អានតួអត្ថបទ
បារាំង

លោកសាកូហ្ស៊ី អតីតប្រធានាធិបតី​បារាំង បង្ហាញ​ខ្លួន​នៅ​តុលាការ ​ជាប់​ចោទពី​បទ​​ពុក​រលួយ​

លោកនីកូឡា សាកូហ្ស៊ី អតីតប្រធានាធីបតីបារាំង ពេលចូលទៅ​តុលាការក្រុង​ប៉ារីស ថ្ងៃទី​២៣វិច្ឆិកា ២០២០
លោកនីកូឡា សាកូហ្ស៊ី អតីតប្រធានាធីបតីបារាំង ពេលចូលទៅ​តុលាការក្រុង​ប៉ារីស ថ្ងៃទី​២៣វិច្ឆិកា ២០២០ REUTERS - CHARLES PLATIAU
ដោយ៖ ម៉ម ពិសី
១៤ នាទី

លោក នីកូឡា សាកូហ្ស៊ី អតីតប្រធានាធិបតីបារាំង បានចូល​ខ្លួននៅតុលាការក្រុងប៉ារីស កាល​ពី​ថ្ងៃ​​ចន្ទ ទី២៣វិច្ឆិកា  ​នៅក្នុងសវនាការឿងក្តីពុករលួយ ដែលលោកត្រូវជាប់​សង្ស័យ។ គួរ​បញ្ជាក់ថា នេះជាលើកទីមួយ​ហើយ សម្រាប់បារាំង ដែលអតីតប្រធានាធិបតីម្នាក់ ត្រូវជាប់ចោទពីបទប្រព្រឹត្តិអំពើពុករលួយ​។ លោកនីកាឡា សាកូហ្ស៊ី តែងតែអះអាងជានិច្ច ថាលោកមិនបាន​ប្រព្រឹត្តិអំពើពុករលួយ​ទេ ហើយ​ថាការចោទនេះ ជាការរៀបចំ ដើម្បី​កំទេចជីវិត​​នយោបាយ​របស់លោក។

ផ្សាយពាណិជ្ជកម្ម

ក្នុងវ័យ៦៥ឆ្នាំ ប្រកបដោយអាកប្បកិរិយារហ័សរហួន លោកនីកូឡា សាកូហ្ស៊ី អតីតប្រធានាធិបតី​បារាំង បានបង្ហាញ​ខ្លួន​ក្នុង​​សវនកា នៅតុលាការបទល្មើសមជ្ឈឹមក្រុងប៉ារីស ថ្ងៃទី​២៣វិច្ឆិកា។ ជនជាប់ចោទម្នាក់ទៀត ឈ្មោះ Thierry Herzog គឺជាមេធាវី និងជាមិត្តស្និទស្នាល​នឹង​លោកសាកូហ្ស៊ី ក៏មានវត្តមានផងដែរ។ ចំណែកជនជាប់ចោទទី​៣ គឺលោកចៅក្រម​ Gilbert Azibert មិនមានវត្តមានទេ ដោយ​សារ​តុលាការ​បានសម្រេច បញ្ជូនទៅកាន់សវនាកាមួយទៀត ដាច់ដោយឡែក។

គួរំលឹកថា ដើមហេតុដំបូង គឺនៅខែកញ្ញាឆ្នាំ​២០១៣ រដ្ឋអាជ្ញាបារាំង បានសម្រេច​លបស្តាប់ទូរ​ស័ព្ទ​របស់​លោក​ សាកូហ្ស៊ី ដែល​​ពាក់ព័ន្ធនៅក្នុងសំណុំរឿងមួយទៀត គឺរឿងសង្ស័យទទួល​ប្រាក់​ពីមេដឹកនាំ​លីប៊ី យកមកចំណាយឃោសនាបោះឆ្នោត។ នៅដើមឆ្នាំ​២០១៤ មន្ត្រីស៊ើបអង្កេត បានលបស្តាប់ដឹងថា លោកសាកូហ្ស៊ី បានទាក់ទងជាសំងាត់ ជាមួយ​មេធាវីឈ្មោះ Thierry Herzog ដោយ​បន្លំប្រើឈ្មោះក្លែងក្លាយ ថា «Paul Bismuth» ។

ក្រុមស៊ើបអង្កេត អះអាងថា លោកសាកូហ្ស៊ី បាននិយាយប្រាប់ទៅ​លោក Thierry Herzog ថាលោកនឹងធានា​ធ្វើអន្តរាគមន៍ ជួយ​ឲ្យ​លោក​ចៅក្រម Gilbert Azibert បានទទួលតំណែងធំមួយ​ នៅម៉ូណាកូ។ តែក្រោយ​មក ដោយ​ដឹងថា សមត្ថកិច្ចលបស្តាប់ទូរស័ព្ទ អ្នកទាំង៣​ ក៏បាន​ បោះបង់ចោលផែនការនេះវិញ។

លោក Paul-Albert Iweins មេធាវី លោក Thierry Herzog បានលើកឡើងថា ការសន្ទនាគ្នាតាមទូរស័ព្ទ ដែលគេ​យក​មក​សំអាង ដើម្បីចោទប្រកាន់កូនក្តីលោក​ គឺជា​ការនិយាយគ្នាធម្មតា ក្នុងនាម​ជាមិត្តភក្តិស្និទស្នាល តែប៉ុណ្ណោះ ពុំមានការឃុបឃិតគ្នាណាមួយ​ឡើយ។

ដូចគ្នាដែរ លោកសាកូហ្ស៊ី តែងតែអះអាងជានិច្ចថា ការចោទប្រកាន់នេះ គឺជា​ការរៀបចំ​បែប​នយោបាយ ដើម្បីរារាំងលោក​ មិន​ឲ្យ​ឈរឈ្មោះបោះឆ្នោត កាលពី​ឆ្នាំ​២០១៧។ សូមបញ្ជាក់ថា ជាប់ចោទពី​បទ ប្រព្រឹត្តិអំពើពុករលួយ និង​ប្រើប្រាស់ឥទ្ធិពល​ខុសច្បាប់ លោកនីកូឡា សាកូហ្ស៊ី អាចប្រឈម​នឹងទោសជាប់​ពន្ធនាគារ​១០ឆ្នាំ បន្ថែមជាមួយ​ប្រាក់ពិន័យ ចំនួន​១លានអឺរ៉ូ។ ក្រៅពី​សំណុំរឿងនេះ លោកសាកូហ្ស៊ី ត្រូវប្រឈមនឹងការ​ចោទប្រកាន់មួយផ្សេងទៀត នៅក្នុង​សំណុំរឿង​ ប្រាក់ឃោសនាបោះឆ្នោតឆ្នាំ​២០១២៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ