ឥណ្ឌាប្រកាសបើកបណ្តាញសកលចែកចាយថាមពលព្រះអាទិត្យ
ក្នុងខណៈដែលពិភពលោកកំពុងជួបប្រជុំគ្នាដើម្បីអាកាសធាតុ លោកណារិនដ្រា ម៉ូឌី នាយករដ្ឋមន្ត្រីឥណ្ឌា ត្រូវធ្វើសេចក្តីប្រកាសនៅថ្ងៃទី ២ វិច្ឆិកា ២០២១នេះ ការបើកបណ្តាញពិភពលោកចែកចាយថាមពលព្រះអាទិត្យ។ ជាគម្រោងដែលនាំថាមពលព្រះអាទិត្យពីប្រទេសក្តៅមានពន្លឺថ្ងៃច្រើន ទៅឱ្យប្រទេសមួយផ្សេងទៀតដែលពុំសូវមានថ្ងៃ។ ជាប្រទេសបញ្ចេញផ្សែងពុលកាបោន លំដាប់ទីបីពិភពលោក ឥណ្ឌាមានផែនការចង់ក្លាយជាជើងឯកផ្នែកថាមពលស្អាត។
ចុះផ្សាយនៅថ្ងៃ៖
“ស្រូបទាញយកថាមពលពីព្រះអាទិត្យ នៅក្នុងប្រទេសដែលនៅថ្ងៃ រួចបញ្ជូនទៅឱ្យប្រទេសមួយផ្សេងទៀតដែលចាប់ងងឹតយប់”។ នេះហើយជាគោលគំនិតនៃបណ្តាញចែកចាយថាមពលព្រះអាទិត្យពិភពលោក របស់ឥណ្ឌា។ គុណសម្បត្តិទីមួយនៃបណ្តាញនេះ គឺ មានប្រទេសច្រើនផ្សេងទៀត អាចទាញយកប្រយោជន៍ពីថាមពលស្អាតស្អំហើយថោក និងដោយមិនបាច់គិតគូររកកន្លែងឬវិធីស្តុកទុកទេ។
គ្រប់គ្រងដោយសម្ព័ន្ធថាមពលព្រះអាទិត្យអន្តរជាតិ ដែលជាអង្គការមានទីស្នាក់ការនៅឥណ្ឌាស្រាប់ និងដោយមានជំនួយសហការជាមួយក្រុមហ៊ុនអគ្គីសនីបារាំង ខាងផ្នែកបច្ចេកទេស គម្រោងនេះចង់តភ្ជាប់បណ្តាញចំនួនបួនទិស ៖ អាហ្វ្រិកខាងជើងនិងអឺរ៉ុប សិង្ហបុរីនិងអូស្ត្រាលី អាស៊ីខាងកើតនិងឥណ្ឌា និងឥណ្ឌាជាមួយប្រទេសក្នុងតំបន់ឈូងសមុទ្ទពែក្ស។
ប៉ុន្តែគម្រោងនេះ នៅជាបញ្ហារសើបខ្លាំង ព្រោះការបញ្ជូនអគ្គីសនីរាប់រាយគីឡូម៉ែត្រអាចត្រូវចំណាយធំ និងធ្វើឱ្យថាមពលព្រះអាទិត្យឡើងថ្លៃ ជាពិសេសបើបណ្តាញខ្សែកាប ត្រូវឆ្លងកាត់ក្រោមសមុទ្ទ។ ម្យ៉ាងទៀត ការប្រកួតប្រជែងនយោបាយក្នុងតំបន់ អាចនឹងជាឧបសគ្គដែលមិនអាចឆ្លងកាត់បាន។ ឧទាហរណ៍ការភ្ជាប់បណ្តាញ ឥណ្ឌា-ឈូងសមុទ្ទពែក្ស ខ្សែកាបអគ្គីសនីត្រូវកាត់តាមប្រទេសប៉ាគីស្ថាន ជាសត្រូវរបស់ឥណ្ឌា ជាដាច់ខាត បើគេចង់ចៀសការតខ្សែក្រោមសមុទ្ទ។
សូមបញ្ជាក់ថា ក្នុងនាមជាប្រទេសបញ្ចេញផ្សែងពុលកាបោនលំដាប់ទីបីពិភពលោក ឥណ្ឌាបានប្រកាសបេ្តជ្ញា នៅថ្ងៃចន្ទទី ១វិច្ឆិកា ២០២១ ថា នឹងបង្កើនមួយជាពីរ បរិមាណផលិតថាមពលស្អាត (១០០០ជីហ្កាវ៉ាត់) នៅឆ្នាំ២០៣០ ពោលគឺស្មើនឹង៥០%នៃថាមពលប្រើក្នុងប្រទេស។ លោកនាយករដ្ឋមន្ត្រីឥណ្ឌា មូឌី បានថែមទាំងសន្យាធ្វើអព្យាក្រិតកាបោននៅឆ្នាំ២០៧០ផង។
ដើម្បីជាកិច្ចចាប់ផ្តើមធ្វើបដិវត្តថាមពលកើតឡើងវិញ ឥណ្ឌារំពឹងខ្លាំងលើគម្រោងថាមពលព្រះអាទិត្យ នៅតំបន់វាលខ្សាច់ ក្នុងរដ្ឋ RAJATHAN ដែលមានកម្តៅថ្ងៃព្រះអាទិត្យ ដល់ទៅ ៣២៥ថ្ងៃក្នុងមួយឆ្នាំ។ ឥណ្ឌាជាប្រទេសផលិតថាមពលព្រះអាទិត្យលំដាប់ទី៥ពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ