អានតួអត្ថបទ
បរិស្ថាន-កូវីដ១៩

កាកបាទក្រហម និងអឌ្ឍចន្ទក្រហម៖បម្រែបម្រួលអាកាសធាតុបង្កការគំរាមកំហែងខ្លាំងជាងជំងឺកូវីដ១៩

លោក Jagan Chapagain អគ្គនាយកអង្គការកាកបាទក្រហម និងអឌ្ឍចន្ទក្រហម
លោក Jagan Chapagain អគ្គនាយកអង្គការកាកបាទក្រហម និងអឌ្ឍចន្ទក្រហម AFP - FABRICE COFFRINI
១៧ នាទី

នៅ​ថ្ងៃ​អង្គារ ទី១៧ វិច្ឆិកា កាកបាទក្រហម និងអឌ្ឍចន្ទក្រហម​បាន​ផ្សព្វផ្សាយ​របាយការណ៍​មួយ​ស្តីពី​គ្រោះមហន្តរាយ​ក្នុង​លោក​ចាប់​តាំង​ពី​ទសវត្ស ៦០។ របាយការណ៍​នេះ​បាន​ធ្លាក់​មក​ចំ​ពេល​ដែល​ពិភពលោក​កំពុង​បន្ត​រងគ្រោះ​ដោយ​ជំងឺ​កូវីដ១៩។ តែ​របាយការណ៍​បាន​ទាញ​សញ្ញាអាសន្ន​ថា ការ​គំរាមកំហែង​ដែល​បង្ក​ឡើង​ដោយ​បម្រែបម្រួល​អាកាសធាតុ​មាន​គ្រោះថ្នាក់​ខ្លាំង​ជាង​ជំងឺ​កូវីដ១៩ ទៅ​ទៀត។ តាម​របាយការណ៍​ដដែល ជំងឺ​កូវីដ១៩ អាច​មាន​វ៉ាក់សាំង​បង្ការ តែ​បម្រែបម្រួល​អាកាសធាតុ​នឹង​គ្មាន​វ៉ាក់សាំង​បង្ការ​ទេ។

ផ្សាយពាណិជ្ជកម្ម

នៅ​ចន្លោះ​ខែ​មីនា​ដែល​ជំងឺ​កូវីដ១៩ កំពុង​ផ្ទុះ​ពេញ​ទំហឹង និង​ខែ​កញ្ញា មាន​កើត​ឡើង​នូវ​គ្រោះមហន្តរាយ​ជាង ១០០ករណី និង​បាន​ប៉ះពាល់​ដល់​មនុស្ស​ជាង ៥០លាននាក់ នេះ​បើ​តាម​របាយការណ៍​របស់​អង្គការ​កាកបាទក្រហម និង​អឌ្ឍចន្ទក្រហម​ដែល​មាន​ទីស្នាក់ការកណ្តាល​ក្នុង​ទីក្រុង​ហ្សឺណែវ ប្រទេស​ស៊្វីស។ ថ្លែង​នៅ​ក្នុង​សន្និសីទកាសែត លោក Jagan Chapagain អគ្គនាយក​អង្គការ​បាន​ទទួល​ស្គាល់​ពី​វិបត្តិ​កូវីដ១៩ ដែល​កំពុង​បង្ក​គ្រោះថ្នាក់​ខ្លាំង​ដល់​ក្រុម​គ្រួសារ និង​មិត្តភក្តិ។ តែ​លោក Chapagain បាន​យល់​ឃើញ​ថា គឺ​បម្រែបម្រួល​អាកាសធាតុ​ដែល​នឹង​បង្ក​ផលប៉ះពាល់​យូរអង្វែង​លើ​ជីវិតមនុស្ស និង​ផែនដី​ខ្លាំង​ជាង​កូវីដ១៩​ទៅ​ទៀត។ តាម​រូប​អគ្គនាយក​អង្គការ​ដដែល បម្រែបម្រួល​អាកាសធាតុ​បាន​បណ្តាល​ឲ្យ​មាន​មនុស្ស​ស្លាប់​យ៉ាង​តិច ១ ៣០០ ០០០នាក់​តាំង​ពី​ដំណាច់​ឆ្នាំ ២០១៩។

លោក Chapagain បាន​បញ្ជាក់​ដោយ​មិន​លាក់លៀម​ថា ពិភពលោក​អាច​មាន​វ៉ាក់សាំង​បង្ការ​កូវីដ១៩ នៅ​ឆ្នាំ ២០២១ និង​អាច​គ្រប់គ្រង​ជំងឺ​មួយ​នេះ​បាន​នៅ​ប៉ុន្មាន​ឆ្នាំ​ខាង​មុខ តែ​គួរ​ឲ្យ​សោកស្តាយ​ដែល​គេ​គ្មាន​វ៉ាក់សាំង​បង្ការ​បម្រែបម្រួល​អាកាសធាតុ។ សម្រាប់​អគ្គនាយក​អង្គការ​កាកបាទក្រហម និង​អឌ្ឍចន្ទក្រហម វ៉ាក់សាំង​បង្ការ​បម្រែបម្រួលអាកាសធាតុ គឺ​ផ្តើម​ចេញ​ពី​សកម្មភាព​របស់​មនុស្ស​ម្នាក់ៗ។ របាយការណ៍​បាន​កត់សម្គាល់​ឃើញ​ថា​ក្នុង​ឆ្នាំ ២០១៩ កន្លង​ទៅ ពិភពលោក​បាន​ស្គាល់​គ្រោះមហន្តរាយ​ធម្មជាតិ​ចំនួន ៣០៨ ករណី​ដោយ​បាន​សម្លាប់​ជីវិត​មនុស្ស​ប្រមាណ ២៤ ៤០០នាក់​ក្នុង​នោះ មាន ៧៧%​ជា​គ្រោះមហន្តរាយ​អាកាសធាតុ ឬ​ឧតុនិយម។

ចំនួន​គ្រោះមហន្តរាយ​អាកាសធាតុ និង​ឧតុនិយម​បាន​កើន​ឡើង​តាំង​ពី​ទសវត្ស ៦០ និង​មាន​ការ​កើន​ឡើង​ជិត ៣៥% បើ​គិត​តាំង​ពី​ទសវត្ស ៩០។ ក្នុង​រយៈពេល ១០ឆ្នាំ​ចុង​ក្រោយ​នេះ គ្រោះមហន្តរាយ​អាកាសធាតុ និង​ឧតុនិយម​កម្រិត​ខ្ពស់​បាន​សម្លាប់​មនុស្ស​ជាង ៤១០ ០០០នាក់​ក្នុង​លោក ពិសេស​ក្នុង​បណ្តា​ប្រទេស​ដែល​មាន​ប្រាក់ចំណូល​ទាប ឬ​មធ្យម។ រលកកម្តៅ​ដែល​បន្ត​ដោយ​ព្យុះសង្ឃរា​ជា​គ្រោះមហន្តរាយ​ដែល​សម្លាប់​មនុស្ស​ច្រើន​ជាង​គេ។ របាយការណ៍​បាន​ប្រមើលមើល​ថា តម្រូវការ​ទឹកប្រាក់​ប្រមាណ ៥០ ០០០លានដុល្លារ​ក្នុង​មួយ​ឆ្នាំៗ គឺ​ចាំ​បាច់​ដើម្បី​បំពេញ​តាម​តម្រូវការបន្សាំ​ដែល​ប្រទេសកំពុង​អភិវឌ្ឍ​ទាំង ៥០ប្រទេស​បាន​កំណត់​សម្រាប់​ទសវត្ស​ខាង​មុខ។ តែ​កាកបាទក្រហម និង​អឌ្ឍចន្ទក្រហម​សម្តែង​ការ​សោកស្តាយ​ដែល​មាន​ប្រទេស​ជា​ច្រើន​ងាយ​រងគ្រោះ​ពី​បម្រែបម្រួល​អាកាសធាតុ​ត្រូវ​បាន​គេ​ទុកចោល និង​ទទួល​បាន​ការ​ជួយ​ទំនុកបម្រុង​តិចតួច។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ