វ៉ាក់សាំងកូវីដ១៩

កូវីដ១៩ ៖ ភ្នាក់ងារ​អឺរ៉ុប អនុញ្ញាត ឱ្យ​ប្រើ​ថ្នាំ​វ៉ាក់សាំងរបស់​ក្រុមហ៊ុន​ Moderna

ភ្នាក់ងារ​ឱសថ​អឺរ៉ុប​ព្រមឱ្យ​ប្រើ​ថ្នាំបង្ការ​កូវីដ​១៩​របស់ Moderna
ភ្នាក់ងារ​ឱសថ​អឺរ៉ុប​ព្រមឱ្យ​ប្រើ​ថ្នាំបង្ការ​កូវីដ​១៩​របស់ Moderna AFP - JUSTIN TALLIS
ដោយ៖ អៀង សុខម៉ិញ
១៧ នាទី

ភ្នាក់ងារ​ឱសថ​អឺរ៉ុប បាន​អនុម័ត​នៅ​ថ្ងៃ​ពុធ​ទី ៦​មករា២០២១ យល់​ព្រម​ឱ្យ​អឺរ៉ុប​ធ្វើ​ចរាចរណ៍​ថ្នាំ​បង្ការ​ជំងឺ​កូវីដ​១៩ របស់​ក្រុម​ហ៊ុន​​អាមេរិក។ នេះ​ជា​ថ្នាំ​វ៉ាក់សាំង​ប្រឆាំងនឹង​កូវីដ១៩​ទី​ពីរ ដែលបាន​ទទួល​ការ​អនុញ្ញាត​ឱ្យ​ប្រើប្រាស់។​​ ជា​មួយ​នឹង​សេចក្តី​សម្រេច​នេះ អឹរ៉ុប​​សង្ឃឹម​ថា ​​យុទ្ធនាការ​ចាក់​ថ្នាំ​បង្ការ​នៅ​អឺរ៉ុប​ដ៏យឺតយ៉ាវ​បើប្រៀបធៀប​ទៅនឹង​សហរដ្ឋ​អាមេរិក​ឬ​អង់គ្លេស​នោះ អាច​នឹង​ត្រូវ​ពន្លឿន​បានច្រើនជាង​មុន។

ផ្សាយពាណិជ្ជកម្ម

ភ្នាក់ងារឱសថ​អឺរ៉ុប យល់ព្រមផ្តល់​អនុសាសន៍ឱ្យ​ប្រើថ្នាំ​វ៉ាក់សាំង​របស់ក្រុមហ៊ុន Moderna ​​ ដើម្បី​ជួយ​បង្ការ​មនុស្សចាស់​ចាប់ពីអាយុ​១៨​ឆ្នាំ​ឡើងទៅ​ ពី​​ជំងឺ​កូវីដ​១៩។ ថ្នាំ​បង្ការ​នឹង​ផ្តល់​លទ្ធភាព​ឱ្យ​អឺរ៉ុប​យក​ឈ្នះ​ភាពបន្ទាន់​សុខភាព​បង្ក​ឡើង​កូវីដ១៩​។ នេះ​ជាសេចក្តី​ថ្លែងការណ៍របស់​អាជ្ញាធរ​គ្រប់គ្រង​ឱសថ​អឺរ៉ុប​ដែល​មានទីស្នាក់ការ​នៅ​ទីក្រុង​អាំស្ទែរដាំ ប្រទេស​ហូឡង់។ ភ្នាក់ងារ​បាន​អះអាង​ថា​ ក្រុម​អ្នក​ជំនាញ​បាន​ធ្វើ​ការ​យ៉ាង​លំបាក​លំបិន​ណាស់​ទម្រាំ​​​ទទួល​បាន​ការ​បំភ្លឺ​ច្បាស់​លាស់ពី​ក្រុមហ៊ុន​ ដើម្បី​​ជម្រះ​អស់​ចម្ងល់ទាំងឡាយ​។ តែ​ទី​បំផុត​ ភ្នាក់ងារ​អាច​ផ្តល់​សេចក្តី​សម្រេចបាន​មួយ​សប្តាហ៍​មុន​ការ​គ្រោង​ទុក។

ថ្នាំ​បង្ការ​ Moderna របស់​ក្រុមហ៊ុនអាមេរិក មានប្រសិទ្ធភាពការពារជំងឺ​កូវីដ​១៩​បាន៩៤,១% និង​ត្រូវ​ចាក់​ពីរ​ដង ដោយ​ឃ្លាត​គ្នា​២៨​ថ្ងៃ។

​​បាន​ការ​អនុញ្ញាតដែល​មាន​សុពលភាព​​​មួយ​១ឆ្នាំនេះ​ហើយ គេ​ត្រូវរង់​ចាំ​សេចក្តី​សម្រេច​ ជាផ្លូវការ​ពី​គណៈកម្មការអឺរ៉ុប​សិន មុនអាច​ដាក់​ឱ្យ​​ប្រើប្រាស់​ជា​ទូទៅ​បាន។ តែ​ប្រធានក្រុមប្រឹក្សា​អឺរ៉ុបានប្រកាស​កាលពី​ថ្ងៃអង្គារថាថ្នាំបង្ការ​ Moderna អាចនឹងទទួល​បាន​ការ​អនុញ្ញាត​ឱ្យ​នៅ​ប៉ុន្មាន​ក្រោយ​​ ហើយគណៈកម្មការអឺរ៉ុប​នឹង​រៀប​ចំជំនួបកំពូលនៅ​ចុងខែ​មករា​ដើម្បី​ដោះស្រាយ​វិបត្តិ​សុខភាព។ លោកស្រី​ប្រមុខដឹកនាំសហភាពអឺរ៉ុប ក៏បាន​ធានា​ថា​អឺរ៉ុប​នឹង​ធ្វើការ​ឱ្យ​បាន​ពេញ​ទំហឹង​ដើម្បីចែកចាយ​ថ្នាំបង្ការ​ដល់​គ្រប់​រដ្ឋ​ជាសមាជិក។​

សូមបញ្ជាក់​ថា ប្រទេស​ជាសមាជិក​សហភាពអឺរ៉ុប បាន​ដាក់គំនាប​លើ​​ភ្នាក់ងារ​ឱសថ​ខ្លាំងណាស់ ឱ្យ​ភ្នាក់ងារ​ឆាប់​ផ្តល់​ការ​អនុញ្ញាត​ឱ្យ​ប្រើប្រាស់​ថ្នាំ​បង្ការ​របស់ Moderna ​មួយបន្ថែមទៀត ព្រោះ​ពេល​នេះ​អឺរ៉ុប​កំពុង​ប្រឈមនឹងរលក​ចម្លង​កូវីដ១៩​ខ្លាំង​ជា​ថ្មី​។

អឺរ៉ុប​បានចាប់​ផ្តើមយុទ្ធនាការ​ចាក់​ថ្នាំបង្ការ​របស់​ក្រុមហ៊ុន​​Pflizer /BioNtech តាំង​ពី​នៅ​ថ្ងៃទី ២៧​ធ្នូ ២០២០ ប៉ុន្តែ​ក្នុង​ល្បឿន​យឺត​ខ្លាំងណាស់។ ប្រទេសហូឡង់​ទើប​តែអាចចាប់​ផ្តើម​ចាក់​នៅ​ថ្ងៃពុធ​មុន​​តែ​ប៉ុណ្ណោះ។ នៅសហរដ្ឋអាមេរិក​យុទ្ធនាការចាក់​ថ្នាំ​បង្ការ​កូវីដ១៩ មានដំណើរការ​ទៅ​លឿន ដោយ​ប្រើថ្នាំពីរ​ប្រភេទ គឺ​ Pfizer BioNTech និង​ Moderna។ នៅអង់គ្លេស​ អាជ្ញាធរទើប​ផ្តល់​ការ​អនុញ្ញាត​ឱ្យ​ចាក់​ថ្នាំ​បង្ការ​របស់​ក្រុមហ៊ុន​ AstraZeneca មួយ​បន្ថែមទៀត។ ប៉ុន្តែសម្រាប់​អឺរ៉ុប ភ្នាក់ងារ​ឱសថ​ដែល​ជាស្ថាប័ន​ឯករាជ្យ បានអះអាង​រួច​ហើយ​ថា​ថ្នាំបង្ការ​ផលិត​ដោយ​ក្រុមហ៊ុនអង់គ្លេស AstraZeneca សហការ​ជាមួយ​សកលវិទ្យាល័យ​ Oxford មិន​ទាន់​អាច​អនុញ្ញាត​ឱ្យ​ប្រើប្រាស់ក្នុង​អឺរ៉ុប​បាន​នៅ​ខែមករា២០២១​នេះ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI