វ៉ាក់សាំង​បង្ការកូវីដ

ប្រធានអង្គការសុខភាពពិភពលោករិះគន់ប្រទេស​អ្នកមានដែល​នៅបន្ត​ដណ្តើមទិញវ៉ាក់សាំងបង្ការកូវីដ​១៩

អគ្គនាយក​អង្គការ​សុខភាពពិភពលោក លោកTedros Adhanom Ghebreyesus, នៅក្នុង​សន្នីសីទ​វិដេអូ​ជាមួយ​ប្រធានាធិបតី អាល្លឺម៉ង់ លោក​Frank-Walter Steinmeier នៅទីក្រុង​ប៊ែរឡាំង​ថ្ងៃទី ២២​កុម្ភៈ ២០២១
អគ្គនាយក​អង្គការ​សុខភាពពិភពលោក លោកTedros Adhanom Ghebreyesus, នៅក្នុង​សន្នីសីទ​វិដេអូ​ជាមួយ​ប្រធានាធិបតី អាល្លឺម៉ង់ លោក​Frank-Walter Steinmeier នៅទីក្រុង​ប៊ែរឡាំង​ថ្ងៃទី ២២​កុម្ភៈ ២០២១ AP - Markus Schreiber
ដោយ៖ ឈាង បុប្ផា
២០ នាទី

ប្រធាន​អង្គការ​សុខភាព​ពិភពលោក លោក​Tedro Adhanom Ghebreyesus បាន​អំពាវនាវ​សុំ​ឲ្យប្រទេស​អ្នកមាន​ឈប់​ទិញ​វ៉ាក់សាំង​បន្ថែម ព្រោះថា ធ្វើដូច្នេះ វា​នឹង​ទៅ​បំផ្លាញ ផែនការ​ចែកចាយ​វ៉ាក់សាំង​របស់​យន្តការ​កូវ៉ាក់​របស់​អង្គការ​សហប្រជាជាតិ សម្រាប់​ប្រទេស​ក្រីក្រ។ ថ្លែង​នៅក្នុង​សន្និសីទ​កាសែត​វីដេអូ ជាមួយ​រដ្ឋមន្រ្តី ការបរទេស​អាល្លឺម៉ង់ កាលពី ថ្ងៃ ចន្ទ​ម្សិលមិញ ប្រធាន​អង្គការ​សុខភាព​ពិភពលោក​បាន​រិះគន់ ដោយ​មិន​បញ្ចេញឈ្មោះ ក្រុមប្រទេស​អ្នកមាន​មួយចំនួន ដែល​នៅបន្ត​ទិញ វ៉ាក់សាំង សម្រាប់​ប្រជាជន​របស់ខ្លួន ដោយ​មិន​ខ្វល់​ពី​សុខទុក្ខ​របស់​ប្រទេស​ដទៃ។

ផ្សាយពាណិជ្ជកម្ម

យន្តការ​កូវ៉ាក់ Covax របស់​អង្គការសុខភាព​ពិភពលោក សម្រាប់​បែងចែក​វ៉ាក់សាំង​បង្ការ​ជំងឺកូវីដ ប្រកបដោយ​សមភាព នៅក្នុង​ពិភពលោក នៅតែ​ជួប​ឧបសគ្គ ដោយសារ​នយោបាយ​ជាតិនិយម​របស់​ក្រុមប្រទេស​អ្នកមាន។ តាមប្រធាន​អង្គការ​សុខភាព​ពិភពលោក​ ក្រុមប្រទេស​អ្នកមាន​នៅតែ​បន្ត ចរចា ផ្ទាល់​ជាមួយ​ក្រុមហ៊ុន​ផលិត​វ៉ាក់សាំង ដើម្បី ទិញវ៉ាក់សាំង​បង្ការជំងឺកូវីដ បន្ថែមទៀត។ ការទាមទារ ចង់បាន​គ្មាន​ស្កប់ស្កល់​របស់​ក្រុមប្រទេស​អ្នកមាន​បាន​ប៉ះពាល់​ដល់​យន្តការ​កូវ៉ាក់​Covax  ព្រោះថា នៅ​ពេល​ប្រទេស​អ្នកមាន ទាមទារ​ចង់​ទិញ វ៉ាក់សាំង កាន់តែ​ច្រើនពេលណា ចំនួន​វ៉ាក់សាំង​ដែលយន្តការ​កូវ៉ាក់ ត្រូវ​ទទួល​បាន​ពី​ក្រុមហ៊ុន​ផលិតវ៉ាក់សាំង ក៏ត្រូវ​កាត់បន្ថយ ទៅតាមនោះដែរ។

បង្កើត និង​ចាត់ចែង​ដោយ​អង្គការ​សុខភាព​ពិភពលោក យន្តការកូវ៉ាក់ មាន​គោលដៅ ប្រមូល​ទិញ​វ៉ាក់សាំង សម្រាប់ ចែកចាយ វ៉ាក់សាំង ដល់​ប្រទេស​ក្រីក្រ ចំនួន ៩២ ដែល​បាន​ចុះឈ្មោះ​ក្នុង​យន្តការកូវ៉ាក់ ពោល​គឺ​ធ្វើយ៉ាងណា​កុំ​ឲ្យ​ប្រទេស​អ្នកមាន​ទិញ​ផ្តាច់មុខ វ៉ាក់សាំង ដែល​មានចំនួន មាន​កំណត់។ ដោយសារ​តែ​ខ្វះវ៉ាក់សាំង ដែល​ម្យ៉ាង​បណ្តាល​មក​ពី​ក្រុមហ៊ុន​មិនអាច​ផលិតទាន់​តាមតម្រូវការ និង​ដោយសារ​ក្រុមប្រទេស​អ្នកមាន​ដណ្តើមទិញ សម្រាប់​ចាក់​ឲ្យ​ប្រជាជន​របស់ខ្លួន អង្គការ​សុខភាព​ពិភពលោក​មិនអាច​ចែកចាយ​វ៉ាក់សាំង ទៅតាម​ការគ្រោងទុក​របស់ខ្លួន​ដែល​ត្រូវ​ធ្វើ​នៅ​ចុងខែ​កុម្ភៈ​នេះទេ នោះបើ​ទោះ​បី​ជា​ប្រទេស​អ្នកមានមួយចំនួន​បាន​ចាប់ផ្តើម​យុទ្ធនាការ​ចាក់វ៉ាក់សាំង តាំង​ពី ចុងឆ្នាំ ២០២០​ម្ល៉េះ។ សហរដ្ឋអាមេរិក អង់គ្លេស អ៊ីស្រាអែល ជា​ប្រទេស​នាំមុខ​គេ​ខាង​ចាក់វ៉ាក់សាំង​សម្រាប់​ប្រជាជន​ខ្លួន។ នៅ សប្តាហ៍នេះ អ៊ីស្រាអែល ដែល​សម្រេច​គោលដៅ ចាក់​វ៉ាក់សាំង​ឲ្យ​ប្រជាជន​របស់ខ្លួន ប្រមាណ ៤៥% បាន​ប្រកាស​បើក​ប្រទេស​បណ្តើរៗឡើងវិញ។

វាដូចជា​ការចំអក​នៃ​ព្រហ្មលិខិត។ នៅពេល ប្រទេស​មហាអំណាច​ឧស្សាហកម្ម សន្យា​ផ្តល់​ថវិកា​ជាង ៧ពាន់លានដុល្លារ សម្រាប់យន្តការ​កូវ៉ាក់ ប្រធាន​អង្គការ​សុខភាព​ពិភពលោក វាយតម្លៃ ថា មាន​លុយ​គឺ​គ្មាន​ប្រយោជន៍​នោះទេ ព្រោះថា មានលុយហើយ គេនៅតែ​មិនអាច​ទិញ វ៉ាក់សាំង​បាន​ដដែល។

អគ្គនាយក អង្គការ​សុខភាព​ពិភពលោក​ធ្លាប់​បាន​អំពាវនាវ​សុំ​ឲ្យ​ក្រុមប្រទេស​អ្នកមាន ឈប់​ចរចា ទ្វេភាគី ដើម្បី ទិញ​វ៉ាក់សាំងពី​ក្រុមហ៊ុន​ផលិតវ៉ាក់សាំង​ធំៗ​ដូចជា Pfizer AstraZeneca ដើម្បី ផ្តល់​អាទិភាព ទុក​ឱកាស ឲ្យ​យន្តការ​Covax អាច ទិញ វ៉ាក់សាំង​ក្នុង​តម្លៃ​សមរម្យ សម្រាប់​យក​ទៅ ជួយ​បណ្តាប្រទេស​ក្រីក្រ។ ប៉ុន្តែ នៅ​ថ្ងៃ​ចន្ទ អគ្គនាយករូបនេះ បាន​និយាយ​ដោយ​ខឹងសម្បារ ថា លោក​មិនគិតថា ប្រទេស​អ្នកមាន​គិត​ពី សីលធម៌​អ្វីនោះទេ។

ថ្លែង​ក្នុង​សន្និសីទ​វីដេអូ​ជាមួយ​ប្រធាន​អង្គការ​សុខភាព​ពិភពលោក ប្រធានាធិបតី អាល្លឺម៉ង់ លោក​Frank Walter Steinmeier យល់ស្រប​ថា វ៉ាក់សាំង បង្ការកូវីដ គួរ​ត្រូវ​ចែកចាយ​ឲ្យបានទូលំទូលាយ មិនថា សម្រាប់​សីលធម៌ និង សម្រាប់​ផលប្រយោជន៍​រួម ព្រោះគេ​ត្រូវ​យល់ថា ដើម្បី លុបបំបាត់ចោល​ជំងឺរាតត្បាត​កូវីដ ឲ្យបាន​ឆាប់រហ័ស គេត្រូវ​ចាក់វ៉ាក់សាំង​នៅ​គ្រប់កន្លែង ក្នុង​ពិភពលោក។ ប៉ុន្តែ យ៉ាងណាក៏ដោយ ប្រមុខរដ្ឋ​អាល្លឺម៉ង់ នៅតែ​ទទួលស្គាល់ថា គ្រប់រដ្ឋាភិបាល​គឺ​តែង​តែ​គិត​មុនដំបូងគេ​បំផុត គឺ​កាតព្វកិច្ច​សម្រាប់​ប្រជាជន​របស់ខ្លួន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI