បារាំង-កូវីដ១៩

បារាំង​ប្រកាស​ដាក់​ចេញ​នូវ​វិធាន​ការ​តឹង​រ៉ឹង​ថ្មី​ដើម្បី​ប្រយុទ្ធ​ប្រឆាំង​នឹង​ជំងឺ​កូវីដ

ដើម្បីទប់ស្កាត់រលកចម្លងដ៏លឿនរហ័សរបស់មេរោគកូវីដប្រភេទថ្មី នាយករដ្ឋមន្ត្រីបារាំង លោកហ្សង់ កាស្តិច បានប្រកាសដាក់ចេញបំរាមគោចរចាប់ពីម៉ោង ៦ល្ងាច នៅទូទាំងប្រទេសចាប់ពីថ្ងៃសៅរ៍ទី ១៦ មករានេះតទៅ។
ដើម្បីទប់ស្កាត់រលកចម្លងដ៏លឿនរហ័សរបស់មេរោគកូវីដប្រភេទថ្មី នាយករដ្ឋមន្ត្រីបារាំង លោកហ្សង់ កាស្តិច បានប្រកាសដាក់ចេញបំរាមគោចរចាប់ពីម៉ោង ៦ល្ងាច នៅទូទាំងប្រទេសចាប់ពីថ្ងៃសៅរ៍ទី ១៦ មករានេះតទៅ។ AP - Michel Euler
ដោយ៖ អ៊ុង គឹមអ៊ាន់
១៥ នាទី

ប្រឈម​នឹង​ការ​ឆ្លង​រីករាលដាល​នៃ​ជំងឺ​កូវីដ​ប្រភេទ​ថ្មី​ដែល​បាន​បំប្លែង​ខ្លួន​ពី​មេរោគ​ចាស់​ រដ្ឋាភិបាល​បារាំង​បាន​ប្រកាស​ដាក់​ចេញ​នូវ​វិធានការ​រឹតត្បិត​ចំនួន​ពីរ​កាលពី​យប់​ថ្ងៃ​ព្រហស្បតិ៍​ ទី១៤​ មករា​ ឆ្នាំ២០២១​។ វិធានការ​រឹតត្បិត​ទាំងនោះ​រួមមាន​ ការរឹតបន្តឹង​បម្រាម​គោចរ​ និង​ការ​រឹតត្បិត​លើ​អ្នក​ដំណើរ​មកពី​ក្រៅប្រទេស​។

ផ្សាយពាណិជ្ជកម្ម

ដើម្បី​ទប់ស្កាត់​រលក​ចម្លង​ដ៏​លឿន​រហ័ស​របស់​មេរោគ​កូវីដ​ប្រភេទ​ថ្មី​ នាយករដ្ឋ​មន្ត្រី​បារាំង​លោក​ហ្សង់ កាស្តិច​ (Jean Castex) បាន​ប្រកាស​ដាក់​ចេញ​បំរាម​គោ​ចរ​ចាប់ពីម៉ោង​ ៦ល្ងាច​នៅទូទាំង​ប្រទេស​ចាប់ពី​ថ្ងៃសៅរ៍ទី​ ១៦​ មករា​នេះតទៅ​ យ៉ាង​តិច​រយៈ​ពេល ១៥ ថ្ងៃ​។

នៅបារាំង​ អត្រា​អ្នក​ឆ្លង​កូវីដ​ត្រូវ​បាន​គេ​រាយការណ៍​ថា​ជាមធ្យម​មាន​ចំនួន​ ១ ៨០០០ ករណីថ្មី​ជា​រៀងរាល់ថ្ងៃ​។ អត្រានេះ​ មាន​កម្រិត​ខ្ពស់ឆ្ងាយ​ណាស់​ពី​គោលដៅ​ដែល​កំណត់​ដោយ​រដ្ឋាភិបាល​របស់​លោក​ម៉ាក្រុង​ដែល​ចង់​ទម្លាក់​ករណី​ឆ្លង​ប្រចាំថ្ងៃ​ជា​មធ្យម​ឲ្យ​ចុះ​ត្រឹម ៥០០០ ករណី​។

បណ្តា​មន្ទីរពេទ្យ​នៅក្នុង​ប្រទេស​នៅ​តែ​បន្ត​ទទួល​រង​សម្ពាធ​ពី​ចំនួន​អ្នក​ជំងឺកូវីដ​ដែល​នៅ​តែ​មាន​ចំនួន​ច្រើន​។ ដោយ​មើលឃើញបែបនេះ​ លោក​នាយករដ្ឋមន្ត្រី​កាស្តិច​ បាន​មាន​ប្រសាសន៍​ថា​ រដ្ឋាភិបាល​ត្រូវតែ​ចាត់វិធានការ​រឹតត្បិត​ខ្លាំងជាងមុន​ដើម្បី​អាច​គ្រប់គ្រង​ជំងឺ​កូវីដ​ប្រកប​ដោយ​ប្រសិទ្ធភាព​។

ក្រៅពីនេះ​ ដើម្បី​កាត់​ផ្តាច់​សង្វាក់​ចម្លង​ដ៏​ខ្លាំង​របស់​មេរោគ​កូរ៉ូណាប្រភេទថ្មី​ អាជ្ញាធរ​បារាំង​ក៏​បាន​ដាក់​ចេញ​ផងដែរ​នូវ​ចំណាត់ការ​រឹតបន្តឹង​លើ​ការ​ធ្វើដំណើរ​មកពីក្រៅប្រទេស​។

មេរោគ​កូវីដ​ដែលបាន​បំប្លែង​ខ្លួន​ មាន​សមត្ថភាព​ចម្លង​ខ្លាំង​ណាស់​។ ដូច្នោះហើយ រដ្ឋាភិបាល​ក្រុង​ប៉ារីសបាន​ប្រកាសថា​ចាប់ពីថ្ងៃចន្ទ​សប្តាហ៍​ខាងមុខ​នេះ​តទៅ​ រាល់​អ្នក​ដំណើរ​ដែល​មកពី​គ្រប់ទីកន្លែង​ទាំងអស់​ក្រៅពី​សហភាពអឺរ៉ុប​ដែល​ឥឡូវ​នេះ​រួម​បញ្ចូល​ទាំង​ចក្រភព​អង់គ្លេសផង​ ត្រូវ​មាន​ឯកសារ​បញ្ជាក់​ថា​អវិជ្ជមានកូវីដ​ ទើប​អនុញ្ញាត​ឲ្យ​ចូល​ទឹក​ដី​នៃប្រទេស​បារាំង​បាន​។ យ៉ាងណាក៏ដោយ ​សាលារៀន​នៅតែ​បើក​ឲ្យ​ដំណើរការ​ដដែល​នាខណៈពេលនេះ។

គួរជ្រាបថា​ ជំងឺ​កូវីដ​ប្រភេទ​ថ្មី​ ដែល​មាន​ប្រភព​ចេញមក​ពី​ប្រទេស​អង់គ្លេសរួម​ចំណែ​ក្នុងការ​ចម្លង​មេរោគ​ចំនួន​ ១,៤ % នៅ​ក្នុង​ប្រទេស​បារាំង​បច្ចុប្បន្ននេះ។​ នេះ​បើតាម​​រដ្ឋ​មន្រ្តី​សុខាភិបាល​បារាំងលោក​ Olivier Véran។

តែទោះជា​បែបនេះ​ក្តី​ លោក​នាយករដ្ឋមន្ត្រី​ហ្សង់​ កាស្តិច​ បាន​ប្រកាស​ឲ្យ​ដឹង​ដែរ​ថានឹង​មិន​មាន​ការ​ដាក់ចេញ​នូវ​វិធានការ​បិទខ្ទប់​ប្រទេស​ជាថ្មីនោះទេ​សម្រាប់​បច្ចុប្បន្ននេះ​។ ប៉ុន្តែ​ ក្នុង​ករណី​ដែល​រដ្ឋាភិបាល​លែង​អាច​គ្រប់គ្រង​កូវីដ​បាន​ នោះ​ការ​បិទទ្វារ​ចាក់សោ​ប្រទេស​ ប្រាកដណាស់​គឺជារឿង​ដែល​មិន​អាច​ជៀស​បាន​ឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI