កូវីដបង្អាក់សកម្មភាពពាណិជ្ជកម្មដឹកជញ្ជូនតាមផ្លូវទឹក ខ្លាំងជាលើកទីមួយ ប្រចាំទសវត្សរ៍
ចុះផ្សាយនៅថ្ងៃ៖
គិតចាប់តាំងពីឆ្នាំ២០០៩ នេះជាលើកទីមួយ ដែលពាណិជ្ជកម្មផ្លូវទឹកពិភពលោក មានសកម្មភាពធ្លាក់ចុះ។ ដោយហេតុវិបត្តិកូវីដ១៩ ពាណិជ្ជកម្មផ្លូវបានថយសកម្មភាព អស់៤,១%នៅឆ្នាំ២០២០។ នេះបើតាមរបាយការណ៍របស់សន្និសីទអង្គការសហប្រជាជាតិស្តីពីពាណិជ្ជកម្មនិងអភិវឌ្ឍន៍ ចេញផ្សាយជាសាធារណៈនៅថ្ងៃព្រហស្បតិ៍ទី ១២វិច្ឆិកា ២០២០។
“ជំងឺរាតត្បាតកូវីដ១៩ បានបង្កផលប៉ះទង្គិចយ៉ាងខ្លាំងដល់ប្រព័ន្ធផ្គត់ផ្គង់ស្បៀងអាហារ ប្រព័ន្ធដឹកជញ្ជូនផ្លូវទឹកនិងកំពង់ផែ។ ទំហំនៃការដឹកជញ្ជូនផ្លូវទឹកធ្លាក់ចុះបែបនេះ ជាប្រថ្នូលមិនល្អទេសម្រាប់កំណើនសេដ្ឋកិច្ច”។ នេះបើតាមខ្លឹមសារនៃរបាយការណ៍ប្រចាំឆ្នាំរបស់សន្និសីទអង្គការសហប្រជាជាតិស្តីពីពាណិជ្ជកម្មនិងអភិវឌ្ឍន៍ ហៅកាត់ថា (Cnuced) ដែលជាស្ថាប័នមួយរបស់អង្គការសហប្រជាជាតិមានទីស្នាក់ការនៅក្រុងហ្សឺណែវ ប្រទេសស្វីស។
អង្គការបានរំលឹកថា ពាណិជ្ជកម្មផ្លូវទឹកធ្លាប់រងផលប៉ះពាល់ធ្ងន់ធ្ងរម្តង នៅឆ្នាំ២០០៩ បន្ទាប់ពីមានវិបត្តិហិរញ្ញវត្ថុអន្តរជាតិ ដោយមានសកម្មភាពធ្លាក់ចុះដល់ទៅ ៤,៩៨%។ សម្រាប់ឆ្នាំ២០២០នេះ ដោយហេតុវិបត្តិកូវីដ សកម្មភាពដឹកជញ្ជូនបានចុះខ្លាំងដែរ (៤,១%) តែបើប្រៀបទៅនឹងវិស័យដឹកជញ្ជូនផ្លូវគោក-ផ្លូវអាកាស ពាណិជ្ជកម្មផ្លូវទឹក នៅមានជាសុខភាពល្អជាងគេ។ ប៉ុន្តែទស្សនវិស័យសម្រាប់ឆ្នាំ២០២១ មិនជាក់លាក់ទេ បើទោះបី ក្រុមហ៊ុនឱសថអាមេរិក Pfizerនិងអាល្លឺម៉ង់ BioNTech ប្រកាសជូនដំណឹងល្អ ស្តីអំពីការប្រសិទ្ធភាពនៃថ្នាំបង្ការប្រឆាំងកូវីដ១៩ ក៏ដោយ។
ម្យ៉ាងវិញទៀត បើតាមCnuced ពាណិជ្ជកម្មផ្លូវទឹកធ្លាក់ចុះនៅឆ្នាំ២០២០នេះ ជាលទ្ធផលបន្តពីឆ្នាំ២០១៩។ ឆ្នាំ ដែលពាណិជ្ជកម្មពិភពលោកស្គាល់ភាពអាប់អួរខ្លាំង និងគ្មានភាពស្វាហាប់ស្រាប់ផង ព្រោះរវល់តែឡើងសម្ពាធតានតឹង រវាងអាមេរិកនិងចិន។
ប៉ុន្តែការប្រយុទ្ធប្រឆាំងនឹងការប្រែប្រួលអាកាសធាតុក្នុងវិស័យដឹកជញ្ជូនផ្លូវទឹក មិនត្រូវបានរំខានដោយកូវីដ១៩ទេ។ ផែនការសង្គ្រោះពាណិជ្ជកម្មផ្លូវទឹកក្រោយវិបត្តិកូវីដ១៩ មានបញ្ចូលដំណោះស្រាយបរិស្ថាននិងជានិរន្តសម្រាប់អាកាសធាតុ។ នេះបើតាមសេចក្តីថ្លែងការណ៍របស់ Cnuced ដដែល។ ជាក់ស្តែង ចាប់ពីឆ្នាំនេះទៅ នាវាដឹកទំនិញអាចប្រើប្រេងឥន្ធនៈបញ្ចេញឧស្ម័នពុល យ៉ាងច្រើនបំផុត ០,៥% ទល់នឹង៣,៥% កាលពីមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ