បារាំង-ការពារជាតិ

បារាំង៖ជំងឺកូវីដ១៩ បានបង្កឲ្យមានការប្រជែងកម្លាំងគ្នាកាន់តែខ្លាំងនៅលើឆាកអន្តរជាតិ

រដ្ឋមន្ត្រីក្រសួងការពារជាតិបារាំង លោកស្រីវ្ល័ររ៉ង់ ប៉ាលី
រដ្ឋមន្ត្រីក្រសួងការពារជាតិបារាំង លោកស្រីវ្ល័ររ៉ង់ ប៉ាលី Christophe ARCHAMBAULT / AFP
១៧ នាទី

នៅ​ក្នុង​ប្រទេស​បារាំង រដ្ឋមន្ត្រី​ក្រសួង​ការពារជាតិ​លោកស្រី​វ្ល័ររ៉ង់ ប៉ាលី​បញ្ជាក់​ដោយ​មិន​លាក់លៀម​ថា ជំងឺ​កូវីដ១៩ បាន​បង្ក​ឲ្យ​មាន​ការ​ប្រជែង​កម្លាំង​គ្នា​កាន់​តែ​ខ្លាំង​នៅ​លើ​ឆាកអន្តរជាតិ។ តាម​ប្រមុខ​ការពារជាតិ​បារាំង​លោកស្រី​ប៉ាលី អ្វី​ដែល​គេ​បាន និង​កំពុង​ឃើញ​កើត​មាន​យ៉ាង​ផុសផុល​ដោយ​ជំងឺ​កូវីដ១៩ គឺ​ការ​ប្រកួតប្រជែង​ដែល​មាន​ភាព​តានតឹង​កាន់​តែ​ខ្លាំង​រវាង​រដ្ឋ និង​រដ្ឋ ការ​ពង្រឹង​អំណាច​នៅ​ក្នុង​តំបន់​ដូច​ដែល​ប្រទេស​តួកគី​បាន​ធ្វើ ការ​វាយប្រហារ​តាម​អ៊ីធ័រនែត និង​កំណើន​នៃ​ការ​ផ្សព្វផ្សាយ​ព័ត៌មាន​មិន​ពិត។

ផ្សាយពាណិជ្ជកម្ម

ប្រមុខ​ការពារជាតិ​បារាំង​លោកស្រី​វ្ល័ររ៉ង់ ប៉ាលី​បាន​បញ្ជាក់​យ៉ាង​ដូច​នេះ​នៅ​ក្នុង​បទបង្ហាញ​មួយ​ស្តីពី​ការ​ធ្វើ​បច្ចុប្បន្នភាព​លើ​យុទ្ធសាស្រ្ត​បារាំង។ លោកស្រី​ប៉ាលី​បាន​បន្ថែម​ថា ជំងឺ​កូវីដ១៩ ដែល​ពិភពលោក​កំពុង​ជួប​សព្វថ្ងៃ​មិន​ត្រឹម​បាន​បញ្ជាក់​នូវ​និន្នាការ​ដែល​បារាំង​បាន​កំណត់​អត្តសញ្ញាណ​ក្នុង​ឆ្នាំ ២០១៧ ទេ តែ​វា​បាន​ពង្រឹង​បន្ថែម និង​កំពុង​មាន​សន្ទុះ​ខ្លាំង​ទៀត​ផង។ អ្វី​ដែល​លោកស្រី​ប៉ាលី​ចង់​និយាយ​នេះ គឺ​ការ​ប្រជែង​កម្លាំង​កាន់​តែ​ធ្ងន់ធ្ងរ​ឡើង​នៅ​លើ​ឆាកអន្តរជាតិ។ ក្នុង​ថ្ងៃ​អង្គារ ទី១៩ មករា ប្រធានាធិបតី​បារាំង​លោក​ម៉ាក្រុង​ធ្លាប់​បាន​ព្រមាន​ប្រឆាំង​នឹង​កំណើន​នៃ​ភាព​តានតឹង​អន្តរជាតិ​ដោយសារ​តែ​ការ​ដក​ខ្លួន​របស់​រដ្ឋបាល​អាមេរិក​ក្នុង​ជំនាន់​លោក​ដូណាល់ ត្រាំ។

លោកស្រី​ប៉ាលី​បាន​រម្លឹក​ថា​តាំង​ពី​ឆ្នាំ ២០១៧ មាន​ការ​គំរាមកំហែង​ធំៗ​ចំនួន ៣ ដែល​ត្រូវ​បាន​កំណត់​អត្តសញ្ញាណ ទី១ ភេរវនិយម ពិសេស​បង្ក​ឡើង​ដោយ​ពួក​ជីហាត​អង្គការ​រដ្ឋអ៊ីស្លាម ទី២ ការ​សាយភាយ​នុយក្លេអ៊ែរ​ដោយ​កម្មវិធី​នុយក្លេអ៊ែរ​កូរ៉េខាងជើង និង​អ៊ីរ៉ង់ និង​ទី៣ គឺ​ការ​ពង្រឹង​ការ​ប្រកួតប្រជែង​រវាង​មហាអំណាច ពិសេស​យុទ្ធសាស្រ្ត​បំភិតបំភ័យ​របស់​ប្រទេស​រុស្ស៊ី ឬ​មួយ​ក៏​ការ​បង្កើន​អំណាច​យោធា​របស់​ប្រទេស​ចិន​តាម​រយៈ​ការ​ដំឡើង​ថវិកា​យោធា​ទ្វេដង​តាំង​ពី​ឆ្នាំ ២០១២។ តែ​សមរភូមិ​ថ្មី​ដែល​កំពុង​កើត​មាន​នៅ​ក្នុង​សម័យ​កូវីដ១៩ និង​ដែល​អាច​ធ្វើ​ឲ្យ​ប៉ះពាល់​ដល់​ដំណើរ​ការ​លទ្ធិប្រជាធិបតេយ្យ គឺ​កំណើន​នៃ​ការ​វាយប្រហារ​តាម​អ៊ីធ័រនែត​លើ​មន្ទីរពេទ្យ និង​កំណើន​នៃ​ការ​ផ្សព្វផ្សាយ​ព័ត៌មាន​មិន​ពិត។

បន្ទាប់​មក លោកស្រី​ប៉ាលី​បាន​លើក​ឡើង​ពី​ឥរិយាបទ​បង្ក​អស្ថិរភាព​ដើម្បី​បង្កើន​ឥទ្ធិពល​របស់​ប្រទេស​ខ្លះ​ដោយ​រំលោភ​ច្បាប់ និង​ដោយ​មិន​ខ្វល់​នឹង​អ្នក​ដទៃ។ នៅ​ត្រង់​ចំណុច​នេះ លោកស្រី​ប៉ាលី​បាន​ចង្អុល​មុខ​តួកគី​ដែល​បាន​ធ្វើ​សកម្មភាព​ប្រកប​ដោយ​គ្រោះថ្នាក់​នៅ​ក្នុង​ប្រទេស​លីប៊ី នៅ​សមុទ្រមេឌីទែរ៉ាណេ​ខាង​កើត ឬ​នៅ​តំបន់​កូកាស។ តែ​លោកស្រី​ប៉ាលី​បាន​គូស​បញ្ជាក់​ថា ដើម្បី​ប្រឆាំង​ទប់​នឹង​ការ​គំរាមកំហែង​ថ្មី​ទាំង​នេះ បារាំង​ត្រូវ​ការ​ជំនួយ​ពី​សម្ព័ន្ធមិត្ត និង​ដៃគូ​រឹងមាំ ដូច​យ៉ាង​សហភាពអឺរ៉ុប និង​សហរដ្ឋអាមេរិក​ដោយ​សង្ឃឹម​ថា រដ្ឋបាល​អាមេរិក​របស់​លោក​បៃដិន​នឹង​ជួយ​ផ្តល់​សន្ទុះ​សម្ព័ន្ធអាត្លង់ទិក​ឡើង​វិញ។

តែ​លោកស្រី​ប៉ាលី​មិន​ភ្លេច​បញ្ជាក់​ទេ​ថា បារាំង​ខ្លួន​ឯង​នឹង​ប្រឹងប្រែង​បន្ថែម​ទៀត​ដោយ​ពង្រឹង​បន្ថែម​នូវ​សេវាស៊ើបការណ៍សម្ងាត់ សមត្ថភាព​ការពារ​ក្នុង​ផ្នែក​ឌីជីថល និង​ទប់ស្កាត់​ការ​វាយប្រហារ​តាម​អ៊ីធ័រនែត រួម​ទាំង​ពង្រឹង​ការ​រៀបចំ​ប្រតិបត្តិការ​របស់​កងទ័ព​បារាំង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI