ហុងគ្រី-រុស្ស៊ី-កូវីដ១៩

ហុងគ្រីទិញវ៉ាក់សាំងបង្ការកូវីដ១៩ របស់រុស្ស៊ីចំនួន ២លានដូស និងរបស់ចិនចំនួន ១លានដូស

ប្រមុខការទូតហុងគ្រីលោក Peter Szijjarto (រូបឆ្វេង) និង​សមភាគី​រុស្ស៊ី​លោក Sergei Lavrov ក្នុងទីក្រុង​មូស្គូថ្ងៃទី២២ មករា ២០២១
ប្រមុខការទូតហុងគ្រីលោក Peter Szijjarto (រូបឆ្វេង) និង​សមភាគី​រុស្ស៊ី​លោក Sergei Lavrov ក្នុងទីក្រុង​មូស្គូថ្ងៃទី២២ មករា ២០២១ AFP - HANDOUT
១៨ នាទី

នៅ​ថ្ងៃ​សុក្រ ទី២២ មករា រដ្ឋាភិបាល​នៃ​ប្រទេស​ហុងគ្រី​បាន​ប្រកាស​ពី​ការ​កម្ម៉ង់​ទិញ​វ៉ាក់សាំង​បង្ការ​កូវីដ១៩ របស់​ប្រទេស​រុស្ស៊ី​ឈ្មោះ Spoutnik V ចំនួន ២លានដូស។ ពិធី​ចុះ​ហត្ថលេខា​លើ​ការ​កម្ម៉ង់ទិញ​នេះ​បាន​ធ្វើ​ឡើង​នា​ឱកាស​ដំណើរ​ទស្សនកិច្ច​របស់​ប្រមុខ​ការទូត​ហុងគ្រី​លោក​ភីធ័រ ហ្ស៊ីហ្សារតូ​ក្នុង​ទទីក្រុង​មូស្គូ។ លោក​ហ្សីហ្សារតូ​បាន​បញ្ជាក់​នៅ​ក្នុង​សន្និសីទកាសែត​ជាមួយ​សមភាគី​រុស្ស៊ី​លោក​ស៊ែរហ្កី ឡាវរ៉ូស​ថា វ៉ាក់សាំង​រុស្ស៊ី​ចំនួន ២លានដូស​នេះ​នឹង​អនុញ្ញាត​ចាក់​លើ​ពលរដ្ឋ​ហុងគ្រី​ចំនួន ១លាននាក់។ ហុងគ្រី​ជា​ប្រទេស​សមាជិក​អឺរ៉ុប​ទី១ ដែល​បាន​សម្លឹង​ឃើញ​ពី​អត្ថប្រយោជន៍​របស់ Spoutnik V។ ក្រៅ​ពី​រុស្ស៊ី ហុងគ្រី​ក៏​បាន​កម្ម៉ង់ទិញ​វ៉ាក់សាំង​បង្ការ​កូវីដ១៩ របស់​ចិន​ចំនួន ១លានដូស​ពី​មន្ទីរពិសោធន៍ Sinopharm ដែរ។

ផ្សាយពាណិជ្ជកម្ម

ការ​កម្ម៉ង់​ទិញ​វ៉ាក់សាំង​បង្ការ​កូវីដ១៩ របស់​រុស្ស៊ី Spoutnik V ចំនួន ២លានដូស​ពី​ហុងគ្រី​ពេល​នេះ​បាន​ធ្វើ​ឡើង បន្ទាប់​ពី​មាន​ការ​អនុញ្ញាត​ឲ្យ​ប្រើប្រាស់​ពី​ទីភ្នាក់ងារ​ឱសថ​ហុងគ្រី​ក្នុង​សប្តាហ៍​នេះ។ តែ​គេ​ត្រូវ​រង់ចាំ​ភ្លើងខៀវ​ពី​ក្រសួង​សុខាភិបាល​ទៀត​ទើប​អាច​ប្រើ​ជា​ផ្លូវការ​បាន។ តាម​ពិត​ទៅ ហុងគ្រី និង​ប្រទេស​ផ្សេង​ដែល​ជា​សមាជិក​សហភាព​អឺរ៉ុប​ត្រូវ​ប្រើ​វ៉ាក់សាំង​បង្ការ​កូវីដ១៩ ណា​ដែល​មាន​ការ​អនុញ្ញាត​ពី​ទីភ្នាក់ងារ​ឱសថ​អឺរ៉ុប។ តែ​ប្រទេស​សមាជិក​នីមួយៗ​ក៏​អាច​អនុញ្ញាត​បន្ទាន់​ឲ្យ​ប្រើ​វ៉ាក់សាំង​បង្ការ​កូវីដ១៩ ណា​ដែល​ទីភ្នាក់ងារ​ឱសថ​អឺរ៉ុប​មិន​អនុញ្ញាត​ឲ្យ​ប្រើ​ដែរ។ នៅ​ក្នុង​ករណី​នេះ គឺ​ប្រទេស​សមាជិក​នោះ​ជា​អ្នក​ទទួល​ខុស​ត្រូវ​ដោយ​ខ្លួន​ឯង​ពី​ផលវិបាក​ផ្សេងៗ ដូច​យ៉ាង​គុណភាព ប្រសិទ្ធិភាព និង​សុវត្ថិភាព​របស់​វ៉ាក់សាំង។

សូម​រម្លឹក​ថា សហភាព​អឺរ៉ុប​បាន​ចេញ​មុខ​ជា​អ្នក​កម្ម៉ង់ទិញ​វ៉ាក់សាំង​បង្ការ​កូវីដ១៩ សម្រាប់​សមាជិក​ទាំង ២៧ប្រទេស។ តែ​ភាព​យឺតយ៉ាវ និង​ការ​នៅ​មិន​ទាន់​មាន​វ៉ាក់សាំង​គ្រប់គ្រាន់​បាន​ធ្វើ​ឲ្យ​ប្រទេស​សមាជិក​ខ្លះ ដូច​យ៉ាង​ហុងគ្រី​ផ្តើម​ចាត់​វិធានការ​ដាច់​ដោយឡែក​របស់​ខ្លួន។ នាយករដ្ឋមន្រ្តី​ហុងគ្រី​លោក​វិកទ័រ អកបាន​ដែល​បាន​ចូលរួម​នៅ​ក្នុង​ជំនួបកំពូល​អឺរ៉ុប​តាម​អនឡាញ​ក្នុង​ថ្ងៃ​ព្រហស្បតិ៍ ទី២១ មករា​បាន​បញ្ជាក់​ជា​ថ្មី​ក្នុង​ថ្ងៃ​សុក្រ ទី២២ មករា​ថា លោក​មិន​អាច​បន្ត​រង់ចាំ​វ៉ាក់សាំង​ពី​សហភាព​អឺរ៉ុប​បាន​ទៀត​ឡើយ។ « បើ​គ្មាន​វ៉ាក់សាំង​ពី​សហភាព​អឺរ៉ុប​ទេ។ យើង​យក​វ៉ាក់សាំង​អ្នក​ផ្សេង។ វា​មិន​អាច​ទៅ​រួច​ទេ​ដែល​ពលរដ្ឋ​ហុងគ្រី​ស្លាប់​ដោយ​រង់ចាំ​វ៉ាក់សាំង​ពី​សហភាព​អឺរ៉ុប » នេះ​ជា​ការ​ថ្លែង​របស់​លោក​អកបាន។

គណៈកម្មការ​អឺរ៉ុប​បាន​ទទួល​យក​ការ​សម្រេចចិត្ត​របស់​ហុងគ្រី ហើយ​អ្នក​នាំ​ពាក្យ​ម្នាក់​បាន​គូស​បញ្ជាក់​ថា ប្រទេស​សមាជិក​អឺរ៉ុប​អាច​ចុះ​កិច្ចសន្យា​ទិញ​វ៉ាក់សាំង​បង្ការ​កូវីដ១៩ ជាមួយ​មន្ទីរពិសោធន៍​ផ្សេង​ដែល​មិន​ស្ថិត​ក្នុង​បញ្ជីរបស់​សហភាព​អឺរ៉ុប។ អ្នក​នំា​ពាក្យ​រូប​នេះ​ដដែល​បាន​រម្លឹក​ថា វ៉ាក់សាំង​ដែល​ទីភ្នាក់ងារ​ឱសថ​អឺរ៉ុប​បាន​អនុញ្ញាត​ឲ្យ​ប្រើ​ត្រូវ​បាន​សិក្សា វិភាគ​ល្អិតល្អន់​ពី​គុណភាព ប្រសិទ្ធិភាព និង​សុវត្ថិភាព។ រដ្ឋាភិបាល​រុស្ស៊ី​បាន​អះអាង​ថា វ៉ាក់សាំង Spoutnik V របស់​ខ្លួន​មាន​ប្រសិទ្ធិភាព​ជាង ៩០% និង​បាន​ដាក់​ពាក្យ​សុំ​ឲ្យ​មាន​ការ​អនុញ្ញាត​ប្រើ​នៅ​ក្នុង​សហភាព​អឺរ៉ុប។ តែ​ទីភ្នាក់ងារ​ឱសថ​អឺរ៉ុប​នៅ​មិន​បាន​ផ្តើម​ធ្វើ​ការ​សិក្សា វិភាគ​នៅ​ឡើយ​ទេ។ គួរ​បញ្ជាក់​ថា​មក​ទល់​ពេល​នេះ Spoutnik V ត្រូវ​បាន​អនុញ្ញាត​ឲ្យ​ប្រើ​ដោយ​ប្រទេស​ស៊ែរប៊ី អាល់ហ្សេរី អាហ្សង់ទីន វ៉េណេស៊ុយអេឡា ឬ​មួយ​ក៏​តួកមេនីស្ថាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI