្ងៃ​ចន្ទ​ទី ២៦​កក្កដា​នេះ។ នេះជា​ជំនួប​​ជាន់​ខ្ពស់ការបរទេស​​ចិន​-អាមេរិក​លើក​ដំបូង​ គិត​ចាប់​តាំង​ពី​លោក​ចូបៃដិន បាន​ចូល​កាន់​តំណែងមក។ ក្នុង​ជំនួប​នេះ ប៉េកាំង​បាន​ទាមទារ​ឱ្យ​អាមេរិក​ឈប់​បង្កាច់​បង្ខូច​ចិន។

ផ្សាយពាណិជ្ជកម្ម

មហាអំណាច​ពិភពលោក​ចិន​និង​អាមេរិក នៅ​តែ​មើល​មុខ​គ្នា​ចំ​លើ​សំណុំរឿង​ជា​ច្រើន​ តាំង​ពី​ សំណុំ​រឿង​សិទ្ធិមនុស្ស បច្ចេកវិទ្យា ពាណិជ្ជកម្ម ឬ​​បញ្ហា​ហុងកុង​... ដំណើរមក​ដល់​និង​ជំនួប​លើក​ដំបូង​របស់​អ្នក​ទទួល​ខុស​ត្រូវ​ការទូត​អាមេរិក​លំដាប់​ទីពីរជាមួយ​សមភាគី​ចិន​លើ​ទឹក​ដី​ចិនប្រព្រឹត្ត​ទៅ​ដោយ​តានតឹង​បំផុត និងដោយ​គ្មាន​អញ្ជើញ​អ្នក​សារព័ត៌មាន​ណា​ម្នាក់​ឱ្យ​ចូល​រួម​ទេ។

​លោក​អនុរដ្ឋមន្ត្រីការបរទេស​ចិន បាន​ចោទ​ប្រកាន់​និង​ទម្លាក់​កំហុស​ទាំង​អស់​ទៅ​អាមេរិក ថាជា​អ្នក​ធ្វើ​ឱ្យ​ទំនាក់ទំនង​រវាង​ប្រទេស​ទាំង​ពីរ​ធ្លាក់​ក្នុងភាព​​ទ័លច្រក នាពេល​នេះ។ សហរដ្ឋ​អាមេរិក​ត្រូវ​តែ​ឈប់​បង្កាច់​បង្ខូច​ចិន ឈប់​ចោទ​ថា​ចិន​ជា​ចក្រភពចោរអ៊ីនធ័រនែត ចក្រភព​អាក្រក់ និង​ឈប់​សំឡឹង​មើល​ចិនជា​សត្រូវ។ នេះ​បើ​តាម​សេចក្តីថ្លែងការណ៍​របស់​​លោក​អនុរដ្ឋមន្ត្រី​ចិន ដោយ​បាន​បញ្ជាក់​ថា​ទៀត អាមេរិក​ត្រូវ​តែ​ប្តូរ​ផ្លាស់គំនិតខុស​ឆ្គង​​ និង​នយោបាយ​ដ៏​គ្រោះ​ថ្នាក់់​នេះ​ចេញ។

សូម​បញ្ជាក់​ថា តាំងពី​ ចូលកាន់​តំណែង​នៅ​សេតវិមាន​មក លោក​ចូបៃដិនពុំបាន​ប្តូរ​ផ្លាស់​នយោបាយលើក​ទណ្ឌកម្មពាណិជ្ជកម្ម​ពី​​ប៉េកាំងទេ​ តែ​បាន​ថែម​ទាំង​ទៅ​បញ្ចុះ​បញ្ចូល​សម្ព័ន្ធមិត្ត​​ឱ្យ​មក​ផ្តុំ​កម្លាំងប្រជាធិបតេយ្យ​ជា​ធ្លុង​មួយ​ប្រឆាំង​នឹង​ចិនដែល​​កាន់​តែ​ផ្តាច់ការ ​និង​កំណាច​ឡើងៗ។

ការ​ប្រកាន់​នយោបាយ​ប្រឈម​តតាំងនឹង​ចិន​គ្រប់វិស័យ​របស់​វ៉ាស៊ីនតោន និងធ្វើ​សហប្រតិបត្តិការលើ​វិស័យ​ណា​ដែល​អាច​សហការបាន ជា​នយោបាយ​ឆ្លៀត​ឱកាស​និង​ជា​អន្ទាក់​នៃការ​ប្រកួត​ប្រជែង​ប៉ុណ្ណោះ។ យុទ្ធសាស្ត្រ​អាមេរិក​បែប​នេះ សម្រាប់​ប្រជាជនចិន​គឺ​ជា​ការ​ប៉ុនប៉ង​បន្ទុចបង្អាក់ និង​បង្ក្រាប​ចិន។ នេះ​ជា​ការ​អះអាង​បន្ថែម​របស់​លោក ចៀ ហ្វឹង​ ទៅ​កាន់​សមភាគីអាមេរិក។

គេ​ពុំ​ឃើញ​មាន​សេចក្តីថ្លែងការណ៍​របស់​លោកស្រី​​អនុរដ្ឋមន្ត្រីការបរទេស​អាមេរិក​ចេញផ្សាយ​ ក្រោយ​ជំនួប​ភ្លាម។ តាមគម្រោង​ ជំនួប​នេះ​ជា​ឱកាស​ដែលវ៉ាស៊ីនតោន​ ​ត្រូវ​បញ្ជាក់​អំពី​ជំហរ​នយោបាយ​​ និង​អំពីអ្វី​ដែលភាគីម្ខាងៗចង់​បាន​ពី​ទំនាក់ទំនងល្អ​​ចិន-អាមេរិក។ កម្មវត្ថុ​ចំបង​មួយ​ទៀត គឺ​ការ​រៀប​ចំ​ជំនួប​កំពូល​រវាង​លោកស៊ីជីនពីង និង​លោក​ចូបៃដិន នៅ​ថ្ងៃ​ខាង​មុខ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI