ស្វីស និង​ការ​​​ទាក់ទាញធនធាន​បញ្ញា

សំឡេង ០៣:២៦
ស្វីស ស្ថិត ក្នុងចំណោមប្រទេសកំពូល ដែលអាចមានលទ្ធភាពទាក់ទាញ អភិវឌ្ឍ និងរក្សាធនធានមនុស្ស។
ស្វីស ស្ថិត ក្នុងចំណោមប្រទេសកំពូល ដែលអាចមានលទ្ធភាពទាក់ទាញ អភិវឌ្ឍ និងរក្សាធនធានមនុស្ស។ © Serilo

​ក្នុងចំណោមប្រទេសទាំងអស់លើពិភពលោក ស្វីស តែងតែបន្តស្ថិត ក្នុងចំណោមប្រទេសកំពូល ដែលអាចមានលទ្ធភាពទាក់ទាញ អភិវឌ្ឍ និងរក្សាធនធានបញ្ញា ឬសំដៅដល់ បុគ្គលិកដែលមានជំនាញបច្ចេកទេសខ្ពស់ៗ ពីគ្រប់ទិសទី ពាសពេញពិភពលោក។ តើមានកត្តាអ្វីខ្លះដែលប្រទេសនេះអាចធ្វើបាន?

ផ្សាយពាណិជ្ជកម្ម

ដើម្បីបង្កើនភាពវ័យឆ្លាតជាមធ្យម ក្នុង​​ប្រជាជាតិមួយ គេអាចមានជម្រើសល្អ​ពីរ។ ទីមួយ ​បណ្ដុះបណ្តាលមនុស្សដែលមានស្រាប់ក្នុងសង្គម តែ​ត្រូវចំណាយពេល​យូរ អាច​​រហូត​ដល់​រាប់ទសវត្សរ៍ និង​ទីពីរ គេ​អាច​ពិចារណា​ បញ្ចូលមនុស្សថ្មី តែត្រូវប្រឈមនឹងភាពរើសអើងរបស់ម្ចាស់​​ស្រុក។ ទោះ​ជា​យ៉ាង​ណា គេអាចបញ្ចូលអ្នកចំណូលថ្មីបាន តែត្រូវប្រាកដថា គេអាចបំប្លែងពួកគេឱ្យដូច ម្ចាស់ស្រុក។

ជារៀង​រាល់​ឆ្នាំ សាលា​ពាណិជ្ជកម្ម IMD ដែល​មានទីតាំងនៅប្រទេសស្វីស និងសិង្ហបុរី​ បាន​ធ្វើ​ការ​ស្ទង់មតិ នៅ​ប្រទេស​​ទាំង​៦៣​ ដែល​មាន​សេដ្ឋកិច្ច​រីកចម្រើន​ជាង​គេ​​ លើ​ពិភពលោក ដើម្បី​វាយ​តម្លៃ​​លើ​កត្តា​បី​សំខាន់ ៖

១) ការវិនិយោគ និងការអភិវឌ្ឍ 

២) ការ​អំពាវ​នាវ

៣) ការត្រៀមខ្លួនសម្រាប់​ទទួល​ធនធាន​បញ្ញា។

ចំណាត់​ថ្នាក់​របស់​ប្រទេស​ទាំង​នោះ កំណត់ដោយភាពជោគជ័យ នៅក្នុងវិស័យផ្សេងៗ ដែល​ទេពកោសល្យ​របស់​មនុស្ស​ម្នាក់​ជាប់​ពាក់ព័ន្ធ ដូចជា ការអប់រំ ការបណ្តុះបណ្តាល ការហ្វឹកហាត់ជំនាញភាសា គុណភាពជីវិត ប្រាក់​ឈ្នួល​ និងអត្រាពន្ធ។

ប្រទេសស្វីស​ស្ថិត​នៅ​លើ​កំពូល​តារាង បួន​ឆ្នាំ​ក្រោយ​ជាប់​គ្នា​។ ថ្វីបើ​ការ​ចំណាយ​លើ​ស្ដង់​ដារ​រស់​នៅ​មាន​តម្លៃ​ខ្ពស់ ក៏ប្រទេសស្វ៊ីស​​ឈរ​លេខ​មួយ សម្រាប់​ការ​អំពាវ​នាវ និង​ការត្រៀមខ្លួន ហើយ​ឈរ​លេខ​បួន សម្រាប់​ ការវិនិយោគ និងការអភិវឌ្ឍ។

ប្រទេស​នៅ​អឺរ៉ុប​​ប៉ែក​ខាង​ជើង ​រួម​មាន ដាណឺម៉ាក ន័រវែស ហ្វាំងឡង់ និងស៊ុយអែត​ ឈរ​លំដាប់​កំពូ​ល​ក្រោយ​ប្រទេស​ស្វីស ដោយ​ប្រទេស​ទាំង​នេះ​មាន​ចំណាត់​ថ្នាក់​យ៉ាង​ល្អបំផុត​ លើ ការ​ត្រៀម​ខ្លួន រួមជាមួយការបង្កើនចំណាយសាធារណៈលើវិស័យអប់រំ ដែល​បានកើនឡើងនៅប៉ុន្មានឆ្នាំចុងក្រោយនេះ។ កាណាដា ជាប្រទេសតែមួយគត់ ដែលមិនមែនជាប្រទេសអឺរ៉ុប មាន​ចំណាត់ថ្នាក់ស្ថិត​ក្នុង​ចំណោម​ប្រទេស​កំពូល​ទាំង​ដប់​។ នៅតំបន់​អាស៊ី សិង្ហបុរី និងហុងកុង ក៏​ធ្វើ​បាន​យ៉ាង​ល្អ​ដែរ ក្នុង​ការ​ទាក់​ទាញ​ធនធាន​បញ្ញា​ក្នុង​ពិភពលោក ដោយ​សារ​ជា​ដែន​ដី​ពោរពេញ​ដោយ​ភាព​រស់​រវើក​នៃ​ពាណិជ្ជកម្ម​។

របាយ​ការណ៍ ក៏​បាន​បង្ហាញ​ដែរ​ថា សមត្ថភាពរបស់និយោជក ​ក្នុងការទាក់ទាញ អភិវឌ្ឍ និង​រក្សា​បុគ្គលិក​ដែល​មាន​ជំនាញ​ខ្ពស់ ឬ​ធនធាន​បញ្ញា កាន់​តែ​មានសារៈសំខាន់ សម្រាប់​វឌ្ឍនភាព​របស់​ស្ថាប័ន​មួយ​​​ ទោះ​ជា​ក្នុង​វិស័យ​សាធារណៈ​ ឬ​ឯកជន។ ដោយ​សារ​ ការ​រីកចម្រើន​នៃ​​បច្ចេកវិទ្យា ក្នុង​វិស័យផ្សេង​ៗ​ ដូចជា បញ្ញាសិប្បនិម្មិត និងគ្រឿង​យន្ត ពិភពលោក​ ក្នុងបដិវត្តន៍​ឧស្សាហកម្មទំនើប​ ​កំពុងផ្លាស់ប្តូរការងារដែលយើងកំពុង​ធ្វើ និងរបៀប​​ដែល​យើងកំពុងអនុវត្ត។

ដូច្នេះ នៅ​ថ្ងៃ​ខាង​មុខ នៅ​ពេលដែល​​កម្លាំង​ពលកម្ម​មនុស្ស​ ជំនួស​ដោយ ​ម៉ាស៊ីន នោះ​វា​នឹង​មាន​ន័យ​ថា ស្ថាប័ន និង​អ្នក​ដឹកនាំ នឹងចាំបាច់​ត្រូវ​ព្យាយាម​ទាក់​ទាញ​ធនធាន​បញ្ញា ដែល​មាន​ជំនាញ​ដូចជា ការ​វិភាគស៊ីជម្រៅ ការរចនាបច្ចេកទេស និង​ ការបន្ត​រៀនសូត្រយ៉ាងសកម្ម ពេញមួយជីវិត។

សរុប​ជារួម ការ​បរាជ័យ​​លើ​ការវិនិយោគ ពាក់ព័ន្ធនឹង​ការបណ្តុះបណ្តាល ការបង្កើនជំនាញ និងការ​ទាក់​ទាញ​ធនធាន​បញ្ញា​ នឹង​ក្លាយ​ជា​គុណវិបត្តិមួយ សម្រាប់​ទាំង​បុគ្គលិក និង​ស្ថាប័ន​​ទាំង​មូល​ ដែលអាច​រុញ​ច្រាន​ឱ្យ​ពួកគេបាត់បង់​ភាព​ប្រកួត​ប្រជែង​យ៉ាង​ឆាប់​រហ័ស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI