វេទិកាសន្តិភាពក្រុងប៉ារីសប្រមូល បានថវិកា៥០០លានដុល្លារបន្ថែមសម្រាប់ទិញថ្នាំវ៉ាក់សាំង
ចុះផ្សាយនៅថ្ងៃ៖
វេទិកាសន្តិភាពលើកទីបី ដែលចាប់បើកពីថ្ងៃទី ១១-១៣ វិច្ឆិកា ២០២០ នៅទីក្រុងប៉ារីស ប្រព្រឹត្តទៅក្នុងបរិបទប្លែកពីសព្វមួយដង។ ដោយហេតុកូរ៉ូណាវីរុស គ្រប់ជំនួបត្រូវធ្វើឡើងតាមរយៈវីដេអូខុនហ្វេរិន ដើម្បីដោះស្រាយប្រធានបទសំខាន់មួយ វិបត្តិកូវីដ។ ក្នុងវេទិកាសន្តិភាព ប្រទេសជាច្រើនបានប្រកាសផ្តល់ហិវញ្ញវត្ថុ ដល់អង្គការសុខភាពពិភពលោក ចំនួន ៥០០លានដុល្លារ។ ជាទឹកប្រាក់សម្រាប់ឧបត្ថម្ភកម្មវិធីទិញ ថ្នាំវ៉ាក់សាំងកូវីដ១៩ ចែកចាយជូនដល់បណ្តាប្រទេសក្រីក្រ។
“យើងមិនអាចយកឈ្នះវីរុសកូវីដ១៩បាន ដោយមិនគិតគូរដល់មនុស្សជាតិផ្សេងទៀតបានទេ ! នេះជាប្រសាសន៍របស់លោកអេម៉ាណុយអែល ម៉ាក្រុង នៅក្នុងបទអន្តរាគមន៍ជាមួយបណ្តាប្រមុខដឹកនាំពិភពលោកជាច្រើនផ្សេង ពីវេទិកាសន្តិភាពក្រុងប៉ារីស។ លោកប្រធានាធិបតីបារាំងបានឆ្លៀតរំលឹកថា កាលពីខែមេសា២០២០ អង្គការសុខភាពពិភពលោក គាំទ្រដោយបារាំង គណៈកម្មការអឺរ៉ុប និងមូលនិធិ Bill និង Melinda Gates បានពន្លឿនបង្កើតកម្មវិធី ACT។ កម្មវិធីអន្តរជាតិដែលនឹងធានាឱ្យគ្រប់ប្រទេសក្រីក្រនៅលើពិភពលោកអាចទទួលថ្នាំបង្ការនិងការវិភាគរោគវិនិច្ឆ័យកូវីដ១៩ បានដោយស្មើភាព។
នៅក្នុងគំនិតអ្នកផ្តួចផ្តើមបង្កើតយន្តការ ការប្រយុទ្ធប្រឆាំងនឹងរោគរាតត្បាតត្រូវជាការងាររបស់គ្រប់គ្នា ហើយភាពអាត្មានិយមជាតិត្រូវទុកដោយឡែក។ ហេតុដូច្នេះហើយបានជា ពីពេលនេះដល់ដំណាច់ឆ្នាំ២០២១ កម្មវិធីត្រូវមាន តេស្តកូវីដ១៩ចំនួន ៥០០លាន ថ្នាំព្យាបាលចំនួន ២៤៥លាន និងថ្នាំបង្ការចំនួន ២ពាន់លានដូស ដើម្បីអាចចែកចាយនិងផ្តល់ឱ្យគ្រប់ប្រទេសនៅលើភពផែនដីបានស្មើៗគ្នា។
ប៉ុន្តែដើម្បីសម្រេចកម្មវត្ថុនេះ អង្គការសុខភាពពិភពលោកប៉ាន់ស្មានថាគេត្រូវការមានហិរញ្ញវត្ថុដល់ទៅប្រមាណ៣៨ពាន់លានដុល្លារ។ ៥រយលានដុល្លារទើបប្រមូលបានពីវេទិកាសន្តិភាពក្រុងប៉ារីសថ្ងៃនេះ ក្នុងនោះ១០០លានជាជំនួយសន្យារបស់បារាំង ១០០លានរបស់សហភាពអឺរ៉ុប និង៥០លានរបស់អេស្ប៉ាញ។
ចំណែកមូលនិធិ Bill et Melinda Gates ដែលសកម្មបំផុតក្នុងកម្មវិធីនេះបានដាក់បញ្ចូលថវិកាក្នុងហិបរួមឱ្យបន្ថែមចំនួន ៧០លានដុល្លារទៀត។ ចំណែកអង់គ្លេសក៏នឹងផ្តល់ជំនួយហិរញ្ញវត្ថុបន្ថែមប្រហាក់ប្រហែលនេះដែរ។ ជំនួយហិរញ្ញវត្ថុសន្យានៅក្នុងវេទិកាសន្តិភាពនេះ ជាការបូកបន្ថែមពីលើប្រាក់ជំនួយដែលប្រទេសទាំងឡាយបានសន្យាជួយកាលពីលើកមុនចំនួន ៤ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ