អេត្យូពី-វិបត្តិជនភៀសខ្លួន

ក្បួន​ជំនួយ​អន្តរជាតិ​ដំបូង​ទៅ​ដល់​តំបន់​ទីហ្ក្រេ​នៃ​ប្រទេស​អេត្យូពី

ជនភៀសខ្លួនអេត្យូពីដែលភៀសខ្លួនចេញពីតំបន់ទីហ្ក្រេ ចម្អិនអាហារនៅជំរុំ Um-Rakoba ក្នុងរដ្ឋ Al-Qadarif នៅតាមព្រំដែនក្នុងប្រទេស​ស៊ូដង់ថ្ងៃទី១១ ខែធ្នូ ឆ្នាំ២០២០។
ជនភៀសខ្លួនអេត្យូពីដែលភៀសខ្លួនចេញពីតំបន់ទីហ្ក្រេ ចម្អិនអាហារនៅជំរុំ Um-Rakoba ក្នុងរដ្ឋ Al-Qadarif នៅតាមព្រំដែនក្នុងប្រទេស​ស៊ូដង់ថ្ងៃទី១១ ខែធ្នូ ឆ្នាំ២០២០។ © REUTERS - MOHAMED NURELDIN ABDALLAH
ដោយ៖ អ៊ុង គឹមអ៊ាន់
១៦ នាទី

ក្បួន​ជំនួយ​អន្តរជាតិ​ដំបូង​បាន​ទៅដល់​រដ្ឋធានី​ស្ថិត​នៅក្នុង​តំបន់​ទីហ្ក្រេ​ (Tigray) នៃ​ប្រទេស​អេត្យូពី នាថ្ងៃ​សៅរ៍​ ទី១២​ ធ្នូ​ ក្រោយ​ការ​ប្រយុទ្ធគ្នា​​ផ្ទុះឡើង​ជាង​មួយ​ខែ​រួច​មក​។ ការ​វាយ​ប្រយុទ្ធ​គ្នា​រវាង​កងទ័ព​រដ្ឋាភិបាល​អេត្យូពី​ និង​ក្រុម​យោធា​រំដោះ​តំបន់​ទីហ្ក្រេ​ បាន​បង្ក​ឲ្យ​មាន​វិបត្តិ​ជនភៀស​ខ្លួន​។ កាលពីខែ​មុន ​អង្គការ​សហប្រជាជាតិបាន​ស្វះស្វែង​រក​ថវិកា​បន្ទាន់​ប្រមាណ ១៥ពាន់​លាន​ដុល្លារ​ សម្រាប់​ជួយ​ប្រជាជន​អេត្យូពី​រាប់​ម៉ឺន​នាក់​ដែលបាន​រត់​ភៀស​ខ្លួន​ទៅ​ប្រទេស​ក្បែរខាងស៊ូដង់​។

ផ្សាយពាណិជ្ជកម្ម

រថយន្ត​ចំនួន​ ៧ គ្រឿង​ដែល​មាន​ផ្ទុក​ទៅ​ដោយ​ថ្នាំ​សង្កូវ​ និង​សម្ភារៈពេទ្យ​សម្រាប់​អ្នក​រង​របួស​ចំនួន​ ៤០០​នាក់​ និង​ជំនួយ​សង្គ្រោះ​ផ្សេងទៀត​បានទៅដល់​ទីក្រុង​មេកេឡេ​ (Mekele) ដែល​ជាទី​ប្រជុំជនធំ​របស់​តំបន់​ទីហ្ក្រេ​ស្ថិត​នៅ​ភាគ​ខាង​ជើង​អេត្យូពី​។ ប្រជាជន​ជិត​កន្លះ​លាន​នាក់​នៅ​ទីនោះ រស់​នៅ​យ៉ាងលំបាក​លំបិន​ និង​មិន​បាន​ទទួល​ជំនួយ​មនុស្ស​ធម៌​ចាប់​ពី​ជម្លោះ​ផ្តើម​ផ្ទុះ​ឡើង​។  

ក្បួន​ជំនួយអន្តរជាតិ​ខាងលើ​ គឺជា​ជំនួយ​ដំបូងគេ​ដែល​បាន​ទៅ​ដល់​ក្រុង​មេកេឡេ​ ចាប់តាំង​ពី​ការប្រយុទ្ធគ្នា​បានផ្ទុះឡើង​នៅតំបន់​ទីហ្ក្រេ ​កាលពី​ថ្ងៃទី​ ៤ វិច្ឆិកា​។ នេះ​បើ​យោង​ទៅ​តាម​គណៈម្មាធិការ​នៃ​កាក​បាទ​ក្រហម​អន្តរជាតិ​ ដោយ​បាន​បន្ថែម​ទៀតថា​ អគារ​ថែទាំ​សុខភាព​នៅទីនោះ​បាន​រង​ការ​បំផ្លាញយ៉ាងដំណំ​។

លោក Patrick Youssef នាយក​ប្រចាំ​តំបន់​ទ្វីប​អាហ្វ្រិក​របស់​គណៈកម្មាធិការ​នៃ​កាក​បាទ​ក្រហម​អន្តរជាតិ​បាន​មាន​ប្រសាសន៍ថា​ ជំនួយ​មនុស្សធម៌​នឹង​ផ្តល់​លទ្ធភាព​ដល់​ក្រុម​គ្រូពេទ្យ​ក្នុងការ​កាត់​បន្ថយ​ការ​ស្លាប់​បាត់បង់ជីវិត​របស់​ប្រជាជន​រងគ្រោះ​។ រយៈពេល​ជាច្រើន​សប្តាហ៍​មកនេះ​ ក្រុមគ្រូពេទ្យទាំងនោះ​បាន​ព្យាយាម​បំពេញ​បេសកកម្មរបស់ពួកគេ​ទាំង​ដែល​គ្មានទឹក​ និង​ភ្លើង​អគ្គិសនី​សម្រាប់​ប្រើប្រាស់​។

ក្បួនរថយន្តដឹកជំនួយបានទៅដល់អេត្យូពី នៅក្រោយពេលដែល​អង្គការសហប្រជាជាតិ​បាន​សម្តែង​ការព្រួយបារម្ភ​កាន់តែខ្លាំងឡើង ចំពោះស្ថានភាព​នៃជនភៀសខ្លួនអេរីត្រេ​ដែលមាន​ចំនួនជិត ១សែននាក់នៅតំបន់ទីហ្ក្រេ និងបានអំពាវនាវឲ្យមាន​ការចូលជួយ​ជាបន្ទាន់ដល់​ពួកគេ ព្រមទាំងប្រជាជនរងគ្រោះប្រមាណ ៦ សែននាក់ផ្សេងទៀត ដែល​​រស់​ត្រូវការ​ជំនួយស្បៀងអាហារតាំងពីមុនជម្លោះចាប់ផ្តើមទៅទៀត។

គួរជ្រាបថា​ ក្រោយ​ផ្ទុះ​ការវាយប្រយុទ្ធគ្នា​ រដ្ឋាភិបាល​អេត្យូពី​បាន​រឹតត្បិត​លើ​ការ​ធ្វើដំណើរ​ទៅ​កាន់​តំបន់​ទីហ្ក្រេ។ មួយវិញទៀត​ ការ​ដាច់​ចរន្ត​អគ្គិសនី​បាន​ធ្វើឲ្យ​មាន​ការលំបាក​ក្នុង​ការ​វាយ​តម្លៃ​ពី​ទំហំនៃ​ការរងគ្រោះ​។ ក្រុម​ផ្តល់​ជំនួយ​របស់​អ.ស.ប​ បាន​ព្រមាន​ជាច្រើន​សប្តាហ៍​អំពី​វិបត្ដិ​ខ្វះខាត​ចំណីអាហារ​ ក៏ប៉ុន្តែ​ការ​ប៉ុនប៉ង​បញ្ជូន​ជំនួយ​ទៅ​អេត្យូពី​ត្រូវ​បាន​ពន្យារ​ជាច្រើនលើកច្រើនសារ​។ យ៉ាងណាក៏ដោយ​ នៅទីបំផុតទៅ​ ក្បួន​ជំនួយ​មនុស្សធម៌​ដំបូង​របស់​អ.ស.ប​ បាន​ទៅដល់​ទីក្រុង​មេកេឡេ​នៃតំបន់​ទីហ្ក្រេ​នៅថ្ងៃសៅរ៍​ ទី១២​ ធ្នូ​ ឆ្នាំ២០២០​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI