អាល្លឺម៉ង់់

អាល្លឺម៉ង់ ៖ គណបក្សកាន់​អំណាចអាល្លឺម៉ង់រកឃើញ​​អ្នក​ស្នង​លោកស្រី​មែរកិល ?

លោក អាមីន ឡាសសេត ប្រធានគណបក្ស​គ្រិស្តសានិកប្រជាធិបតេយ្យ​ ដែល​ទើប​ជាប់​ឆ្នោត​ថ្មី​ថ្ងៃទី ១៦ មករា ២០២១
លោក អាមីន ឡាសសេត ប្រធានគណបក្ស​គ្រិស្តសានិកប្រជាធិបតេយ្យ​ ដែល​ទើប​ជាប់​ឆ្នោត​ថ្មី​ថ្ងៃទី ១៦ មករា ២០២១ Odd ANDERSEN POOL/AFP
ដោយ៖ អៀង សុខម៉ិញ
១៧ នាទី

នៅថ្ងៃសៅរ៍​ទី ១៦មករា ២០២១ គណបក្ស​គ្រឹស្ត​សាសនិកប្រជាធិបតេយ្យ​អាល្លឹម៉ង់ CDU ដែលកំពុង​កាន់​​អំណាច បានបោះឆ្នោត​ជ្រើសរើសមេ​​ដឹកនាំ​បក្សថ្មី។ គណបក្សបាន​សម្រេច​ចិត្ត​លោក អាមីន ឡាសសេត Armin Laschet ដែលជា​អ្នក​មាន​ភក្តីភាព​នឹង​លោកស្រី ប្រមុខរដ្ឋាភិបាល​អាល្លឹម៉ង់​ អង់ហ្គឺឡា​ មែរកិល​បំផុត។ ជោគជ័យ​នេះ​អាច​រុញ​ច្រាន​លោក​ឱ្យ​ក្លាយ​ជា​បេក្ខជន​នាយករដ្ឋមន្ត្រី​​អាល្លឺម៉ង់​របស់​បក្ស​ នាសម័យ​បោះឆ្នោតសភា​ខែ​កញ្ញា​២០២១ផង។ តើ​លោក អាមីន ឡាសសេត ជា​នរណា ?

ផ្សាយពាណិជ្ជកម្ម

លោក​ អាមីន ឡាសសេត បានក្លាយ​ជា​ប្រមុខ​ដឹកនាំបក្សគ្រិស្តសានិក​ប្រជាធិបតេយ្យ CDUដោយ​បាន​ទទួល​សំឡេង​​គាំទ្រ​ ៥២,៨%។ ជាមួយ​ជោគជ័យ​នេះ លោកឡាសសេត ​អាច​នឹងក្លាយ​ជា​បេក្ខជន​នាយករដ្ឋមន្ត្រី​របស់​បក្សផង និង​អាចជា​អនាគត​នាយករដ្ឋមន្ត្រីអាល្លឹម៉ង់បន្តពី លោកស្រី មែរកិល ដែល​បាន​សម្រេច​ចិត្ត​មិន​ឈរ​ឈ្មោះ​ជា​លើក​ទី​៥​ផង។

ក្នុង​វ័យ​៥៩​ឆ្នាំ លោក អាមីន ឡាសសេត ជា​ឥស្សរជន​ដែល​មាន​បទ​​ពិសោធន៍នយោបាយ​ខ្ពស់។ ជា​សមាជិក​សភា​អាល្លឺម៉ង់​តាំងពី​ឆ្នាំ​១៩៩៤ សមាជិក​សភា​អឺរ៉ុប​តាំង​ពី​ឆ្នាំ១៩៩៩ ជា​សមាជិក​សភា​តំបន់ ជា​រដ្ឋមន្ត្រី​ក្នុង​ជួរ​រដ្ឋាភិបាល​ និងតាំង​ពី​ឆ្នាំ​២០១៧មក លោកបានក្លាយ​ជា​ អភិបាល​រដ្ឋ​ណ័រិន​វ៉េសហ្វាឡែន រដ្ឋ​សហព័ន្ធ​ដែល​មាន​ប្រជាជន​រស់​ច្រើនជាង​គេ​បំផុត (២៣%ឬ១៨លាននាក់) និង​មានសេដ្ឋកិច្ច​ខ្លាំង​បំផុត​ (២២%) ​របស់​ប្រទេសអាល្លឺម៉ង់។

ជា​អ្នក​ស្តាំកណ្តាល​និយម  ​ប្រធាន​គណបក្ស​គ្រឹស្តសានិកប្រជាធិបតេយ្យ​ថ្មី ​មានភក្តីភាពនិង​​គាំទ្រ​​លោកស្រី​មែរកិល​ គ្រប់កាលៈទេសៈ និង​គ្រប់​ប្រធានបទ រាប់​ទាំង​សំណុំ​រឿង​អន្តោប្រវេសន៍​កាលពី​ឆ្នាំ​២០១៥ ដែលលោកស្រី​មែរកិលរង​ការ​រិះគន់​ពី​គ្រប់ទិសទីក៏​ដោយ។ មាន​ន័យថា​ក្រោមការ​ដឹកនាំរបស់​លោក ឡាសសេត អាល្លឺម៉ង់​នឹងបន្តជំហរ​នយោបាយ​ដដែល​​​ដូច​ដែល​លោកស្រី​មែរកិល​បានត្រួសត្រាយ​ដឹកនាំ​អស់​រយៈ​ពេល​១៥​ឆ្នាំ​កន្លងមក។

ថ្វី​បើវិបត្តិ​កូវីដ​១៩​បាន​ធ្វើ​ឱ្យ​លោក​ធ្លាក់​​ប្រជាប្រិយភាពបន្តិច​​ ហើយ​​អំណាច​របស់​លោក​នៅផុយស្រួយ​ក៏​ពិតមែន ប៉ុន្តែ​លោកជា​តំណាងអ្នក​​បង្រួមបង្រួម។ ដើម្បី​កុំឱ្យ​មានរូបភាព​ជា​ស្រមោល​របស់​លោកស្រី​មែរកិល​ពេក លោកឡាសសេត បាន​​ប្រកាស​ចងសម្ព័ន្ធភាព​ជាមួយ​លោក Jens Spahn ចេន​ ស្តាន រដ្ឋមន្ត្រី​ក្រសួង​សុខាភិបាល វ័យ​៤០​ឆ្នាំ​ដែល​ជា​ក្មេង​ជាង​លោក​ច្រើន និង​ដែល​ធ្លាប់ប្រឆាំង​នឹង​សំណុំ​រឿង​អន្តោប្រវេសន៍​របស់​លោកស្រី មែរកិល​យ៉ាងខ្លាំង។ សម្ព័ន្ធភាពនេះ​បាន​លើក​ប្រជាប្រិយភាព​លោក​និង​បានធ្វើឱ្យ​លោក​ឈ្នះ​ឆ្នោត​ក្លាយ​ជា​ប្រធានបក្ស​នៅ​ថ្ងៃ​នេះ។

ប៉ុន្តែ​តើ​សម្ព័ន្ធ​នេះ​អាច​នឹង​នាំ​លោកឱ្យ​បានក្លាយ​ជា​បេក្ខជន​នាយករដ្ឋមន្ត្រី​​ដែរឬទេ ?​ តាំង​ពី​កើត​ជា​ប្រទេស​សហព័ន្ធ​អាល្លឺម៉ង់នៅ​ឆ្នាំ​១៩៤៩​មក​ ប្រធាន​បក្ស​CDU តែង​ជាប់​ជាបេក្ខជន​នាយករដ្ឋមន្ត្រី​រហូត លើកលែង​តែ​ពីរ​ដង​គត់​ (១៩៨០ និង​២០០២) ដែលបេក្ខជន​នាយករដ្ឋមន្ត្រី​ត្រូវ​ប្រគល់​ទៅ​ឱ្យ​គណបក្សស្តាំ​និយម​ CSU​ ជា​សម្ព័ន្ធមិត្ត សម្រាប់​ទៅ​ប្រកួត​ប្រជែង​ក្នុង​ការបោះឆ្នោត​សភា ដែល​ត្រូវ​បរាជ័យ​ទាំងពីរ​លើក។ តែ​សេណារីយោ​នេះ​អាចកើត​មានម្តង​ទៀត ព្រោះ​បើ​តាមការ​ស្ទង់​មតិ ​អ្នក​អភិរក្សនិយម​អាល្លឺម៉ង់​ពេញ​ចិត្ត​ប្រធានគណបក្ស​CSU ជាង​លោក ឡាសសេត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI