អឺរ៉ុប-រុស្ស៊ី

អឺរ៉ុប​នឹង​ដាក់​ទណ្ឌកម្មរុស្ស៊ី ដោយ​ពិគ្រោះ​យោបល់​ជាមួយ​សហរដ្ឋ​អាមេរិក

ប្រមុខ​ការ​ទូត​អឺរ៉ុប និង​រដ្ឋមន្ត្រីការបរទេសរុស្ស៊ី
ប្រមុខ​ការ​ទូត​អឺរ៉ុប និង​រដ្ឋមន្ត្រីការបរទេសរុស្ស៊ី via REUTERS - RUSSIAN FOREIGN MINISTRY
ដោយ៖ អៀង សុខម៉ិញ
១៥ នាទី

អឺរ៉ុប​និង​សហរដ្ឋ​អាមេរិក​ នឹង​ជួប​ពិគ្រោះយោបល់​គ្នា នៅ​ថ្ងៃ​ចន្ទ​ទី ២២កុម្ភៈ នៅ​ទីក្រុង​ព្រុចសែល ប្រទេស​ប៊ែលហ្សិក ស្តី​អំពី​យុទ្ធសាស្ត្រ​​​ប្រឈម​នឹង​រុស្ស៊ី។ បើ​តាមរដ្ឋ​សមាជិក សហភាព​អឺរ៉ុប​នឹង​ដាក់ឱ្យ​ដំណើរ​ការ​ជា​លើក​ទី​មួយ យន្តការ​ពិភពលោក​ដាក់​ទណ្ឌកម្ម​​​ប្រឆាំង​នឹង​រុស្ស៊ី​ដែល​មិន​គោរព​សិទ្ធិមនុស្ស ចាប់​មេបក្ស​ប្រឆាំង​ដាក់​ទោស​និង​គំរាម​យក​ទៅឃុំ​នៅ​ជំរំ​លត់ដំ​ធ្វើការ​ជា​ទម្ងន់។

ផ្សាយពាណិជ្ជកម្ម

ទំនាក់ទំនង​ដ៏​តាន​តឹងជាមួយ​ម៉ូស្គូ ជា​ប្រធានបទស្នូល​នៃ​ជំនួបប្រជុំ​​រដ្ឋមន្ត្រីការបរទេស​សហភាពអឺរ៉ុប​ទាំង​២៧។ ជំនួប​ប្រជុំ​តាម​វីដេអូខុនហ្វេរ៉ង់ ដែលបាន​​ការចូល​រួមរបស់​​ប្រមុខ​ការ​ទូត​ថ្មី​របស់​អាមេរិកផង​នោះ មាន​កម្មវត្ថុស្វែង​​វិធានការ​តប​ទៅ​នឹង​រុស្ស៊ី​វិញ ដែល​មិនទទួលឮ​​សំណើរបស់​​អឺរ៉ុប​សុំឱ្យ​​ដោះលែង​មេបក្សប្រឆាំង​ អាឡិចសី ណាវ៉ានី Alexeï Navalny សោះ។

តាម​រយៈ​ទស្សនកិច្ច​នៅ​​ទីក្រុង​ម៉ូស្គូរបស់​លោក​ប្រមុខ​ការ​ទូត​អឺរ៉ុប Josep Borrell កាលពី​ដើម​ខែ​កុម្ភៈ អឺរ៉ុប​បាន​ឃើញ បាន​យល់ និង​បាន​ស្រង់​ជា​មេរៀន​ថា ​ត្រូវ​ឆ្លើយ​តប​ទៅ​នឹង​រុស្ស៊ី​វិញ​ដោយ​ប្រើ​​យុទ្ធសាស្ត្រ​រួម​ មានរចនា​សម្ព័ន្ធ​ច្បាស់​លាស់​។ ម៉ូស្គូ​មិន​ត្រូវ​ការ​ចរចា​ជា​មួយ​សហភាព​អឺរ៉ុប​ទេ គឺ​ចង់​​និយាយ​តែ​ជា​មួយ​សមាជិក​អឺរ៉ុបខ្លះ​តែ​ប៉ុណ្ណោះ ដូច្នេះ​អឺរ៉ុប​ត្រូវ​បង្ហាញ​សាមគ្គីភាព​រួប​រួមគ្នា​បំផុត​ទើប​អាច​យក​ឈ្នះ​រុស្ស៊ី​បាន។ នេះ​ជា​សារ​មួយ​ដែល​អឺរ៉ុប​ត្រូវ​ផ្តល់​ឱ្យ​រដ្ឋ​ជា​សមាជិក​ទាំង​អស់ ដែល​ខ្លះ​ហាក់​នៅ​មិន​ទាន់​ជ្រួត​ជ្រាប និង​កំពុង​បន្ត​រិះគន់​លោក​ប្រមុខ​ការ​ទូត​អឺរ៉ុប​ទៀត​ផង។

ប៉ុន្តែ​ នេះ​​ជា​លើកទី​មួយ​ដែល​អឺរ៉ុប​ប្រើ​យន្តការ​ពិភពលោក​ដាក់ទណ្ឌកម្ម​ប្រទេសមួយ​ស្តី​ពី​បញ្ហា​សិទ្ធិមនុស្ស។ បញ្ជី​ទណ្ឌកម្ម​បាប់លេច​ជា​រូប​រាង ​មានទាំង​ឈ្មោះមហាសេដ្ឋី អ្នកកាសែត​ស្និទ្ធ​នឹង​ក្រុង​ម៉ូស្គូផង ឬ​ការ​ដាក់សម្ពាធ​អាល្លឺម៉ង់ឱ្យ​បោះបង់គម្រោង​សាង​សង់​បំពង់បង្ហូរ​ឧស្ម័ន​ជាមួយ​រុស្ស៊ី​ផង។ ​រដ្ឋមន្ត្រី​សហភាព​អឺរ៉ុប​ទាំង​អស់​នឹង​ត្រូវ​សម្រេច​ចិត្ត​រួម​គ្នា​រៀប​ចំ​ទណ្ឌកម្ម​ថ្មី​ និង​អត្តសញ្ញា​បុគ្គលឬ​ក្រុមហ៊ុន​ដែល​រង​ទណ្ឌកម្ម។ សេចក្តីសម្រេច​នេះ​នឹង​ត្រូវ​ឆ្លង​កាត់​ការ​អនុម័តនយោបាយ​​ ​ក្នុង​​ជំនួប​កំពូលសហភាព​អឺរ៉ុប ​នា​ថ្ងៃ​ទី ២៥-២៦មីនា​ខាង​មុខ។ តែ​មើល​ទៅ​ទណ្ឌកម្ម​ហាក់​ដូច​ជា​ពិបាក​ចេញ​ណាស់ ព្រោះ​ទាំង​អាមេរិក​ក៏​ដូច​ជា​អឺរ៉ុប នៅ​តែ​ចង់​មាន​ទំនាក់ទំនង​វិជ្ជមាន​ខ្លះ​ជា​និច្ច​ជាមួយ​រុស្ស៊ី​។

ដោយ​ឡែក​ ការ​​វិលត្រលប់​របស់​សហរដ្ឋ​អាមេរិកក្នុង​សំណុំរឿង​​នុយក្លេអ៊ែរ​អ៊ីរ៉ង់ ការ​ដាក់ទណ្ឌកម្ម​ប្រឆាំង​របប​យោធា​ភូមាដែល​​ធ្វើ​រដ្ឋប្រហារ​យោធា​ទម្លាក់​រដ្ឋាភិបាល​ស៊ីវិល ឬ​ ការ​ពង្រីក​អំណាច​របស់​ចិន​នៅ​ហុងកុង​ជា​ដើម។ល។ ក៏​ជា​ប្រធានបទ​នៃកិច្ចពិភាក្សា​រវាង​រដ្ឋមន្ត្រីការបរទេស​អឺរ៉ុប​ទាំង​២៧ និង​សហរដ្ឋ​អាមេរិក។ វត្តមាន​របស់​លោក​ប្រមុខ​ការ​ទូត​​អាមេរិកការ​​​យល់​ព្រម​ចូលប្រជុំ​​ពិគ្រោះ​យោបល់​ជាមួយ​អឺរ៉ុប ក្រោយ​ពី​បានទទួល​តំណែង​ជាផ្លូវការភ្លាម​​ដូច្នេះ ជា​សញ្ញា​ដ៏​វិជ្ជមាន​ណាស់​សម្រាប់​អឺរ៉ុប​និង​សារ​បញ្ជាក់​អំពី​ឆន្ទៈ​ពិត​របស់​ប្រធានាធិបតី​ ចូបៃដិន ក្នុង​ការ​ចង​ភ្ជាប់​ទំនាក់​ទំនង​ជាមួយ​អឺរ៉ុប​ឡើង​វិញ​មែន មិនមែន​មើ​ល​អឺរ៉ុប​ជា​សត្រូវ​ដូច​រដ្ឋាបាល​មុន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI