អានតួអត្ថបទ

ប៉ូលិស​អាំងទែរប៉ូល​ព្រមាន​ពីចោរអ៊ីនធ័រនែត ដែល​ផ្តោតសំដៅ វ៉ាក់សាំង​បង្ការជំងឺកូវីដ

រូបគំរូវ៉ាក់សាំង​ប្រឆាំង​កូវីដ
រូបគំរូវ៉ាក់សាំង​ប្រឆាំង​កូវីដ JOEL SAGET AFP
ដោយ៖ ឈាង បុប្ផា
១៤ នាទី

នៅថ្ងៃ​ពុធទី ២ ធ្នូ ប៉ូលិសអន្តរជាតិ អាំងទែរប៉ូល​បានជូនដំណឹង ទៅ​ប្រទេស​សមាជិក​ទាំង ១៩៤​ប្រទេស ឲ្យ​រៀបចំ​ខ្លួន ទប់ទល់​នឹង​ក្រុមឧក្រិដ្ឋកម្ម​ដែល​កំពុង​សំឡឹង ផ្តោតសំខាន់ លើវ៉ាក់សាំង បង្ការជំងឺកូវីដ ១៩។ ក្រុមហ៊ុន​កុំព្យូទ័រ IBM វិញ​បាន​និយាយ​ប្រាប់​ទូរទស្សន៍​អង់គ្លេស BBC ថា ក្រុមចោរ អ៊ីនធ័រនែត​កំពុង​តាមដាន ព័ត៌មាន​ស្តីពីការចែកចាយ​វ៉ាក់សាំង ប្រឆាំង​ជំងឺកូវីដ សំខាន់ៗ​នៅក្នុង​ពិភពលោក។ 

ផ្សាយពាណិជ្ជកម្ម

នៅក្នុង​និវេទ ទឹកក្រូច ស្តីពី​ការប្រកាស​អាសន្ន​ផ្នែក​សន្តិសុខ ប៉ូលិស អាំងទែរប៉ូល បាន​ព្រមាន​ពី​សកម្មភាព​ឧក្រិដ្ឋកម្ម កាន់តែ​ច្រើន ដែល​ទាក់ទង​នឹង​ការលួច ការក្លែងបន្លំ និង​ការផ្សព្វផ្សាយ​លក់​វ៉ាក់សាំង ក្លែងក្លាយ ខុសច្បាប់។

“ជំងឺរាតត្បាត​កូវីដ​បានជំរុញ ឲ្យ​មាន​ក្រុមឧក្រិដ្ឋជន ឆ្លៀតឱកាស​កាន់តែ​ច្រើន មិនធ្លាប់​មាន​ពីមុនមក។ ដូច្នេះ នៅក្នុង​ពេល​វ៉ាក់សាំង​បង្ការ​ជំងឺកូវីដ លេចចេញ​រូបរាង​កាន់តែច្បាស់ ហើយ​និង​ការចែកចាយ នឹង​មាន​នៅ​ពេលខាងមុខ គេ​ត្រូវ​ចាត់វិធានការ​ដើម្បី ធានា សុវត្ថិភាព ដល់​បណ្តាញ​ចែកចាយ​វ៉ាក់សាំង ហើយនិង​កំណត់​មុខសញ្ញា​វិបសៃតិ៍ ខុសច្បាប់ ដែល​លក់​ផលិតផល​ក្លែងក្លាយ។

តាមការចុះផ្សាយ​របស់​វិបសៃតិ៍​ព័ត៌មាន​អង់គ្លេស BBC ក្រុមហ៊ុន​បច្ចេកវិទ្យា IBM បាន​រកឃើញថា ក្រុមចោរ​អ៊ីនធ័រនែត កំពុង​តាមដាន យក ការណ៍​សម្ងាត់ ពីបណ្តាញ​​ដែលត្រូវ​​ទទួល​បន្ទុក​ចែកចាយ​វ៉ាក់សាំង​បង្ការជំងឺកូវីដ ១៩។ ក្រុមចោរ បាន​ផ្តើម​សកម្មភាព​តាមដាន ខ្សែចង្វាក់​ចែកចាយ​វ៉ាក់សាំង ​តាំង​ពី​ខែ​កញ្ញា ឆ្នាំ ២០២០។ មែល​របស់​ក្រុមចោរអ៊ីនធ័រនែត ត្រូវ​បាន​ផ្ញើ​ចេញ នៅក្នុង​ប្រទេស​ចំនួន ៦ ដែល​នៅក្នុង​នោះ ពួកគេ ផ្តោត​សំខាន់ ក្រុមអង្គការ​ដែល​ធ្វើការ​ជាមួយ​សម្ព័ន្ធ​វ៉ាក់សាំង​អន្តរជាតិ ហៅកាត់ថា GAVI។ អង្គការ​ទាំងនោះ មាន​ដូចជា អង្គការ​សុខភាព​ពិភពលោក អង្គការ យូនីសេហ្វ ធនាគារ​ពិភពលោក ហើយ​និង​មូលនិធិ​ប៊ីល និង​មេលីដា ហ្កេត មានតួនាទី​ចែកចាយ​វ៉ាក់សាំង​បង្ការ​កូវីដ ទៅកាន់​តំបន់​ក្រីក្រ ជាទី​ដែល​ខ្វះ ក្រខ្សត់ បណ្តាញស្តុកទុក ក្នុង​សីតុណ្ហភាព​ត្រជាក់ ដែល​សំខាន់​សម្រាប់​វ៉ាក់សាំង ដែល​ត្រូវការរក្សា​នៅ​កន្លែង​ត្រជាក់ខ្លាំង ដូចជា វ៉ាក់សាំង របស់​ក្រុមហ៊ុន​Pfizer និង Moderna ជាដើម។

តាម​ក្រុមហ៊ុន IBM គេ​នៅមិនដឹងថា អត្តសញ្ញាណ​របស់​ក្រុមចោរ​អ៊ីនធ័រនែត នៅឡើយទេ ប៉ុន្តែ ជាទូទៅ ពួកគេ បាន​ក្លែងបន្លំ​ឈ្មោះ ជា​មន្រ្តី​ចិន ដែល​ផ្ញើមែល សុំ​លេខកូដ​សំងាត់ ដើម្បី​អាចចូល​ក្នុង​កុំព្យូទ័រ​របស់​បុគ្គលិក​របស់​ស្ថាប័ន​ដែល​ធ្វើការ​សម្រាប់សម្ព័ន្ធ​វ៉ាក់សាំង​អន្តរជាតិ។

ប៉ូលិស​អាំងទែរប៉ូល​បានជូនដំណឹង​ដល់​ប្រទេស​សមាជិក​របស់ខ្លួន ឲ្យ​មាន​ការប្រុងប្រយ័ត្ន ខ្ពស់ នៅចំពោះ​ការធ្វើតេស្ត រកមេរោគកូវីដ ខុសច្បាប់ ជាពិសេស​នៅក្នុង​កាលៈទេសៈ​ដែល ការធ្វើដំណើរ​ចេញចូល អន្តរជាតិ នឹង​ចាប់ផ្តើម​ឡើងវិញ នាពេលខាងមុខ។

ថ្មីៗនេះ អាំងទែរប៉ូល​ដែល​មានទីស្នាក់ការ កណ្តាល ​នៅ​ទីក្រុង​លីយ៉ុង​ប្រទេស​បារាំង បាន​កំណត់រកឃើញ មាន​វិបសៃត៍​ចំនួន ៣០០០ ដែល មាន​លក់​ថ្នាំ សម្ភារៈពេទ្យ ក្លែងក្លាយ និង​ខុសច្បាប់។

 

 

 

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ