វ៉ាក់សាំងកូវីដ១៩

ន័រវែសបើក​ការស៊ើបអង្កេត បន្ទាប់​​ពីមាន​​ស្លាប់​មនុស្ស​ចាស់​ជរា​២៣នាក់ ក្រោយ​ចាក់​វ៉ាក់សាំង​កូវីដ១៩

បុរសវ័យ៩២ឆ្នាំម្នាក់ កំពុងទទួលការចាក់វ៉ាក់សាំងប្រឆាំងកូវីដ​១៩ នៅប្រទេស​អាល្លឺម៉ង់។ ក្រុងប៊ែរឡាំង ថ្ងៃទី​១៨ មករា ២០២១
បុរសវ័យ៩២ឆ្នាំម្នាក់ កំពុងទទួលការចាក់វ៉ាក់សាំងប្រឆាំងកូវីដ​១៩ នៅប្រទេស​អាល្លឺម៉ង់។ ក្រុងប៊ែរឡាំង ថ្ងៃទី​១៨ មករា ២០២១ REUTERS - POOL
ដោយ៖ ម៉ម ពិសី
១២ នាទី

ផ្សាយពាណិជ្ជកម្ម

ប្រទេសមួយ​ចំនួន​ បានចាប់ផ្តើម​ចាក់វ៉ាក់សាំង ប្រឆាំងកូវីដ​១៩ ទៅ​លើ​ប្រជាជន​គេ ដោយ​ភាគច្រើន គឺ​ចាប់ផ្តើមចាក់​ទៅលើ​មនុស្ស​វ័យចំណាស់ ព្រោះ​មនុស្ស​វ័យចំណាស់ អាចប្រឈមខ្លាំងនឹងគ្រោះថ្នាក់​ដល់ជីវិត ក្នុងករណីឆ្លងកូវីដ​១៩។ ដោយឡែកនៅប្រទេស​ន័រវែស អាជ្ញាធរសុខាភិបាល បាន​បើកការ​ស៊ើបអង្កេត បន្ទាប់​ពីមាន​មនុស្សចាស់ជរាចំនួន២៣នាក់ បានស្លាប់ ក្រោយ​ទទួល​ការចាក់វ៉ាក់សាំងប្រឆាំង​កូវីដ​១៩។

មានមនុស្សចាស់ជរា​ អាយុជាង​៨០ឆ្នាំ ចំនួន​២៣នាក់ បានស្លាប់​នៅ​ប្រទេសន័រវែស បន្ទាប់​ពី​បានទទួល​ការចាក់វ៉ាក់សាំង​ប្រឆាំងកូវីដ​១៩ មិន​បានប៉ុន្មានថ្ងៃ។ ក្រោយ​ករណីនេះ អាជ្ញាធរសុខាភិបាល​​ន័រវែស សហការជាមួយ​មន្ទីពិសោធន៍ Pfizer បានបើកការ​អង្កេតស្រាវជ្រាវ ស្តីពី​ផល​វិបាក​នៃវ៉ាក់សាំងកូវីដ​១៩ ទៅលើ​មនុស្សចាស់ជរា ដែលមានសុខភាពទ្រុឌទ្រោម។

យោងតាមការសង្ស័យ​ជាបឋម ករណីស្លាប់ទាំងនេះ អាចបណ្តាល​មកពី​ផល​វិបាក បង្កឡើងជាទូទៅដោយ​វ៉ាក់សាំង ដូចជា​ការប្រតិកម្មអាលែក​ហ្ស៊ី ឬគ្រុនក្តៅខ្លួនជាដើម។ អ្នកជំនាញ​បានលើកឡើងថា ធម្មតា​ថ្នាំវ៉ាក់សាំងទោះប្រភេទអ្វីក៏ដោយ គឺតែងតែបង្កផលលំបាក​ទៅលើសុខភាពរបស់មនុស្ស នៅក្រោយ​ពេលចាក់បញ្ចូលទៅក្នុងសរីរាង្គ។ ជាក់ស្តែង គេតែងសង្កេតឃើញ​ករណីកុមារគ្រុនក្តៅ​ខ្លួន មួយថ្ងៃ ឬ២ថ្ងៃ បន្ទាប់ពី​ទទួលការចាក់វ៉ាក់សាំងនានា។ នេះជាសញ្ញា​បង្ហាញថា វ៉ាក់សាំងកំពុងចូលជ្រាប់ក្នុងសរីរាង្គ ហើ​យរាងកាយ​កំពុ​ង​បង្កើតប្រព័ន​្ធអង់ទីក័រដើម្បីទប់ទល់។

ដោយ​ប្រការទាំងនេះ អាជ្ញាធរសុខាភិបាល​ន័រ​វ៉េស​ កំពុងពិចារណា ផ្លាស់ប្តូរយុទ្ធសាស្ត្រ ព្រោះការចាក់វ៉ាក់សាំងកូវីដ១៩ ទៅលើ​មនុស្ស​ចាស់ជរា ដែលមានជំងឺ​ និង​សុខភាពទ្រុឌទ្រោមខ្លាំងនោះ​ អាចមិន​ផ្តល់ផល​វិជ្ជមាន​ទេ។ មនុស្សចាស់ជរាខ្លាំង ដែលមានជំងឺប្រចាំកាយ​ធ្ងន់ធ្ងរស្រាប់ទៅហើយ អាចប្រឈម​នឹង​គ្រោះថ្នាក់ខ្ពស់ បើសិនជាធ្លាក់ខ្លួនឈឺ គ្រុនក្តៅ ឬអាលែកហ្ស៊ី បន្ទាប់​ពី​ទទួលការ​ចាក់វ៉ាក់សាំងកូវីដ​១៩។ តែយ៉ាងណា មិនមែនមានន័យថា មនុស្សស្លាប់ដោយសារតែ​វ៉ាក់សាំងកូវីដ​១៩នោះទេ។

គួរកត់សំគាល់ថា ថ្មីៗនេះ មានពាក្យ​ចចាមអារ៉ាម និងព័ត៌មាន​កុហក ប្រឌិតជាច្រើន នៅតាមបណ្តាញសង្គម ដែលលើកឡើងថា វ៉ាក់សាំងប្រឆាំងកូវីដ​១៩ បានបណ្តាលឲ្យ​មនុស្ស​ស្លាប់។ នៅបារាំង​ អាជ្ញាធរកំពុងតែតាមវែករកមុខជនម្នាក់ ដែលបានបង្ហោះសារតាមណ្តាញសង្គម ដោយ​ប្រឌិតព័ត៌មានថា ស្ត្រីវ័យចំណាស់ឈ្មោះ Mauricette ដែលបានទទួលការចាក់វ៉ាក់សាំងកូវីដ​១៩​មុនគេ​នៅបារាំងនោះ បានស្លាប់បាត់ទៅហើយ។ ការចាក់វ៉ាក់សាំងកូវីដ​១៩ ទ្រង់ទ្រាយធំ ទៅលើមនុស្សវ័យចំណាស់ជាទូទៅ បានចាប់ផ្តើមនៅបារាំង​ ចាប់ពីថ្ងៃចន្ទទី​១៨មករា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI