អានតួអត្ថបទ

ការ៉ាប៉ាក់៖ អាមេនី សុំជំនួយពីរុស្ស៊ី ហើយម៉ូស្កូឆ្លើយភ្លាមថាព្រមជួយតាមការចាំបាច់

នាយករដ្ឋមន្ត្រីអាមេនី​ចុះ​លើកទឹក​ចិត្ត​យោធា ក្នុងខែតុលានេះ។
នាយករដ្ឋមន្ត្រីអាមេនី​ចុះ​លើកទឹក​ចិត្ត​យោធា ក្នុងខែតុលានេះ។ © Tigran Mehrabyan, Armenian Prime Minister Press Service/PAN Phot
ដោយ៖ ហេង ឧត្តម
១៥ នាទី

សំណុំរឿងអូការ៉ាប៉ាក់ ដែល​ ប្រទេស​អាមេនី ​កំពុង​មាន​ជម្លោះ​ទល់​ដែន​ ជាមួយ​ អាស៊ែបៃហ្សង់,   នៅ​ថ្ងៃ​សៅរ៍ ទី៣១តុលា នាយករដ្ឋមន្ត្រីអាមេនី បានប្រ​កាស​សុំជំនួយអន្តរាគមន៍ពីរុស្ស៊ី និង​ជាពិសេស​សុំ​អន្តរាគម​ន៍ ពី​ប្រធានាធិបតី​ ពូទីន ផ្ទាល់​តែម្តង ដើម្បី​ឱ្យខ្លួន​អាច​ធានា​សុវត្ថិភាព​និងសន្តិសុខ​របស់​ប្រទេសជាតិ​។  ក្រសួង​ការ​បរទេស​រុស្ស៊ី បាន​ឆ្លើយ​តប ភ្លាមៗ ថា ក្រុងម៉ូស្កូ ព្រមជួយ អាមេនី តាមការចាំបាច់។ 

ផ្សាយពាណិជ្ជកម្ម

នាយករដ្ឋមន្ត្រីអាមេនី បាន​​ស្នើ​សុំ​ប្រមុខរដ្ឋរុស្ស៊ី ដើម្បី​ប្រឹក្សា​យោបល់ជា​​បន្ទាន់​ ក្នុង​វត្តុបំណង ​​ឈាន​ទៅ​កំណត់​ពីប្រភព​​ជំនួយអន្តរាគមន៍ ​និង​បរិមាណ​នៃ​ជំនួយនោះ​ ដែល​ រដ្ឋសហព័ន្ធ​រុស្ស៊ី​ នឹង​អាច​ផ្តល់​ឱ្យ​ អាមេនី ដើម្បីឱ្យ​ប្រទេស​មួយ​នេះ អាច​ធានាបាន​ នូវ​​សន្តិសុខ​ស្រុក​ទេស​របស់ខ្លួន។ នេះជា​ខ្លឹម​សារ ក្នុងសេចក្តីថ្លែង​ការណ៍​ ចេញ​យ៉ាង​បន្ទាន់​មួយ របស់​ក្រសួង​កិច្ចការបរទេស​រុស្ស៊ី។ ជាការ​បញ្ជាក់​ភ្លាមៗតែម្តង ក្រោយពី​នាយករដ្ឋមន្ត្រី Nikol Pachinian និងក្រសួង​ការបរទេស​អាមេនី ប្រកាស​បោះដៃ​សុំ​ជំនួយ​ពី​រដ្ឋបាល​ក្រុង​ម៉ូស្កូ សហព័ន្ធ​រុស្ស៊ី​។ រុស្ស៊ី ដែល​កំពុងតែ​មាន​មូលដ្ឋាន​យោធា​ប្រចាំ​នៅ​លើទឹក​ដី អាមេនី ស្រេច​ស្រាប់​។

ក្នុងសំណើ​សុំ​ជួយ​របស់​អាមេនី អាមេនី ក៏បានចោទ អាស៊ែបៃហ្សង់ ថា​ជាអ្នកបង្កហេតុ និងបានថ្កោលទោសប្រទេស​ តួកគី ដែលជាខ្នងបង្អែករបស់ អាស៊ែបៃហ្សង់។ ហើយ​ការ​ដែល​ថ្នាក់ដឹកនាំ​អាមេនី​ ទាំង​នាយករដ្ឋមន្ត្រី និងទាំង​ក្រសួង​ការបទេស សុំ​ជំនួយ​ពី​រុស្ស៊ី ក៏​ពី​ព្រោះ​តែ​ការ​ចរចា ​ចុះបទ​ឈប់​បាញ់​គ្នា មិន​បាន​សម្រេច។ ការចរចាគ្នា​ជាថ្មី​នេះ ជាគម្រប់​លើកទី​៣​ បាន​ធ្វើ​ឡើង​នៅ​ក្រុង​ហ្សឺណែវ​ប្រទេស​ស្វីស កាលពីថ្ងៃទី​៣០តុលា តែ​គ្មាន​លទ្ធផល​ល្អ ដូច​តាម​ការចង់​បាន​ ​របស់​ក្រុម​ប្រទេស​អឺរ៉ុប ​និងសហរដ្ឋ​អាមេរិក​នោះ​ទេ​​។​ អ្វីដែល​ភាគីទាំងពីរ បាន​​យល់ព្រម​គ្នានោះ គឺ​មានតិចតួចណាស់ និងផុយស្រួយ​ណាស់​ ដូច​ជា ត្រូវ​ផ្តល់បញ្ជីឈ្មោះ ​ឈ្លើយសឹក​ ទៅ​ឲ្យ​អង្គការ​កាកបាទ​ក្រហម ក្នុង​ពេល​អំឡុងពេល​១​សប្តាហ៍​ ជាដើម​។

​ជម្លោះបាញ់​បោះ ផ្លោ​ងគ្រាប់បែក រវាង ​អាស៊ែបៃហ្សង់ និងអាមេនី ប្រមាណ​ជាង​មួយ​ខែ​មកនេះ បាន​បណ្តាល​ឱ្យ​ផ្តាច់​ជីវិត​មនុស្ស​ប្រមាណ ១ ២៥០ នាក់​ ក្នុងនោះ យ៉ាងហោច ​១៣០នាក់ ជាជន​ស៊ីវិល​។ នេះបើតាម​ទីភ្នាក់​ងារព័ត៌មាន​បារាំង។ តែបើ​តាម​ប្រភព​ពីរុស្ស៊ី ដែល​ជាតួអង្គ​បងធំ​មួយ​ក្នុង​តំបន់ គឺ​ចំនួន​អ្នក​ស្លាប់ ​ក្នុង​សមរភូមិ​​បង្ហូរឈាម​ជាង​មួយ​ខែ​នេះ អាច​មាន​ដល់ ​៥ពាន់នាក់​ឯណោះ​។

អាស៊ែបៃហ្សង់ និងអាមេនី ប្រទេស​មាន​ព្រំដែន​ជាប់គ្នា​នេះ បា​នបាញ់​គ្នា​ ធ្វើ​សង្គ្រាម​យ៉ាង​ធ្ងន់ធ្ងរ​ នៅចន្លោះ​ឆ្នាំ ១៩៩១ ដល់​១៩៩៤ កាលនោះ  ស្លាប់​មនុស្ស​ អស់​ប្រហែល ​៣ម៉ឺននាក់​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ