ផ្សែងពុលក្រាស់ឃ្មឹក រុំរឹតប៉េកាំងនិងញូដេលី ចំពេលកំពុងមានសន្និសីទអាកាសធាតុCOP២៦
ចុះផ្សាយនៅថ្ងៃ៖
ក្នុងខណៈដែលពិភពលោកកំពុងជួបជុំគ្នានៅGlasgow ដើម្បីរកវិធីកាត់បន្ថយការបញ្ចេញឧស្ម័នផ្ទះកញ្ចក់ ចិនដែលជាប្រទេសបញ្ចេញផ្សែងពុលលំដាប់ទីមួយពិភពលោក កំពុងរងផលវិបាកយ៉ាងទាន់ហន់។ នៅថ្ងៃនេះ កំរិតផ្សែងពុលក្នុងបរិយាកាសនៅទីក្រុងប៉េកាំងបានឡើងក្រាស់ឃ្មឹក ហួសកំរិតបទដ្ឋានសុវត្ថិភាព។ ចំណែកនៅក្រុងញូវដេលីប្រទេសឥណ្ឌា ផ្សែងពុលក៏បានឡើងហួសកំរិតសុវត្ថិភាពដល់ទៅ១៥ដងដែរ។
ដោយមានបរិយាកាសអួរអាប់មើលគ្នាស្ទើរលែងឃើញ និងផ្សែងពុលក្រាស់ឃ្មឹក អាជ្ញាធរចិនបានសម្រេចហាមឃាត់មិនឱ្យសិស្សានុសិស្ស ចេញលេងនៅទីធ្លា ឬហាត់ប្រាណធ្វើកីឡានៅទីវាលទេ នៅថ្ងៃសុក្រទី ៥វិច្ឆិកា២០២១នេះ។ ចរាចរណ៍លើផ្លូវថ្នល់ហាយវេភ្ជាប់ពីរដ្ឋធានីទៅកាន់ទីក្រុងធំផ្សេងៗ ត្រូវបិទ ព្រោះតែមានផ្សែងអ័ព្ទក្រាសពេក។ កំរិតផ្សែងពុលក្នុងបរិយាកាសបានគ្របដណ្តប់ក្រុងប៉េកាំង និងកំពុងរាលដាលឆ្លងទៅកាន់តំបន់ផ្សេងៗទៀត ជាមួយនឹងបរិមាណធាតុល្អិតឆ្មារៗឡើងខ្ពស់រហូតដល់ទៅ២២០ ដែលជាកំរិតគ្រោះថ្នាក់សម្រាប់សុខភាព។ បើតាមបទដ្ឋានសុវត្ថិភាពរបស់អង្គការសុខភាពពិភពលោក ធាតុល្អិតឆ្មារៗនេះមិនត្រូវលើសពី១៥ទេ។
ខ្យល់បរិយាកាសក្រុងប៉េកាំងឡើងពុលខ្លាំងជាថ្មី ក្នុងខណៈដែលចិនទើបបានប្រកាសដំឡើងផលិតកម្មធ្យូងថ្ម។ ជាប្រទេសបញ្ចេញផ្សែងពុលលេខមួយនៅលើពិភពលោក រងការរិះគន់ខ្លាំងចំពោះការដែលលោកស៊ីជីនពីងមិនអញ្ជើញទៅចូលរួមក្នុងសន្និសីទCOP២៦ ដែលកំពុងពិភាក្សារកវិធីកាត់បន្ថយឧស្ម័នផ្ទះកញ្ចក់ ចិនបែរជាប្រកាសបង្កើនផលិតកម្មធ្យូងថ្ម ចំនួន ១លានតោនក្នុងមួយថ្ងៃ។ ថាមពលអគ្គីសនីដែលចិនត្រូវការកាន់ខ្លាំងឡើងៗ ៦០%បានមកពីធ្យូងថ្ម។
ចំណែកនៅប្រទេសឥណ្ឌា ដែលជាប្រទេសបញ្ចេញផ្សែងពុលលេខបួនពិភពលោកវិញ ក្រោយពិធីបុណ្យសាសនា ដែលមានអុជទៀន អុជចង្កៀងប្រេងកាត និងការដុតផាវ ផ្សែងពុលក្នុងបរិយាកាសបានឡើងហួសកំរិតបទដ្ឋានសុវត្ថិភាពដល់ទៅជាង១៥ដង។ ខ្យល់បរិយាកាសនៅកន្លែងខ្លះមានកំហាប់ធាតុល្អិតឆ្មារៗPM២,៥ដល់ទៅជាង៤០០ នៅថ្ងៃសុក្រទី ៥វិច្ឆិកានេះ។
បើតាមរបាយការណ៍របស់អង្គកាស្វ៊ីស IQAIR នៅឆ្នាំ ២០២០ នៅក្នុងចំណោមក្រុងដែលពុលខ្លាំងជាងគេបំផុតនៅលើពិភពលោក ទាំង៣០ក្រុង ២២ជាក្រុងរបស់ឥណ្ឌា ហើយញូវដេលីជារដ្ឋធានីជើងឯកខាងមានខ្យល់បរិយាកាសពុល។ នៅឆ្នាំ២០១៩ មានពលរដ្ឋឥណ្ឌា ១,៦៧លាននាក់ស្លាប់ដោយខ្យល់ពុល។ នេះបើតាមទស្សនាវដ្តីវិទ្យាសាស្ត្រThe Lancet៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ