ចិន-វេទិកាសេដ្ឋកិច្ច

វេទិកាសេដ្ឋកិច្ចពិភពលោក៖ចិនតាំងខ្លួនជាជើងឯកពហុភាគីនិយម និងព្រមានប្រឆាំងនឹងសង្រ្គាមត្រជាក់ថ្មី

ថ្លែង​នៅ​ក្នុង​វេទិកាសេដ្ឋកិច្ចពិភពលោក ប្រធានាធិបតី​ចិន​លោក​ស៊ី ជីនពីង​បាន​តាំង​ខ្លួន​ជា​អ្នក​ការពារ​លើ​គោលការណ៍​ពហុភាគីនិយម និង​ព្រមាន​ប្រឆាំង​នឹង​សង្រ្គាមត្រជាក់​ថ្មី។
ថ្លែង​នៅ​ក្នុង​វេទិកាសេដ្ឋកិច្ចពិភពលោក ប្រធានាធិបតី​ចិន​លោក​ស៊ី ជីនពីង​បាន​តាំង​ខ្លួន​ជា​អ្នក​ការពារ​លើ​គោលការណ៍​ពហុភាគីនិយម និង​ព្រមាន​ប្រឆាំង​នឹង​សង្រ្គាមត្រជាក់​ថ្មី។ STR AFP/File
១៣ នាទី

នៅ​ថ្ងៃ​ចន្ទ ទី២៥ មករា ប្រធានាធិបតី​ចិន​លោក​ស៊ី ជីនពីង​បាន​តាំង​ខ្លួន​ជា​អ្នក​ការពារ​លើ​គោលការណ៍​ពហុភាគីនិយម និង​ព្រមាន​ប្រឆាំង​នឹង​សង្រ្គាមត្រជាក់​ថ្មី។ លោក​ស៊ី ជីនពីង​បាន​ថ្លែង​ដូច​នេះ​នៅ​ក្នុង​ពិធី​បើក​វេទិកា​សេដ្ឋកិច្ច​ពិភពលោក​តាម​អនឡាញ។ តែ​សម្តី​តាំង​ខ្លួន​ជា​ជើងឯក​ពហុភាគីនិយម​របស់​លោក​ស៊ី​ត្រូវ​បាន​រង​ការ​រិះគន់​ពី​នាយក​អង្គការ​សិទ្ធិមនុស្ស Human Rights Watch លោក Kenneth Roth។ លោក Roth បាន​ស្តីបន្ទោស​លោក​ស៊ី​ក្នុង​រឿង​ជំងឺ​កូវីដ១៩ ពិសេស​មិន​បាន​សហការ​ដោយ​តម្លាភាព​ជាមួយ​ក្រុម​អ្នកស៊ើបអង្កេត​អន្តរជាតិ​ដើម្បី​ស្វែង​រក​អត្តសញ្ញាណ និង​ប្រភពដើម​របស់​វីរុស​កូវីដ១៩។

ផ្សាយពាណិជ្ជកម្ម

ថ្លែង​នា​ឱកាស​វេទិកា​សេដ្ឋកិច្ច​តាម​អនឡាញ​ក្នុង​ថ្ងៃ​ចន្ទ ទី២៥ មករា ប្រធានាធិបតី​ចិន​លោក​ស៊ី ជីនពីង​បាន​ព្រមាន​ថា ការ​បង្កើត​បក្ខពួក ឬ​ការ​បញ្ឆេះ​សង្រ្គាមត្រជាក់​ថ្មី ការ​ទាត់ចោល ការ​គំរាមកំហែង និង​ការ​បំភិតបំភ័យ​អ្នក​ដទៃ ការ​ធ្វើ​ឲ្យ​ក្រឡាប់​ចាក់​នូវ​សង្វាក់​ផ្គត់ផ្គង់ ឬ​មួយ​ក៏​ការ​ដាក់​ទណ្ឌកម្ម​ដើម្បី​ធ្វើ​ឲ្យ​ប្រទេស​ណា​ឯកោ គឺ​ជា​ទង្វើ​ដែល​នឹង​ជំរុញ​ពិភពលោក​ទៅ​រក​ការ​បែកបាក់ និង​ការ​ប្រឈម​មុខ​ដាក់​គ្នា។ ទោះ​បី​ជា​លោក​ស៊ី ជីនពីង​មិន​បាន​និយាយ​ចំ​ឈ្មោះ​ប្រទេស​ណាមួយ​ក៏​ដោយ​ក៏​គេ​ដឹង​ថា​លោក​ចង់​និយាយ​សំដៅ​សហរដ្ឋអាមេរិក។

សហរដ្ឋអាមេរិក​ក្នុង​ជំនាន់​ប្រធានាធិបតី​លោក​ដូណាល់ ត្រាំ​រយៈពេល ៤ឆ្នាំ លោក​ត្រាំ​បាន​ជ្រើស​យក​ផ្លូវ​ប្រឈម​មុខ​ទល់​នឹង​ចិន ពិសេស​ក្នុង​សំណុំរឿង​ពាណិជ្ជកម្ម។ តែ​លទ្ធផល​ដែល​លោក​ត្រាំ​ទទួល​បាន​ហាក់​នៅ​ឆ្ងាយ​ពី​ក្តី​សង្ឃឹម​របស់​លោក ព្រោះ​នៅ ៤ឆ្នាំ​ក្រោយ​មក កម្រិត​ឱនភាព​ពាណិជ្ជកម្ម​ដែល​សហរដ្ឋអាមេរិក​មាន​ចំពោះ​ចិន​នៅ​តែ​មាន​ច្រើន​ដដែល។ សករាជ​លោក​ដូណាល់ ត្រាំ​បាន​គិត​ប្រយោជន៍​អាមេរិក​ជា​អាទិភាព​បាន​បិទបញ្ចប់​ហើយ តែ​មិន​ច្បាស់​ថា​សករាជ​លោក​ចូ បៃដិន​នឹង​មាន​ជំហរ​ផ្ទុយ​ស្រឡះ​ពី​លោក​ត្រាំ​នោះ​ទេ។

ក្នុង​ថ្ងៃ​ចន្ទ ទី២៥ មករា លោក​បៃដិន​បាន​ចុះ​ហត្ថលេខា​លើ​ក្រឹត្យ​មួយ​ដោយ​ជំរុញ​រដ្ឋបាល​សហព័ន្ធ​ឲ្យ​ទិញ​ផលិផល និង​សេវាកម្ម​របស់​ក្រុមហ៊ុន រោងចក្រ​អាមេរិក​ជាជាង​របស់​បរទេស។ ជំហរ​របស់​លោក​បៃដិន​នេះ​អាច​នឹង​បង្ក​ឲ្យ​មាន​កំហឹង​ពី​ដៃគូ​ពាណិជ្ជកម្ម​មួយ​ចំនួន​របស់​សហរដ្ឋអាមេរិក។ សុន្ទរកថា​តាំង​ខ្លួន​ជា​អ្នក​ការពារ​ពហុភាគី​និយម​របស់​ប្រធានាធិបតី​ចិន​លោក​ស៊ី ជីនពីង​ត្រូវ​បាន​នាយក​អង្គការ​សិទ្ធិមនុស្ស Human Rights Watch លោក Kenneth Roth យល់​ថា គ្រាន់​ជា​ទ្រឹស្តី​ប៉ុណ្ណោះ។ លោក Rioth បាន​ស្តីបន្ទោស​ចិន​ពី​បទ​គ្មាន​តម្លាភាព​ពាក់ព័ន្ធ​នឹង​ជំងឺ​កូវីដ១៩ និង​មិន​បាន​រួម​សហការ​ពេញ​ទំហឹង​ជាមួយ​ក្រុម​អ្នកជំនាញ​អន្តរជាតិ​ដើម្បី​ស៊ើបអង្កេត​ស្វែង​រក​អត្តសញ្ញាណ និង​ប្រភពដើម​របស់​វីរុស​កូវីដ១៩៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI