អានតួអត្ថបទ
OCDE-សេដ្ឋកិច្ច-កូវីដ១៩

OCDE បានព្យាករណ៍ពីស្ថានភាពសេដ្ឋកិច្ចសកលប្រកបដោយសុទិដ្ឋិនិយមនៅ ២ឆ្នាំ​ខាង​មុខ

លោក Angel Gurria អគ្គលេខាធិការ OCDE
លោក Angel Gurria អគ្គលេខាធិការ OCDE AP - Francois Mori
១៨ នាទី

នៅ​ថ្ងៃ​អង្គារ ទី១ ធ្នូ អង្គការ​នៃ​កិច្ចសហប្រតិបត្តិការ និង​ការ​អភិវឌ្ឍន៍​សេដ្ឋកិច្ច​ហៅ​កាត់​ជា​ភាសា​បារាំង OCDE បាន​ព្យាករណ៍​ពី​ស្ថានភាព​សេដ្ឋកិច្ច​សកល​សម្រាប់ ២ឆ្នាំ​ខាង​មុខ។ តាម OCDE ការ​ប្រកាស​ចេញ​នូវ​ប្រសិទ្ធិភាព​វ៉ាក់សាំង​បង្ការ​កូវីដ១៩ ដោយ​មន្ទីរពិសោធន៍​ជា​បន្តបន្ទាប់​ចុង​ក្រោយ​នេះ​បាន​អនុញ្ញាត​ឲ្យ​មាន​ក្តីសង្ឃឹម​ពី​ការ​មាន​សន្ទុះ​សេដ្ឋកិច្ច​សកល​ឡើង​វិញ​ក្នុង​រយៈពេល​មធ្យម។ សម្រាប់​ឆ្នាំ ២០២០ OCDE បាន​ប្រមើលមើល​ពី​សេដ្ឋកិច្ច​សកល​ធ្លាក់​ចុះ ៤,២%។ ចំណែក​នៅ​ឆ្នាំ ២០២១ សេដ្ឋកិច្ច​សកល​នឹង​ស្គាល់​សន្ទុះ​ឡើង​វិញ​តិច​ជាង​ការ​ព្យាករណ៍​លើក​មុន។ សម្រាប់​ឆ្នាំ ២០២២ OCDE បាន​ប្រមើលមើល​ពី​សន្ទុះ​កំណើន​សេដ្ឋកិច្ច​សកល​ដែល​អាច​មាន​អត្រា ៣,៧%។ តែ​កម្រិត​សន្ទុះ​សេដ្ឋកិច​នឹង​មាន​មិន​ដូច​គ្នា​ទេ​ពី​ប្រទេស​មួយ​ទៅ​ប្រទេស​មួយ និង​ពី​តំបន់​មួយ​ទៅ​តំបន់​មួយ។

ផ្សាយពាណិជ្ជកម្ម

នៅ​ក្នុង​ខែ​កញ្ញា​កន្លង​ទៅ OCDE បាន​ព្យាករណ៍​ពី​កំណើន​សេដ្ឋកិច្ច​សកល​ក្នុង​អត្រា ៥% នៅ ២០២១ តែ​បាន​ទម្លាក់​មក​នៅ​ត្រឹម ៤,២% វិញ។ ការ​ទម្លាក់​ពី ៥% មក​នៅ ៤,២% ក៏​ដោយសារ​តែ​នៅ​ក្រោយ​ខែ​កញ្ញា មាន​ប្រទេស​ជា​ច្រើន ពិសេស​នៅ​អឺរ៉ុប​បាន​ធ្លាក់​ក្នុង​រលក​ឆ្លង​កូវីដ១៩ លើក​ទី២។ ជាមួយ​នឹង​រលក​ឆ្លង​កូវីដ១៩ លើក​ទី២ ពេល​នេះ មាន​ប្រទេស​ជា​ច្រើន​បាន​ប្រើ​វិធានការ​បិទខ្ទប់​ប្រទេស​ជា​ថ្មី​ដែល​បាន​ធ្វើ​ឲ្យ​ចរន្ត​សេដ្ឋកិច្ច​មួយ​ផ្នែក​ជាប់គាំង។ តែ OCDE មើល​ឃើញ​ថា នៅ​ពេល​លើក​ការ​បិទខ្ទប់​ប្រទេស​ចេញ​វិញ សេដ្ឋកិច្ច​នឹង​អាច​មាន​ដំណើរការ​យ៉ាង​ឆាប់​រហ័ស។ ការ​ហ៊ាន​អះអាង​យ៉ាង​ដូច​នេះ​ដោយ OCDE បាន​កត់សម្គាល់​ឃើញ​មាន​សន្ទុះ​សេដ្ឋកិច្ច​ក្នុង​រដូវក្តៅ​កន្លង​ទៅ​នៅ​ក្រោយ​ការ​លើក​ការ​បិទខ្ទប់​ប្រទេស។

នៅ​ឆ្នាំ ២០២១ ស្ថានភាព​អាច​ប្រសើរ​ជាង ព្រោះ​ទន្ទឹម​នឹង​លើក​ការ​បិទខ្ទប់​ប្រទេស ពិភពលោក​នឹង​មាន​វ៉ាក់សាំងបង្ការ​កូវីដ១៩។ ក្នុង​ថ្ងៃ​ចន្ទ ទី៣០ វិច្ឆិកា មន្ទីរពិសោធន៍​អាមេរិក Moderna បាន​ដាក់​ពាក្យ​ទៅ​ទីភ្នាក់ងារ​ឱសថ​អឺរ៉ុប​ដើម្បី​សុំ​ការ​អនុញ្ញាត​ចែកចាយ​វ៉ាក់សាំង​ចាប់​ពី​ខែ​ធ្នូ​នេះ​ទៅ។ បន្ទាប់​មក​ក្នុង​ថ្ងៃ​អង្គារ ទី១ ធ្នូ មន្ទីរពិសោធន៍​អាមេរិក អាល្លឺម៉ង់ Pfizer-BioNTech ក៏​បាន​ធ្វើ​ដូច​គ្នា​នេះ។« ក្តីសង្ឃឹម​គឺ​នៅ​ទីនេះ »នេះ​ជា​ការ​ទទួល​ស្គាល់​របស់​អគ្គលេខាធិការ OCDE លោក Angel Gurria នៅ​ក្នុង​សន្និសីទកាសែត។ ដោយឡែក OCDE បាន​សម្តែង​ក្តីបារម្ភ​ចំពោះ​អ្នក​អត់ការងារ​ធ្វើ​ដែល​មាន​អាយុ​ចន្លោះ​ពី ១៥ឆ្នាំ​ទៅ ២៤ឆ្នាំ ពិសេស​ក្នុង​តំបន់​អឺរ៉ូ។

តាម OCDE ចំនួន​អ្នក​អត់ការងារ​ធ្វើ​ក្នុង​វ័យ​នេះ​ដែល​មាន​ចំនួន​ច្រើន​ស្រាប់​ក្នុង​ឆ្នាំ ២០១៩ បាន​ហាក់​ឡើង​កាន់​តែ​ខ្លាំង​ក្នុង​សម័យ​កូវីដ១៩ ពិសេស​មាន​ជាង ៣០% នៅ​អេស្ប៉ាញ និង​មាន ២០% ក្នុង​ប្រទេស​បារាំង។ ក្តីបារម្ភ​មួយ​ទៀត​របស់ OCDE គឺ​ការ​ខកខាន​រៀនសូត្រ​របស់​កុមារ​ក្នុង​ពេល​បិទ​ប្រទេស ពិសេស​កុមារ​ដែល​រស់ក្នុង​គ្រួសារ​មាន​ជីវភាព​លំបាក។ បន្ទាប់​មក ក្តីបារម្ភ​របស់ OCDE ក៏​មាន​ចំពោះ​ឧស្សាហកម្ម​ខ្នាតតូច និង​មធ្យម​ជា​ច្រើន​លាន​ដែល​ជា​ប្រភព​ដ៏​សំខាន់​នៃ​ការ​បង្កើត​ការងារ និង​ដែល​ពួក​គេ​កំពុង​ប្រឈម​នឹង​ការ​ក្ស័យធន​ដោយសារ​ជាប់​បំណុល​ធ្ងន់ ក ពិសេស​ក្នុង​ផ្នែក​ផ្ទះសំណាក់ សណ្ធាគារ ផ្នែក​ភោជនីយដ្ឋាន ផ្នែក​ដឹកជញ្ជូន និង​ផ្នែក​សិល្បៈ​ទាក់ទង​រោងកុន រោងល្ខោន រួម​ទាំង​ការ​រៀបចំ​កំសាន្ត​នានា​ដែល​ត្រូវ​បាន​បិទទ្វារ​ក្នុង​រយៈពេល​បិទខ្ទប់​ប្រទេស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ