អានតួអត្ថបទ
បារាំង-កូវីដ-១៩

កូវីដ-១៩៖បារាំងផ្តើមបន្ធូរបន្ថយការបិទខ្ទប់ប្រទេសចាប់ពីថ្ងៃទី១១ ឧសភា

លោកគ្រីស្តូហ្វ កាស្តាណ៊ែរ រដ្ឋមន្រ្តីក្រសួងមហាផ្ទៃបារាំង
លោកគ្រីស្តូហ្វ កាស្តាណ៊ែរ រដ្ឋមន្រ្តីក្រសួងមហាផ្ទៃបារាំង © AFP
១៣ នាទី

ថ្ងៃ​ចន្ទ ទី១១ ឧសភា​ជា​ថ្ងៃ​ដែល​បារាំង​ចាប់​ផ្តើម​លើក​ការ​បិទខ្ទប់​ប្រទេស​បណ្តើរៗ បន្ទាប់​ពី​បាន​បិទខ្ទប់​ទាំង​ស្រុង​តាំង​ពី​ថ្ងៃទី១៦ មីនា​ដើម្បី​ទប់ស្កាត់​ការ​ឆ្លង​រាលដាល​នៃ​ជំងឺ​កូវីដ-១៩។ ចាប់​ពី​ថ្ងៃ​ចន្ទ ទី១១ ឧសភា​នេះ​ទៅ ពលរដ្ឋ​អាច​ធ្វើ​ដំណើរ​ដោយ​សេរី​ក្នុង​រង្វង់​តិច​ជាង ១០០គីឡូម៉ែត្រ​ពី​ផ្ទះ​ដោយ​មិន​ចាំ​បាច់​មាន​លិខិត​បញ្ជាក់ សាលារៀន​មួយ​ចំនួន​បើក​ទ្វារ​ទទួល​សិស្ស​ឡើង​វិញ ផ្សារទំនើប​ខ្នាត​តូច និង​ហាង​លក់​ទំនិញ​អាច​បើក​ទ្វារ​ជា​ថ្មី។ តែ​ភោជនីយដ្ឋាន ហាង​លក់​ភេសជ្ជៈ និង​ផ្សារទំនើប​ដែល​មាន​ផ្ទៃដី​លើស​ពី ៤០ ០០០ម៉ែត្រការ៉េ​នៅ​មិន​ទាន់​អាច​បើក​ទ្វារ​ឡើង​វិញ​បាន​ទេ។ ម្យ៉ាង​ទៀត ការ​ផ្តើម​បើក​ប្រទេស​ឡើង​វិញ​បណ្តើរៗ​នេះ​ត្រូវ​គោរព​លក្ខខណ្ឌ​មួយ​ចំនួន ដូច​យ៉ាង​រក្សា​គម្លាត​សុវត្ថិភាព ឬ​ពាក់ម៉ាស​ជា​ចាំ​បាច់​សម្រាប់​អ្នក​ធ្វើ​ដំណើរ​តាម​មធ្យោបាយ​ដឹកជញ្ជូន​សាធារណៈ។ លោក​គ្រីស្តូហ្វ កាស្តាណ៊ែរ រដ្ឋមន្រ្តី​ក្រសួង​មហាផ្ទៃ​បារាំង​បាន​បញ្ជាក់​ថា គេ​មិន​ត្រូវ​ចាត់​ទុក​ការ​បន្ធូរបន្ធយ​នេះ​ជា​ការ​រំដោះ​ប្រទេស​ដែល​ពលរដ្ឋ​អាច​ធ្វើ​អ្វីៗ​ដូច​ពេល​មុន​ផ្ទុះ​វិបត្តិ​កូវីដ-១៩ ឡើយ។ តាម​លោក​គ្រីស្តូហ្វ កាស្តាណ៊ែរ ជោគជ័យ​នៃ​ការ​បើក​ប្រទេស​បណ្តើរៗ​ឡើង​វិញ​អាស្រ័យ​ទាំង​ស្រុង​លើ​កិរិយា មារយាទ​របស់​ពលរដ្ឋ​បារាំង​គ្រប់​រូប ពោល​មិនមែន​អាស្រ័យ​លើ​ការ​ពាក់​ម៉ាស និង​ការ​ធ្វើ​តេស្តិ៍​រក​ជំងឺ​កូវីដ-១៩ ទេ។

ផ្សាយពាណិជ្ជកម្ម

« វា​មិនមែន​ជា​ការ​រំដោះ​មួយ​ដើម្បី​ធ្វើ​អ្វីៗ​ដូច​ដែល​យើង​ចង់​ធ្វើ​ដូច​ពី​ពេល​មុន​ផ្ទុះ​វិបត្តិ​កូវីដ-១៩ ទេ។ អ្វីៗ​លែង​មាន​ដូច​មុន​ទៀត​ឡើយ និង​ដែល​ចាប់​ពី​ពេល​នេះ​ត​ទៅ គេ​ត្រូវ​ថ្លឹងថ្លែង​ឲ្យ​បាន​ច្បាស់លាស់ និង​ត្រឹមត្រូវ​ពី​ភាព​ចាំ​បាច់​នៃ​ការ​ចាប់​ផ្តើម​ឡើង​វិញ​រវាង​ជីវិត​ធម្មតា គ្រួសារ សេដ្ឋកិច្ច វប្បធម៌ សុខភាព និង​សង្គម។

បន្ទាប់​មក ភាព​ចាំបាច់​នៃ​ការ​គោរព​តាម​គ្រប់​វិធានការ​បង្ការ​ដែល​នឹង​​អាច​ទប់ស្កាត់​ការ​ឆ្លងរាលដាល​ជំងឺ​កូវីដ-១៩ ឡើង​វិញ ចូលរួម​ជួយ​ការពារ​ពលរដ្ឋ​បារាំង​ទូទៅ ការពារ​ក្រុម​គ្រួសារ កូនៗ​ខ្លួន​ឯង និង​ការពារ​អ្នក​រួម​ការងារ​ទាំង​អស់។ គឺ​កាយវិការ​ទាំង​អស់​នេះ​ហើយ​ដែល​យើង​ចង់​ឲ្យ​ពលរដ្ឋ​បារាំង​គ្រប់​រូប​ចូលរួម​ឲ្យ​បាន​ត្រឹមត្រូវ។

ជោគជ័យ​នៃ​ការ​បើក​ប្រទេស​ឡើង​វិញ​មិន​អាស្រ័យ​លើ​ការ​ពាក់​ម៉ាស និង​ការ​ធ្វើ​តេស្តិ៍​រក​កូវីដ-១៩ ទេ តែ​វា​អាស្រ័យ​លើ​ការ​គោរព​តាម​វិធានការ​ការពារ​ត្រឹមត្រូវ និង​ការ​គោរព​កិរិយា មារយាទ​ល្អ។ ការ​ធ្វើ​តេស្តិ៍ និង​ម៉ាស​ជា​ឧបករណ៍​សម្រាប់​ការពារ​ពលរដ្ឋ​បារាំង »

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ