វ៉ាក់សាំងកូវីដ១៩

កូវីដ១៩៖ ​ការយឺតយ៉ាវ​​ក្នុង​ការ​ប្រគលវ៉ាក់សាំង កំពុងធ្វើ​ឲ្យ​​ប្រទេស​អឺរ៉ុប​ព្រួយ​​បារម្ភខ្លាំង

គ្រូពេទ្យកំពុងចាក់វ៉ាក់សាំង Oxford/AstraZeneca ទៅឲ្យ​ស្រ្តី​ម្នាក់ នៅ​ក្រុង Guildford ប្រទេសអង់គ្លេស ថ្ងៃទី​១៤ មករា ២០២១
គ្រូពេទ្យកំពុងចាក់វ៉ាក់សាំង Oxford/AstraZeneca ទៅឲ្យ​ស្រ្តី​ម្នាក់ នៅ​ក្រុង Guildford ប្រទេសអង់គ្លេស ថ្ងៃទី​១៤ មករា ២០២១ REUTERS - PETER CZIBORRA
ដោយ៖ ម៉ម ពិសី
១៦ នាទី

នៅអឺរ៉ុប តំណឹងស្តីពីការយឺតយ៉ាង ក្នុងការផលិតនិងចែកចាយ នូវ​​វ៉ាក់សាំងប្រឆាំងកូវីដ​១៩ របស់មន្ទីរពិសោធន៍ AstraZeneca កំពុងតែធ្វើឲ្យ​ប្រទេសមួយចំនួន​ មាន​ខឹងសម្បារ លាយ​ឡំដោយ​ក្តីព្រួយ​បារម្ភ ខណៈដែល​ការឆ្លងរាលដាល​កាន់តែមានសន្ទុះខ្លាំងឡើងៗ។ ដោយស​ារតែការយឺតយ៉ាវនេះ ប្រទេសខ្លះ អាចនឹងទទួលបាន​វ៉ាក់សាំង តិចជាង​អ្វីដែលកំណត់ទុក ដល់ទៅ​៨០%។

ផ្សាយពាណិជ្ជកម្ម

កាលពីល្ងាចថ្ងៃសុក្រទី២២មករា មន្ទីរពិសោធន៍ AstraZeneca បានបញ្ជាក់ថា ខ្លួននឹងមិនអាច​ផលិត​ និងប្រគល់​វ៉ាក់សាំងប្រឆាំងកូវីដ​១៩ ឲ្យ​បានគ្រប់ចំនួន​កំណត់ ក្នុងតំណាក់កាលដំបូងឡើយ​ ដោយ​ហេតុតែមាន​បញ្ហានៅទីតាំងផលិត​មួយ​កន្លែង ដែល​ធ្វើឲ្យ​ចុះថយ ​នូវ​ចំនួនវ៉ាក់សាំងដែលអាចផលិត​បាន។

ដំណឹងស្តីពីការយឺតយ៉ាវនេះ បានធ្វើឲ្យ​ប្រទេសអឺរ៉ុបជាច្រើន សម្តែងការតវ៉ា និង​ ព្រួយ​បារម្ភផងដែរ ខណៈយុទ្ធនាការ​ចាក់វ៉ាក់សាំងទ្រង់ទ្រាយ​ធំ កំពុងតែប្រព្រឹត្តិធ្វើទៅ ហើ​យខ្លាចក្រែងថា មិនអាច​ចាក់ទៅលើ​ប្រជាជនឲ្យ​បានច្រើន ទាន់ពេលវេលា។ សូមបញ្ជាក់ថា សហភាព​អឺរ៉ុប បានបញ្ជាទិញ​វ៉ាក់សាំង របស់​មន្ទីរពិសោធន៍ AstraZeneca ចំនួន​៤០០លានដូស ក្នុងជំហ៊ានដំបូង ហើយ​ដែលគ្រោង​និង​ផ្តល់អាជ្ញាបណ្ណចែកចាយ​ នៅរវាង​ចុងខែ​មករានេះ។ តំណាងសុខាភិបាលអឺរ៉ុប បានសរសេរលើទំព័រ Twitter ថា កាលវិភាគ​ប្រគល់វ៉ាក់សាំង ត្រូវតែ​គោរពឲ្យ​បាន​ ដូចអ្វី​ដែលបាន​កំណត់ទុក។

គួរកត់សំគាល់ថា ដោយហេតុតែ​ការយឺតយ៉ាងនេះ ប្រទេស​អឺរ៉ុបខ្លះ ដូចជាឡេតូនី នឹងបានទទួលវ៉ាក់សាំង​តែចំនួន២០%ប៉ុណ្ណោះ នៅរវាង​ដើម​ខែកុម្ភៈ។ ប្រទេសអូទ្រីស ដែលនឹងត្រូវបានទទួលវ៉ាក់សាំងចំនួន ៥៦ម៉ឺនដូស និងបានទទួលតែប្រមាណ​៣៤ម៉ឺនទេ។ អ៊ុយអែដវិញដែលសង្ឃឹមបាន​ប្រមាណ​១លានដូស នឹងបានតែ​៧សែនដូសទេ។ ប្រទេសន័រវ៉េស មិនមែនសមាជិកសហភាពអឺរ៉ុប តែចូលរួមក្នុងការបញ្ជាទិញនេះដែរ នឹង​អាចទទួល​បានតែ​២០ម៉ឺនដូស ខុសពីចំនួន១លាន​១សែន​ដូស ដែល​បាន​កំណត់។

ដោយឡែក បារាំង និងអាល្លឺម៉ង់ មិនសូវរងផលប៉ះពាល់ខ្លាំងដោយការយឺតយ៉ាវ របស់​មន្ទីរពិសោធន៍ AstraZeneca នេះទេ។ តែយ៉ាងណា រដ្ឋាភិបាល​ប្រទេស២នេះ កំពុងព្យាយាមនិយាយពន្យល់​ប្រជាពលរដ្ឋ ថាកុំឲ្យ​ភ័យបារម្ភ ហើយ​ថាកាលវិភាគ​ចាក់វ៉ាក់សាំង និងអនុវត្តទៅតាមអ្វីដែលបានកំណត់ ឲ្យ​បានលឿនបំផុត។ ដោយឡែក ក្រុម​ប្រឹក្សាវិទ្យាសាស្ត្រជាន់ខ្ពស់របស់បារាំង ទើបបានចេញអនុសាសន៍ នៅថ្ងៃទៅ​២៣មករា ថា​ ការចាក់វ៉ាក់សាំងដូសទី២ អាចធ្វើទៅ​បាន​ ក្រោយ​ការចាក់លើកទី​១ចំនួន​៦សប្តាហ៍។ ការបន្ថែមគំលាតរយៈពេលនេះ នឹងអាចអនុញ្ញាត ឲ្យ​គេយកវ៉ាក់សាំងទៅ​ចាក់លើមនុស្សផ្សេងទៀត ឲ្យ​បានច្រើន។

សូមរំលឹកថា កាលពីសប្តាហ៍មុន ដំណឹងយឺតយ៉ាវនៃការប្រគល់វ៉ាក់សាំងរបស់មន្ទីរពិសោធន៍ Pfizer បានធ្វើ​ឲ្យ​ប្រទេសអឺរ៉ុប​ ខឹងសម្បាររួចទៅហើយ។ រដ្ឋាភិបាលអ៊ីតាលី បានទាំងបញ្ជាក់ថា មានបំណងប្តឹងមន្ទីរពិសោធន៍ Pfizer ពីបទមិន​គោរព​កាតព្វកិច្ច ដែលមានចែងក្នុងកិច្ចសន្យា។ លោក Clément Beaune រដ្ឋលេខាធិការបារាំងទទួល​បន្ទុកកិច្ចការអឺរ៉ុប បាន​លើកឡើងថា មន្ទីរពិសោធន៍ Pfizer ​ត្រូវតែផលិតនិងប្រគល់វ៉ាក់សាំងឲ្យ​បានគ្រប់ចំនួន​ ទៅតាមការសន្យា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI