ព្រឹត្តិការណ៍អន្តរជាតិប្រចាំថ្ងៃ

តើក្រុម​​អ្នក​ប្រឆាំងនឹងការ​ពាក់​​ម៉ាសនៅ​បារាំង​ ជា​នរណា ?

ចលនា​ប្រឆាំង​នឹង​ការ​ពាក់ម៉ាស​នៅ​បារាំង​សកម្មខ្លាំង​តាម​ប្រព័ន្ធ សង្គម
ចលនា​ប្រឆាំង​នឹង​ការ​ពាក់ម៉ាស​នៅ​បារាំង​សកម្មខ្លាំង​តាម​ប្រព័ន្ធ សង្គម AFP

​ចលនា​ប្រឆាំង​នឹង​ការ​ពាក់​ម៉ាស ដែល​សកម្មខ្លាំង​នៅ​អាល្លឺម៉ង់ ជាពិសេស​សហរដ្ឋ​អាមេរិក​ កំពុង​​ចាប់​ផ្តើម​លេច​មុខ​ ចម្រើន​កម្លាំង​ជា​បណ្តើរៗ​​ នៅ​​បារាំង ...មូលនិធិ​បារាំងមួយ​ទើប​បាន​ចេញ​​ផ្សាយ​​លទ្ធផល​នៃ​ការ​សិក្សា​អំពី​ចលនា​ប្រឆាំង​នឹង​ការ​ពាក់ម៉ាស​ នៅ​ថ្ងៃ​ចន្ទ​ទី ៧​ កញ្ញា​២០២០​នេះ។

ផ្សាយពាណិជ្ជកម្ម

ចលនា​ប្រឆាំង​នឹង​ការ​ពាក់​ម៉ាស​នៅ​បារាំង នៅ​មិន​ទាន់​មាន​ទំហំធំ និង​ខ្លាំងក្លា ​ដូច​នៅ​សហរដ្ឋ​អាមេរិក អាល្លឺម៉ង់ ឬ​អង់គ្លេស​ទេ​។ កាលពី​ចុង​ខែ​សីហា គេ​សង្កេត​ឃើញចលនា​​ប្រមូល​គ្នា​​​​តែ​មួយ​ក្តាប់​តូច​ប៉ុណ្ណោះ ​ ​ចុះ​ថ្នល់​ធ្វើ​បាតុកម្ម​​នៅប៉ារីស។ ប៉ុន្តែ​ចលនា​នេះ​សកម្ម និង​ចាប់​គ្រហឹមខ្លាំង ​នៅ​លើ​ប្រព័ន្ធ​សង្គម ដោយ​ប្រមូល​សមាជិក​បាន​ប្រមាណ​ជាង ៤៧០០​នាក់តាំង​ពី​ខែ​ឧសភា​មក។

បើ​តាម​ការ​សិក្សា​របស់​មូលនិធិ​ Jean Jaures ដែលជាបណ្តុំ​​ក្រុម​​អ្នក​ស្រាវជ្រាវ​​ផ្នែក​សង្គម​វិទ្យា ចលនា​ប្រឆាំង​នឹង​ការ​ពាក់ម៉ាសកើត​ចេញ​ពី​ភាព​មិន​ទុក​ចិត្ត​លើ​ស្ថាប័ន​រដ្ឋ​ (រដ្ឋាភិបាល) និងកើត​ចេញ​ពី​គំនិតដែល​​យល់​​ថា​មាន​ការ​ស៊ុមគ្រលំឬ​ឃុប​ឃិត​អ្វី​មួយ​​។

មូលហេតុ​ដែល​​​ពួកគេ​លើក​ឡើង​មុន​គេ​ គឺ​ ដោយ​ពួក​គេ​គិត​ថា ម៉ាសមិន​ត្រឹម​តែ​ “​គ្មាន​ប្រយោជន៍”​ ទេ​តែ​ថែម​ទាំង​អាច បង្ក  “គ្រោះថ្នាក់”​។ ឯរោគ​រាតត្បាត​កូវីដ​១៩ ប្រហែល​ជា​ចប់​ទៅ​ហើយ ឬ​ពុំ​ដែល​កើត​មាន​ដោយ​ពិតៗ​ផង។ ជា​ចុងក្រោយ​ក្រុម​អ្នក​ប្រឆាំង​នឹង​ការ​ពាក់​ម៉ាស​យល់​ថា ការ​តម្រូវ​ឱ្យ​ពលរដ្ឋ​​ត្រូវ​ពាក់​ម៉ាស នៅ​តាម​ទី​សាធារណៈ នៅ​ទូទាំង​ប្រទេស​ និង​តាម​ផ្លូវក្នុង​ក្រុង​ ជា​ការ​បំបិទ​សេរីភាព​ប្រជាជន ជាមធ្យោបាយ​គ្រប់គ្រង​ពលរដ្ឋ​ជា​ទាសករ។

​​ហេតុផលទាំង​បួន​នេះ បញ្ច្រាស​នឹង​ការ​ពិតតាមបែប​​​​​វិទ្យាសាស្ត្រ​។ តែគេ​មិន​ចម្លែកឡើយ ព្រោះ​អ្នក​សិក្សា​សា្រវជ្រាវ​​បាន​សម្គាល់​ឃើញ​ថា​ក្រុម​អ្នក​ប្រឆាំង​នឹង​ការពាក់​ម៉ាស​នេះ​មាន​និន្នការ​តែ​មួយ​  និង​ក្នុង​គ្រប់​ប្រធានបទ​ផ្សេង​ទៀត គឺ មិន​ទុក​លើ​ស្ថាប័ន​រដ្ឋ​ មិនគោរព​និង​បត់​​តាម​បញ្ជា​ ឬ​ការ​​ដាក់​កំហិត​អ្វី​មួយ​ទេ​ និ​ងលង់​ក្នុង​ជំនឿ​ថា​មាន​ការ​ឃុប​ឃិត​ ឬ​ស៊ុម​គ្រលំ​អ្វី​មួយ​។

៩០%​នៃ​អ្នក​ប្រឆាំង​នឹង​ការ​ពាក់​ម៉ាស ​គិត​ថា​ក្រសួង​សុខាភិបាល​បារាំងមាន​​លាក់​គំនួច​ជាមួយ​ក្រុមឧស្សាហកម្ម​ឱសថ​ បិទ​បាំងការពិត​ ជុំ​វិញ​ផលមិន​ល្អ​​របស់​ថ្នាំ​បង្ការ មិន​ឱ្យ​​សាធារណជន​ដឹង។ គំនិត​បែប​នេះ​មាន​ត្រឹម​តែ​៤៣%​ប៉ុណ្ណោះ ក្នុង​ចំណោម​ប្រជាពលរដ្ឋ​ទូទៅ។ ​ ​លទ្ធផល​សិក្សា​បាន​បង្ហាញ​ទៀត​ថា ​ក្រុម​អ្នក​ប្រឆាំង​នឹង​ការ​ពាក់​ម៉ាស​តែ​២%​ មាន​ជំនឿ​លើ​ប្រធានាធិបតី​ម៉ាក្រុង ហើយ​សូម្បី​តែ​សេវា​មន្ទីរ​ពេទ្យដែល​ពលរដ្ឋ​បារាំង​ដល់​ទៅ​ជាង​៨២%​ ជឿ​ទុក​ចិត្ត​បំផុត​នោះ ក៏​បាន​ទទួល​ការ​គាំទ្រ​និងការ​​ទុកចិត្ត​ពី​ក្រុម​អ្នក​ប្រឆាំង​ម៉ាស​តែ​៥៣%​ប៉ុណ្ណោះ។ ក្នុង​វិស័យ​នយោបាយ ៤០%​នៃ​សកម្មជន​ក្រុម​នេះ​មិន​ចូល​រួម​បោះឆ្នោត​ទេ។

​មិនទុក​ចិត្ត​ និង​ជឿ​ថា​មាន​ការ​រៀប​ចំផែនការ​ ជានិន្នាការ​ពីរដល់​ជាប់​​ជា​ប្រពៃណី​របស់​ពលរដ្ឋ​​ មួយ​ក្រុម​ ក្នុង​ស្រទាប់​មធ្យម​ ក្នុង​វ័យ​មិន​សូវ​ក្មេង ដែល​ធ្លាប់​មាន​ចែង​ក្នុង​ប្រវត្តិ​សិក្សា​របស់​អ្នក​វិទ្យាសាស្ត្រ​ទៅហើយ​។

គ្រាន់​តែ​ក្នុង​ករណី​នេះ សកម្មជន​នៃចលនា​ប្រឆាំង​នឹង​ម៉ាស ភាគ​ច្រើន​ជា​ស្ត្រី មាន​អាយុ​ជា​មធ្យម​ក្នុង​វ័យ​ខ្ទង់​៥០​ឆ្នាំ និង​​សុទ្ធ​សឹង​ជា​ជន​ដែល​មានកំរិត​វប្បធម៌​និ​ងការ​សិក្សា​ខ្ពស់។​ ខ្ពស់​ជា​ងកំរិត​សិក្សា​របស់​​ពលរដ្ឋ​ទូទៅ ជាមធ្យម​ (ចូល​​មហាវិទ្យាល័យបាន​ពីរ​ឆ្នាំ​)​ទៀត។​

មាន​​ជីវភាព​និង​​ស្រទាប់វណ្ណៈ​ក្នុង​​សង្គមវិញ​ កាន់​​ខ្ពស់ ​ជំហរ​ប្រឆាំង​នឹង​ការ​ពាក់​ម៉ាសកាន់​តែ​ច្រើន។​  ​ក្នុង​ជួរ​បញ្ញាវន្ត​ និង​អ្នក​មានអាជីព​​​​ជាន់ខ្ពស់​ ​ ដែល​តំណាង​ឱ្យ​១៨%​នៃ​ប្រជាពលរដ្ឋ​បារាំង​សរុប​នោះ -៣៦%​ជា​អ្នក​ប្រឆាំង​នឹង​ការ​ពាក់​ម៉ាស់។ បើ​នៅ​ក្នុង​ជួរ​បុគ្គលិក​កម្មករ​​សាមញ្ញ​ (ដែល​មាន​ចំនួន​ដល់​ទៅ​៥០%នៃ​ប្រជាជន​សកម្ម​)​ វិញ​ មាន​២៣%​ជា​អ្នក​ប្រឆាំង​នឹង​ការ​ពាក់​ម៉ាស។

ការសិក្សា​បាន​បង្ហាញ​ថា ក្រុមប្រឆាំង​នឹង​កា​រពាក់ម៉ាស់ ជា​ពលរដ្ឋ​​ដែល​មាន​ចរន្ត​គំនិប​បែប​​សេរីនិយម​ខ្លាំង ដែល​ពុំ​សូវ​មាន​ច្រើន​ទេ​នៅ​ប្រទេស​​បារាំង​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI