អានតួអត្ថបទ

ដំរី​អាហ្រ្វិក​ជិត​៣០០​ក្បាល​ស្លាប់​ដោយ​អាថ៌កំបាំង

សត្វដំរី​នៅ​ប្រទេស​បុតស្វាណា
សត្វដំរី​នៅ​ប្រទេស​បុតស្វាណា AFP/File
ដោយ៖ ឈាង បុប្ផា
1 នាទី

យ៉ាងតិច ដំរី ២៧៥​ក្បាល ត្រូវ​បានគេ​រកឃើញ​ស្លាប់ក្នុង​លក្ខខណ្ឌ​ដ៏អាថ៌កំបាំង នៅ​ប្រទេស​បុតស្វាណា ក្នុង​ទ្វីបអាហ្រ្វិក។ បុតស្វាណា ដែល​មាន​ព្រំដែន​ជាប់​ប្រទេស​អាហ្វ្រិក​ខាងត្បូង មាន​ដំរី ព្រៃ ប្រមាណ ១៣០ ០០០​ក្បាល ដែល​ស្មើនឹង​មួយភាគ បី នៃ​ដំរី​ព្រៃ​សរុប នៅទឹកដី​អាហ្វ្រិក។ ប៉ុន្តែ ថ្មីៗ អាជ្ញាធរ​សត្វព្រៃ បាន​រកឃើញ សាកសព​សត្វដំរី ដែល​ដេកដួល​ស្លាប់ នៅតាម​ដងទន្លេ Okavango ភាគខាងជើង ប្រទេស​បុតស្វាណា។

ផ្សាយពាណិជ្ជកម្ម

ឧទ្យាន​ជាតិ​ទន្លេ​Okanvango នៅប្រទេស​បុតស្វាណា បាន​ទទួល​សេចក្តីរាយការណ៍​ដែល​ថា មាន​ដំរី ជាង ៣៥០​ក្បាល ស្លាប់​ដោយ​មិនដឹង​មូលហេតុ នៅតាម​ដងទន្លេ Okanvango។ នៅថ្ងៃ​ព្រហស្បតិ៍ ប្រធាន​ឧទ្យាន​ជាតិ បុតស្វាណា លោក បានបញ្ជាក់ ចំនួន​សត្វដំរី ២៧៥​ក្បាល​ស្លាប់​នៅ​ក្នុង​តំបន់ឧទ្យាន​ Okanvango។

តាម​ប្រធាន​ឧទ្យានជាតិ​ដដែល គេ​កំពុង​រកមូលហេតុ​ដែល​ធ្វើ​ឲ្យ​សត្វដំរី ស្លាប់​ក្នុង​ចំនួន​ដ៏ច្រើន​ក្បាលបែបនេះ។ ប្រធាន​ឧទ្យាន បាន​ផាត់ចោល សម្មតិកម្ម​ដែល​ថា សត្វដំរី ស្លាប់​ដោយសារ​ជំងឺ Anthrax ដែលអាច​ឆ្លងតាម​ទឹក និង​ដី។ តាម​ប្រធាន​ឧទ្យាន សត្វដំរី​ដែល​ស្លាប់​ជាបន្តបន្ទាប់ តាំង​ពី​ខែ​មិថុនា ក៏មិនមែន​ស្លាប់​ដោយសារ​ព្រានលួចប្រមាញ់ដែរ ព្រោះ​រាល់សាកសព​សត្វដំរីព្រៃ សុទ្ធតែ​មានភ្លុក នៅជាប់ជាមួយ។

សំណាក​របស់​សាកសព​សត្វដំរី ត្រូវ​ផ្ញើរួចហើយ​ទៅ​ប្រទេស​អាហ្វ្រិក​ខាងត្បូង ស៊ីមបាវ៉េ និង​កាណាដា ដើម្បី​ធ្វើការ​វិភាគ​រក​មើល​មូលហេតុ​ពិតប្រាកដ ដែល​ធ្វើ​ឲ្យ​សត្វដំរី​ព្រៃ នៅ​បុតស្វាណា ដេកដួល​ស្លាប់​យ៉ាងដូច្នេះ។

សាស្រ្តាចារ្យ McCann ដែល​បម្រើការ​នៅ​មូលនិធិ​សង្រ្គោះ​ឧទ្យានជាតិ បាន​ឲ្យ​ដឹងថា សម្រាប់​ដំរី​ដែលនៅ​រស់ គេសង្កេត​ឃើញ​វា ដើរវិល​ចុះ វិលឡើង មិន​ព្រមដើរ​ទៅមុខ ហាក់​ដូចជា​ប្រព័ន្ធប្រសាទ​របស់​វា ត្រូវ​ប៉ះពាល់​ដោយ​ជំងឺ​អ្វីមួយ។

នៅពេលដែល​ទឹក និង​ដី គ្មាន​ជាតិពុល ដែល​អាច​សម្លាប់​សត្វដំរី សាស្រ្តាចារ្យ McCann បាន​ដាក់​ការសង្ស័យ​លើ​ជំងឺកូវីដ ១៩ ដែល​លោកជឿថា កំពុង​ចាប់ផ្តើម​ឆ្លង​ទៅ​សត្វ។

ស្ថិតនៅ​កណ្តាល ឡោមព័ទ្ធ​ដោយ​ហ្សំប៊ី ណាមីប៊ី អាហ្វ្រិកខាងត្បូង ប្រទេស​បុតស្វាណា ជាជំរក​សត្វដំរី ព្រៃ ជាង ១៣០ ០០០​ក្បាល។ ដំរីភាគច្រើន​រស់នៅមាន​សេរីភាព ក្នុង​ឧទ្យាន តាមដងទន្លេ Okavango ដែល​ជា​កន្លែង​ដ៏ទាក់ទាញ​សម្រាប់​អ្នកទេសចរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ