អានតួអត្ថបទ
WHO-ជំងឺគ្រុនចាញ់

WHO៖យុទ្ធនាការប្រយុទ្ធប្រឆាំងនឹងជំងឺគ្រុនចាញ់កំពុងជាប់គាំង

Tedros Adhanom Ghebreyesus, shugaban hukumar lafiya ta duniya WHO.
Tedros Adhanom Ghebreyesus, shugaban hukumar lafiya ta duniya WHO. 路透社图片
១៨ នាទី

នៅ​ថ្ងៃ​ចន្ទ ទី៣០ វិច្ឆិកា អង្គការ​សុខភាព​ពិភពលោក​ហៅកាត់​ជា​ភាសា​អង់គ្លេស WHO បាន​ចេញ​ផ្សាយ​របាយការណ៍​មួយ​ស្តីពី​ស្ថានភាព​ជំងឺ​គ្រុនចាញ់​ក្នុង​លោក។ នៅ​ក្នុង​របាយការណ៍ WHO បាន​បង្ហាញ​ក្តី​បារម្ភ​ពី​ភាព​ជាប់គាំង​នៃ​យុទ្ធនាការ​ប្រយុទ្ធប្រឆាំង​នឹង​ជំងឺ​គ្រុនចាញ់​នា​រយៈពេល​ប៉ុន្មាន​ឆ្នាំ​ចុង​ក្រោយ​នេះ។ តាម WHO ជំងឺ​គ្រុនចាញ់​បាន​សម្លាប់​មនុស្ស​ប្រមាណ​ជា ៤០០ ០០០នាក់​ក្នុង​ឆ្នាំ ២០១៩ កន្លង​ទៅ ហើយ​អាហ្រ្វិក​បន្ត​ជា​តំបន់​ដែល​បាន​រងគ្រោះ​ខ្លាំង​ជាង​គេ។

ផ្សាយពាណិជ្ជកម្ម

WHO បាន​កត់​សម្គាល់​ឃើញ​ថា​ក្នុង​រយៈពេល ៤ឆ្នាំ​ចុង​ក្រោយ​នេះ ករណី​ឆ្លង​ជំងឺ​គ្រុនចាញ់​មាន​លំនឹង​ដោយ​នៅ​ក្នុង​ឆ្នាំ ២០១៩ ចំនួន​អ្នក​ឆ្លង​ថ្មី​មាន​ប្រមាណ​ជា ២២៩លាននាក់។ តែ​គឺ​យុទ្ធនាការ​ប្រយុទ្ធប្រឆាំង​នឹង​ជំងឺ​មួយ​នេះ​ដែល​ហាក់​កំពុង​ជាប់​គាំង​មួយ​កន្លែង។ បន្ទាប់​ពី​បាន​កាត់​បន្ថយ​ចំនួន​អ្នក​ស្លាប់​ពី ៧៣៦ ០០០នាក់​ក្នុង​ឆ្នាំ ២០០០ មក​នៅ​ត្រឹម ៤១១ ០០០នាក់​ក្នុង​ឆ្នាំ ២០១៨ និង ៤០៩ ០០០នាក់​ក្នុង​ឆ្នាំ ២០១៩ WHO បាន​អំពាវនាវ​ឲ្យ​មាន​ការ​ប្រឹងប្រែង​បន្ថែម​ទៀត​ដើម្បី​កាត់​បន្ថយ​ចំនួន​អ្នក​ឆ្លង និង​អ្នក​ស្លាប់​ឲ្យ​បាន​ច្រើន​ជាង​នេះ។ តាម WHO កង្វះ​ថវិកា​ជា​ដើម​ចម​នៃ​ភាព​ជាប់គាំង​នៅ​ក្នុង​យុទ្ធនាការ​ប្រយុទ្ធប្រឆាំង​នឹង​ជំងឺ​គ្រុនចាញ់។

WHO បាន​បញ្ជាក់​ថា​ក្នុង​ឆ្នាំ ២០១៩ ថវិកា​ដែល​ទទួល​បាន​ពិត​ប្រាកដ​មាន​ប្រមាណ​តែ ៣ ០០០លានដុល្លារ​ប៉ុណ្ណោះ​នៅ​ក្នុង​ថវិកា​ដែល​សហគមន៍​អន្តរជាតិ​បាន​សន្យា​ចំនួន ៥ ៦០០លានដុល្លារ។ អាហ្រ្វិក​ជា​តំបន់​ដែល​បាន​រងគ្រោះ​ខ្លាំង​ជាង​គេ ព្រោះ​ក្នុង​ចំនួន​អ្នក​ស្លាប់​ទាំង​ប្រមាណ​ជា ៤០០ ០០០នាក់​ក្នុង​ឆ្នាំ ២០១៩ មាន ៣៨៤ ០០០នាក់​នៅ​ទ្វីបអាហ្រ្វិក។ មាន​ប្រទេស​ចំនួន ៤ ដែល​បាន​ស្រូប​យក​ជិត​ពាក់កណ្តាល​នៃ​ករណី​ឆ្លង​ជំងឺ​គ្រុនចាញ់​សរុប​ក្នុង​លោក​សម្រាប់​ឆ្នាំ ២០១៩ គឺ​នីហ្សេរីយ៉ា អ៊ូហ្កង់ដា សាធារណរដ្ឋប្រជាធិបតេយ្យកុងហ្គោ និង​ម៉ូសំប៊ិក។ « វា​ល្មម​ដល់​ពេល​ដែល​ថ្នាក់ដឹកនាំ​អាហ្រ្វិក និង​ថ្នាក់ដឹកនាំ​ផ្សេង​ទៀត​លើ​លោក​ត្រូវ​រួមដៃ​គ្នា​ជា​បន្ត​ទៀត​ដើម្បី​ប្រយុទ្ធប្រឆាំង​នឹង​ជំងឺ​គ្រុនចាញ់ » នេះ​ជា​ការ​អំពាវនាវ​របស់​អគ្គនាយក WHO លោក Tedros។

លោក Tedros បាន​បន្ថែម​ថា មាន​តែ​ការ​រួម​សាមគ្គី​គ្នា​ទេ​ទើប​គេ​អាច​ឈាន​ទៅ​បំបាត់​ជំងឺ​គ្រុនចាញ់​នៅ​ក្នុង​លោក​បាន​ទាំង​ស្រុង។ ដោយឡែក នាយិកា WHO ប្រចាំ​អាហ្រ្វិក​លោកស្រី Matshidiso Moeti បាន​ថ្លែង​ថា យុទ្ធនាការ​បង្ការ​ជំងឺ​គ្រុនចាញ់​មិន​ត្រូវ​បាន​រំខាន​ដោយ​ជំងឺ​កូវីដ១៩ ទេ តែ​ជំងឺ​កូវីដ១៩ កំពុង​គំរាមកំហែង​ដល់​កិច្ចខិតខំ​ប្រឹងប្រែង​របស់ WHO ក្នុង​ការ​ជំនះ​លើ​ជំងឺ​គ្រុនចាញ់ ពិសេស​ការ​ព្យាបាល​អ្នកជំងឺ។ របាយការណ៍​របស់ WHO បាន​គូសបញ្ជាក់​ថា​តាំង​ពី​ឆ្នាំ ២០០០ មាន ២១ប្រទេស​បាន​ទទួល​ជោគជ័យ​ក្នុង​ការ​កម្ចាត់​ជំងឺ​គ្រុនចាញ់។ នៅ​ឥណ្ឌា យុទ្ធនាការ​ប្រយុទ្ធប្រឆាំង​នឹង​ជំងឺ​គ្រុនចាញ់​នា​រយៈពេល ២ឆ្នាំ​ចុង​ក្រោយ​ទទួល​បាន​លទ្ធផល​គួរ​ឲ្យ​កត់សម្គាល់​ដោយ​ចំនួន​អ្នក​ឆ្លង​ធ្លាក់​ចុះ ១៨% និង​អ្នក​ស្លាប់​ធ្លាក់​ចុះ ២០%។

នៅ​អាស៊ីអាគ្នេយ៍ ៦ប្រទេស​នៅ​តាម​ដង​ទន្លេមេគង្គ​កំពុង​ស្ថិត​លើ​ផ្លូវ​ឆ្ពោះ​ទៅ​សម្រេច​គោលដៅ​កម្ចាត់​ជំងឺ​គ្រុនចាញ់​ទាំង​ស្រុង​នៅ​ឆ្នាំ ២០៣០។ ចន្លោះ​ឆ្នាំ ២០០០ និង ២០១៩ ប្រទេស​ទាំង ៦ នៅ​តាម​ដង​ទន្លេមេគង្គ​បាន​កាត់​បន្ថយ​ចំនួន​អ្នក​ឆ្លង​ជំងឺ​គ្រុនចាញ់ដល់​ទៅ ៩០%៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ