តង់សានី-កូវីដ​១៩

​WHO/OMS រន្ធាន់​​ឲ្យ​រដ្ឋាភិបាល​តង់សានី ចេញ​វិធានការ​​ការពារ​ប្រជាជន ពីការ​ឆ្លង​កូវីដ​១៩

លោក John Magufuli ប្រធានាធិបតី​តង់សានី ក្នុងពេល​ថ្លែងការណ៍ឃោសនាបោះឆ្នោត ខែកក្កដា ២០២០។
លោក John Magufuli ប្រធានាធិបតី​តង់សានី ក្នុងពេល​ថ្លែងការណ៍ឃោសនាបោះឆ្នោត ខែកក្កដា ២០២០។ AP
ដោយ៖ ម៉ម ពិសី
១៦ នាទី

លោកអគ្គនាយក​​អង្គការសុខភាពពិភពលោក បានអំពាវនាវ កាលពី​ថ្ងៃអាទិត្យ​ទី​២១កុម្ភៈ ឲ្យ​រដ្ឋាភិបាល​ប្រទេសតង់សានី ត្រូវចេញវិធានការ​ជាបន្ទាន់ ដើម្បី​ការពារសុខភាព​ប្រជាជន ពីការឆ្លងរាលដាលនៃកូវីដ​១៩។ ប្រធានាធិបតី​តង់សានី តែងតែអះអាងថា​ប្រទេសលោក​មិន​សូវមានបញ្ហាឆ្លងកូវីដ​១៩ ហើយ​ថាការបួងសួង​ព្រះជាម្ចាស់ បានជួយ​ប្រទេសលោក​ឲ្យ​រួចផុត​ពី​កូវីដ​១៩។ តែយ៉ាងណា ប៉ុន្មានសប្តាហ៍ចុងក្រោយនេះ មាន​ករណីស្លាប់មនុស្ស​ជាច្រើននាក់ ដែលអាជ្ញាធរប្រទេស​នេះ អះអាងថាមានជំងឺសួតធ្ងន់ធ្ងរ។

ផ្សាយពាណិជ្ជកម្ម

យោងតាម​តួលេខផ្លូវការរបស់​រដ្ឋាភិបាល​តង់សានី នៅខែមេសាឆ្នាំ​២០២០ គឺមានករណីវិជ្ជមានកូវីដ​១៩ ចំនួន​៥០៩ករណី។ នៅខែមិថុនា ឆ្នាំ​២០២០ លោក​ John Magufuli ប្រធានាធិបតី​ប្រទេសនេះ បានប្រកាសថា ប្រទេសលោក​បានរំដោះរួមផុត​ពី​កូវីដ​១៩ហើយ ដោយ​សាតែ​ការ​បួងសួងបន់ព្រះជាម្ចាស់។

តែយ៉ាងណា ប៉ុន្មានសប្តាហ៍ចុងក្រោយនេះ មានករណីស្លាប់​មនុស្ស​ជាច្រើននាក់ ហើយ​ដែលអាជ្ញាធរប្រទេសតាហ្សង់នី អះអាងថា បណ្តាលមកពីជំងឺសួតធ្ងន់ធ្ងរ។ ក្នុងចំណោម​អ្នកស្លាប់ គឺមានមន្ត្រីជាន់ខ្ពស់២នាក់ផងដែរ គឺលោកអភិបាលរងតំបន់កោះស្វយ័ត Zanzibar និងលោក​នាយក​មុខងារ​សាធារណៈតង់សានី។ មនុស្ស​ស្និទនឹងមន្ត្រីទាំង២នាក់នេះ​ សុទ្ធតែអះអាងថាអ្នកទាំង២បានឆ្លងកូវីដ​១៩។ ក្រៅពី​នេះ ប្រជាជនតង់សានីដែលធ្វើដំណើរចេញក្រៅប្រទេសជាច្រើនាក់ ត្រូវបាន​គេធ្វើ​តេស្តរកឃើញវិជ្ជមាន​កូវីដ​១៩ផងដែរ។

លោកអគ្គនាយកអង្គការសុខភាពពិភព​លោក បាន​អំពាវនាវ ឲ្យ​ប្រមុខរដ្ឋាភិបាលប្រទេសនេះ ត្រូវឈប់ព្រងើយ​កន្តើុយ មិនទទួលយកការពិត ហើយ​ងាកមកចាត់វិធានការឲ្យ​បានតឹងតែង និងឲ្យ​បាន​រហ័សបំផុត ដើម្បីការពារសុខភាពប្រជាជនតង់សានី ក៏ដូចជាប្រជាជន​ប្រទេស​ក្បែរខាង។ លោកអគ្គនាយកអង្គការសុខភាពពិភពលោក បានអះអាងថា កាលពីដើមខែមករា លោកធ្លាប់បានផ្តល់អនុសាសន៍ទៅរដ្ឋាភិបាល​តង់សានីរួចហើយ ថាត្រូវតែរៀបចំផែន​ការសុខភាពសាធារណៈ ដើម្បីបង្អាក់ការឆ្លងរាលដាល ព្រមទាំងរៀបចំដើម្បី​បើកយុទ្ធនាការចាក់វ៉ាក់សាំង និងជាពិសេស ត្រូវផ្តល់តួលេខពិតប្រាកដ នៃការឆ្លងរាលដាល និងករណីស្លាប់​ដោយ​កូវីដ​១៩។

សូមរំលឹកថា ក្រៅពីបាន​និយាយ​មើលស្រាលជំងឺកូវីដ​១៩ លោកប្រធានាធិតបី​តង់សានី ធ្លាប់បាននិយាយ​កាលពីខែមករា ថាវ៉ាក់សាំងប្រឆាំងកូវីដ​១៩ អាចបង្កគ្រោះថ្នាក់។ តែយ៉ាងណា នៅថ្ងៃអាទិត្យ​ទី​២១កុម្ភៈ លោកប្រធានាធិបតី​តង់សានី បានទទួលស្គាល់ថា សាមជិកក្រុមគ្រួសារលោក និងមន្ត្រីក្រោមឱវាទរបស់លោកច្រើននាក់បានឆ្លងកូវីដ​១៩។ លោក​បាន​និយាយ​ថា រដ្ឋាភិបាល​តង់សានី នឹងមិនចាត់វិធានការបិទខ្ទប់ប្រទេស ឬហាមឃាត់ការធ្វើដំណើរទេ​។

ប្រធានាធិបតីរូបនេះ បន្ថែមថា អ្វីដែល​ប្រជាជនតង់សានីត្រូវធ្វើ គឺត្រូវ​ជឿលើព្រះយេស៊ូ ហើយ​ខំប្រឹង​បន់ស្រន់ព្រះតទៅទៀត ដើម្បីយកឈ្នះ​កូវីដ១៩។ ទន្ទឹមនឹងនេះ លោក​បញ្ជាក់ថា រដ្ឋាភិបាល​​លោក​​ មិន​ហាមឃាត់មិនឲ្យ​ពាក់ម៉ាសទេ បើប្រជាជនចង់ពាក់ក៏ពាក់ចុះ តែត្រូវ​រើសម៉ាស ដែល​​មាន​គុណភាព​ល្អ​ ទទួល​ស្គាល់ដោយ​ក្រសួងសុខាភិបាល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI