បារាំង-ម៉ាលី

ទាហានបារាំងចំនួន ៣នាក់របស់កម្លាំងបារកានបានបាត់បង់ជីវិតនៅក្នុងប្រទេសម៉ាលី

ទាហានបារាំងចំនួន ៣នាក់របស់កម្លាំងបារកានបានបាត់បង់ជីវិតនៅក្នុងប្រទេសម៉ាលីកាល​ពី​ថ្ងៃចន្ទ ទី២៨ ធ្នូ ឆ្នាំ ២០២០
ទាហានបារាំងចំនួន ៣នាក់របស់កម្លាំងបារកានបានបាត់បង់ជីវិតនៅក្នុងប្រទេសម៉ាលីកាល​ពី​ថ្ងៃចន្ទ ទី២៨ ធ្នូ ឆ្នាំ ២០២០ © AFP/Daphné Benoît
១២ នាទី

ថ្ងៃ​ចន្ទ ទី២៨ ធ្នូ ទាហាន​បារាំង​ចំនួន ៣នាក់​របស់​កម្លាំង​បារកាន​ត្រូវ​បាន​សម្លាប់​នៅ​ក្នុង​ប្រតិបត្តិការ​ក្នុង​ប្រទេស​ម៉ាលី។ តាម​ព័ត៌មាន​របស់​វិមាន​ប្រធានាធិបតី​បារាំង​អេលីហ្សេ ការ​ស្លាប់​របស់​ទាហាន​បារាំង​ទាំង ៣នាក់​បាន​កើត​ឡើង​នៅ​ពេល​ដែល​ពួក​គេ​កំពុង​បំពេញ​បេសកម្ម​ជិះ​រថយន្ត និង​ដែល​រថយន្ត​របស់​ពួក​គេ​បាន​បរ​ជាន់​លើ​គ្រាប់មីន​ច្នៃ​ក្នុង​តំបន់​ហូមបូរី។ ប្រធានាធិបតី​បារាំង​លោក​ម៉ាក្រុង​បាន​ចូលរួម​គោរព​វិញ្ញាណក្ខន្ធ និង​ចាត់​ទុក​ការ​បាត់បង់​ជីវិត​នៅ​ក្នុង​បេសកកម្ម​របស់​ពួក​គេ​ជា​ការ​បាត់បង់​ជីវិត​ដើម្បី​ប្រទេស​បារាំង។

ផ្សាយពាណិជ្ជកម្ម

នៅ​ក្នុង​ប្រទេស​ម៉ាលី តំបន់​ហូមបុរី​ជា​តំបន់​យុទ្ធសាស្រ្ត និង​ជា​តំបន់​ដែល​កំពុង​មាន​វត្តមាន​ក្រុម​ប្រដាប់អាវុធ​ភេរវនិយម​ហៅ​កាត់ RVIM (Rassemblement pour la victoire de l'islam et des musulmans)។ តាម​ក្រសួង​ការពារជាតិ​បារាំង កម្លាំងទ័ព​បាន​ចូល​អន្តរាគមន៍​នៅ​ក្នុង​តំបន់​មួយ​ដែល​ក្រុម​ភេរវជន​វាយប្រហារ​លើ​ជនស៊ីវិល និង​គំរាមកំហែង​ល់​ស្ថិរភាព​តំបន់។ ចំណែក​វិមាន​ប្រធានាធិបតី​បារាំង​បាន​បញ្ជាក់​នៅ​ក្នុង​សេចក្តីប្រកាស​ព័ត៌មាន​មួយ​ថា ប្រធានាធិបតី​លោក​ម៉ាក្រុង​បាន​រម្លឹក​ពី​ការ​ប្តេជ្ញាចិត្ត​របស់​បារាំង​ក្នុង​ការ​បន្ត​យុទ្ធនាការ​ប្រយុទ្ធប្រឆាំង​នឹង​ភេរវនិយម។

ទន្ទឹម​គ្នា​នេះ លោក​ម៉ាក្រុង​បាន​ចូលរួម​សោកស្តាយ​យ៉ាង​ខ្លាំង​ពី​ការ​ស្លាប់​ទាហាន​បារាំង​ទាំង ៣នាក់ និង​បាន​ចូលរួម​រំលែកទុក្ខ​ជាមួយ​ក្រុមគ្រួសារ​សាច់ញាតិ រួម​ទាំង​បញ្ជាក់​ពី​ការ​ទទួលស្គាល់ និង​សាមគ្គីភាព​របស់​ជាតិ។ តាម​លោក​ម៉ាក្រុង ការ​ស្លាប់​របស់​ទាហាន​បារាំង​ទាំង ៣នាក់​នៅ​ក្នុង​បេសកកម្ម​ជា​ការ​ស្លាប់​ដើម្បី​ប្រទេស​បារាំង។ សារ​រំលែក​ទុក្ខ និង​គោរព​វិញ្ញាណក្ខន្ធ​ក៏​មាន​ពី​ប្រធានាធិបតី​ម៉ាលី​លោក Bah N’Daw ដែរ។ « ខ្ញុំ​សូម​លំឱនកាយ​គោរព​វិញ្ញាណក្ខន្ធ​ចំពោះ​ទាហាន​បារាំង​វ័យក្មេង​ទាំង ៣នាក់​ជា​វីរៈបុរស » នេះ​ជា​សារ​របស់​លោក Bah N’Daw។

សូម​បញ្ជាក់​ថា កម្លាំងទ័ព​បារាំង និង​ម៉ាលី​ទើប​បាន​បោះ​ទីតាំង​នៅ​ក្នុង​តំបន់​ហូមបូរី​សម្រាប់​បេសកកម្ម​រយៈពេល​មួយ​ខែ​ដើម្បី​បង្កើន​សមត្ថភាព​ប្រយុទ្ធ និង​ការពារ​ជនស៊ីវិល​នៅ​ក្នុង​តំបន់។ មន្រ្តី​ម្នាក់​ក្នុង​កម្លាំង​បារកាន​បាន​ប្រាប់ RFI ថា គ្រាប់មីន​ច្នៃ​ជា​ការ​គំរាមកំហែង​ចម្បង​ចំពោះ​កងទ័ព។ គួរ​រម្លឹក​ថា កងទ័ព​បារាំង​បាន​ចូលរួម​បេសកម្ម​នៅ​ក្នុង​ប្រទេស​ម៉ាលី​ជាមួយ​នឹង​កម្លាំង Serval ក្នុង​ឆ្នាំ ២០១៣ និង​កម្លាំង​បារកាន​តាំង​ពី​ឆ្នាំ ២០១៤។ គិត​មក​ទល់​ពេល​នេះ មាន​ទាហាន​បារាំង​ចំនួន ៤៧នាក់​បាន​បាត់បង់​ជីវិត​នៅ​ក្នុង​ប្រទេស​ម៉ាលី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI