ប្រែប្រួលអាកាសធាតុ

វេទិកា​កំពូលដំបូង​​បង្អស់ ស្តី​ពី​​វិធានការ​សម្របខ្លួន និង​ទប់ទល់​​ជាមួយ​​ការប្រែប្រួល​អាកាសធាតុ

រថយន្តអណ្តែតព្រោងព្រាត ដោយ​ទឺកជំនន់ទន្លេ​ Chamelecon នៅប្រទេសហុងឌូរ៉ាស ថ្ងៃទី​ ១៩ វិច្ឆិកា ២០២០
រថយន្តអណ្តែតព្រោងព្រាត ដោយ​ទឺកជំនន់ទន្លេ​ Chamelecon នៅប្រទេសហុងឌូរ៉ាស ថ្ងៃទី​ ១៩ វិច្ឆិកា ២០២០ REUTERS - Jorge Cabrera
ដោយ៖ ម៉ម ពិសី
១៥ នាទី

នៅថ្ងៃចន្ទទី​២៥មករានេះ ប្រទេសហូឡង់នឹង​ដឹកនាំ ការចាប់ផ្តើមវេទិកាកំពូលអន្តរជាតិមួយ ដើម្បី​ពិភាក្សាគ្នា រៀបចំវិធានការ​សម្របខ្លួន និងទប់ទល់ជាមួយ​នឹងបម្រែបម្រួលអាកាសធាតុ។ នេះជាលើកទីមួយហើយ ដែលមានវេទិកាអន្តរជាតិ ផ្តោតការយកចិត្តទុកដាក់ទៅលើបញ្ហានេះ។ លោកអគ្គលេខាធិការអង្គការសហប្រជាជាតិ ព្រមទាំងប្រមុខរដ្ឋប្រទេសធំៗជាច្រើន នឹងមានវត្តមាន​ពីចំងាយ​ តាមប្រព័ន្ធវីស្យូខុនហ្វឺរិនស៍ ដើម្បី​លើកជាយោបល់ ក៏ដូចជាការសន្យានានា ដើម្បីជួយ​ប្រទេស ឬតំបន់រងគ្រោះ ក្នុងការទប់ទល់​ជាមួយ​គ្រោះធម្មជាតិ។

ផ្សាយពាណិជ្ជកម្ម

មេដឹកនាំអន្តរជាតិធំៗ មាន​​លោកអង់តូនីញ៉ូ ហ្គូដតេស លោកបាន គីមូន លោកម៉ាក្រុង លោកបូរីស ចនសុន និងលោកស្រី​ មែរកិល ជាដើម​ នឹងមានវត្តពីចំងាយ​ នៅក្នុងការចាប់ផ្តើមបើក​​វេទិកា​អន្តរជាតិជាលើកទីមួយ ដែលមាន​ខ្លឹមសារផ្តោត​ ទៅលើការរកវិធីសម្របខ្លួន និងទប់ទល់ជាមួយ​នឹងបម្រែបម្រួលអាកាសធាតុ។ មិនត្រឹមតែរកវិធីសម្របខ្លួននោះទេ គឺត្រូវ​ឆក់ឱកាសថ្មី ដែលហុចឲ្យ​ដោយ​បម្រែបម្រួលអាកាសធាតុ ដូចជារដូវលូតលាស់ដែលវែងជាមុន ឬការរីកបន្ថែមនូវតំបន់ដាំដុសបានជាដើម។

គួរកត់សំគាល់ថា នេះជាលើកទីមួយ​ហើយ​ ដែល​មានវេទិកាអន្តរជាតិ ផ្តោតការយកចិត្តទុកដាក់លើបញ្ហានេះ។ កន្លងមក គឺគេបានតែនិយាយជជែកគ្នាអំពីការប្រយុទ្ធប្រឆាំង នឹងបម្រែបម្រួលអាកាសធាតុ ការកាត់បន្ថយឧស្ម័នពុល ឬកាត់បន្ថយកំដៅផែនដីជាដើម។ តែលើកនេះ គឺគេនឹងពិភាក្សាគ្នា លើកជាយុទ្ធសាស្ត្រ និងបេសកកម្ម ដើម្បីរកវិធីជួយ​ប្រទេស ឬតំបន់ដែលប្រឈមខ្លាំង ឲ្យ​អាចមានលទ្ធភាពសម្របខ្លួន ​ទប់ទល់ ជាមួយ​បញ្ហា​អាកាសធាតុ​ ដែលមានដូចជា​ការឡើងកំពស់ទឹកសមុទ្រ គ្រោះធម្មជាតិទឹកជំនន់ ខ្យល់ព្យុះ និង​ការចុះថតនូវទិន្នផលកសិកម្មជាដើម។

យោងតាម​គេ​ហទំព័រ របស់អង្គការសហប្រជាជាតិ វេទិកា​កំពូលនេះ នឹងផ្តោតផងដែរអំពី​យុទ្ធសាស្ត្រ​ជំរុញ​ការបោះទុនវិនិយោគ​ថ្មីៗ ដើម្បីជួយ​កសិករ ដែលប្រឈមខ្លាំង​នឹង​កត្តាប្រែប្រួលអាកាសធាតុ។ គេនឹងជំរុញ​ការស្រេាវជ្រាវ​ផ្នែកកសិកម្ម បណ្តុះបណ្តាល​កសិករ និង​វិធីសាស្ត្រគ្រប់គ្រង​គ្រោះមហន្តរាយ។

លោក Mark Rutte នាយករដ្ឋមន្ត្រី​ហូឡង់ ដែល​ជាអ្នក​ដឹកនាំវេទិកានេះ បានលើកឡើងថា ប្រទេសហូឡង់ មានបទពិសោធន៍ជាច្រើនសតវត្សមកហើយ នៅក្នុង​ការប្រយុទ្ធ ទប់ទល់ជាមួយ​នឹង​​ការឡើងកំពស់ទឹកសមុទ្រ ព្រោះថា១ភាគ៣នៃដែនដីហូឡង់​​ គឺទាបជាងកំពស់ទឹកសមុទ្រ។ លោក​បន្ថែមថា បើសិនជាយើងទាំងអស់គ្នា មិន​រិះរកវិធីសម្របខ្លួន ទប់ទល់ជាមួយ​កត្តាអាកាសធាតុ​​ដែលប្រែប្រួលនេះទេ គឺផលប៉ះពាល់វិនាស នឹងមាន​ទំហំធំក្រៃទៅលើ​មនុស្ស។

ដោយឡែក នៅថ្ងៃចន្ទនេះដែរ របាយការណ៍មួយ របស់អង្គការ​ Germanwatch បានលើកឡើងថា ប្រមាណ​២០ឆ្នាំចុងក្រោយនេះ មានមនុស្ស​ប្រមាណ​កន្លះលាននាក់ បានស្លាប់ដោយគ្រោះធម្មជាតិធ្ងន់ធ្ងរ ហើយ​ប្រទេសដែលរងគ្រោះខ្លាំងបំផុត គឺប្រទេសក្រីក្រ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI