អ្នកជំនាញ​WHOថា មិនទាន់​​មាន​ថ្នាំ​ និងវ៉ាក់សាំង ប្រឆាំងនឹងមេរោគ Covid-19

បញ្ហាដែលកំពុងតែចោទនាពេលនេះ គឺមិនមែនត្រឹមតែថ្នាំព្យាបាលទេ តែយើងក៏កំពុងតែពិចារណា អំពីថ្នាំវ៉ាក់សាំងការពារដែរ។ សម្រាប់ពេលនេះ នៅមិនទាន់មានថ្នាំណា ដែលអាចព្យាបាល សម្លាប់មេរោគនេះបានដោយប្រសិទ្ធភាពឡើយ។ ក៏ប៉ុន្តែ មានការព្យាយាមសាកល្បង ប្រើថ្នាំផ្សេងៗគ្នា។ ឧទាហរណ៍ ការសាកប្រើថ្នាំ Chloronavir និងថ្នាំសម្លាប់មេរោគធម្មតា ច្រើនប្រភេទទៀត។ ពួកយើងទាំងអស់គ្នាជាអ្នកជំនាញ បានចែករំលែកបទពិសោធន៍គ្នា ទៅវិញទៅមក ជុំវិញការសាកល្បងទាំងអស់នេះ។ចំណែករឿងថ្នាំវ៉ាក់សាំងវិញ មិនមែនឆាប់ទេ គឺគេត្រូវការពេល យ៉ាងហោច១ឆ្នាំកន្លះឯនោះ។ ក៏ប៉ុន្តែ បើយើងទាំងអស់គ្នា សហការគ្នា ប្រឹងប្រែងទាំងអស់គ្នា វានឹងអាចសម្រេចក្នុងពេលឆាប់ជាងនេះ។ ហេតុដូច្នេះហើយ បានជាការចែករំលែកដំណឹង ឬទិន្នន័យគ្នា ជារឿងសំខាន់ខ្លាំងណាស់ ជាពិសេស ជាមួយនឹងប្រទេសចិន ព្រោះថាកន្លងមកនេះ អ្នកជំនាញចិន គឺជាអ្នកបានដកពិសោធន៍ បានច្រើនជាងគេ ស្តីពីការវិវឌ្ឍន៍នៃមេរោគ ព្រមទាំងការព្យាបាលអ្នកជំងឺដ៏ច្រើន ដែលឆ្លងមេរោគនេះនៅចិន។