បារាំង-សាកូហ្ស៊ី

​អតីត​ប្រធានាធិបតី​បារាំង​ លោក​នីកូឡា សាកូហ្ស៊ី​ ​ជាប់​ពន្ធនាគារ​បី​ឆ្នាំ ពី​បទ​ពុករលួយ

អតីត​ប្រធានាធិបតី​ នីកូឡា សាកូហ្ស៊ី ត្រូវ​តុលាការ​កាត់ទោស​ឱ្យ​ជាប់​ពន្ធនាគារ​បី​ឆ្នាំ​ ដោយ​មួយ​ឆ្នាំ​នៅ​ក្នុង​ឃុំ
អតីត​ប្រធានាធិបតី​ នីកូឡា សាកូហ្ស៊ី ត្រូវ​តុលាការ​កាត់ទោស​ឱ្យ​ជាប់​ពន្ធនាគារ​បី​ឆ្នាំ​ ដោយ​មួយ​ឆ្នាំ​នៅ​ក្នុង​ឃុំ Bertrand Guay AFP/Archivos

លោក​ នីកូឡា សាកូហ្ស៊ី (Nicolas Sarkozy) អតីត​ប្រធានាធិបតី​បារាំង ពី​ឆ្នាំ​២០០៧-២០១២ ត្រូវ​បាន​តុលាការបទ​ល្មើសមជ្ឈឹមប្រកាស​សាលក្រម​​ថានៅ​ថ្ងៃ​ទី ១ មីនា ២០២១​នេះ មាន​ទោស ​​ប្រព្រឹត្ត​អំពើ​ពុក​រលួយ​ និង​រំលោភអំណាច។ ជាមួយ​កំហុស​នេះ តុលាការ​សម្រេច​​កាត់​ទោស​ ឱ្យ​ជាប់ពន្ធនាគារ​​បី​ឆ្នាំ​ ដោយត្រូវ​ជាប់​ឃុំឃាំង​ក្នុង​ពន្ធនាគារ​​ចំនួន​មួយ​ឆ្នាំ។ តែ​លោក​សាកូហ្ស៊ី អាច​ធ្វើ​បណ្តឹង​ឧទ្ធរណ៍​បាន។

ផ្សាយពាណិជ្ជកម្ម

នៅ​ថ្ងៃ​ទី​១​មីនា ២០២១​នេះ លោកនីកូឡា សាកូហ្ស៊ី បាន​ក្លាយ​ជាអតីត​​ប្រធានាធិបតី​បារាំង​ទី​ពីរ នៃ​របប​សាធារណរដ្ឋ​ទី​៥ ដែល​​តុលាការ​​បាន​កាត់​ទោស​ឱ្យ​ជាប់​ពន្ធនាគារ ពី​បទ​បាន​ប្រព្រឹត្ត​អំពើ​ពុក​រលួយ និង​ប្រើ​អំណាច។ ក្រោយពី​បាន​ឮ​សាលក្រមសម្រេច​​ដាក់ទោសលោក​ឱ្យ​ជាប់​ពន្ធនាគារ​បី​ឆ្នាំ ក្នុង​នោះពីរ​ឆ្នាំ​នៅក្រៅ​ឃុំ​​​ភ្លាម លោកអតីត​ប្រធានាធិបតី​បាន​ចាក​ចេញ​ពី​តុលាការ​ដោយ​ពុំ​មាន​ធ្វើ​អត្ថាធិប្បាយ​​អ្វីទាំង​អស់។ តែលោក​នៅ​មាន​លទ្ធភាព​តវ៉ា​នៅ​​សាលា​ឧទ្ធរណ៍​បាន​ទៀត។

សំណុំ​រឿង​ពុក​រលួយ​ដែល​តុលាការ​បាន​បន្ទោស​លោក​នីកូឡា​សាកូហ្ស៊ី បាន​កើត​ឡើង​កាលពី ឆ្នាំ​២០១៤។ នៅ​ឆ្នាំនោះ​ លោក​អតីត​ប្រធានាធិបតី​បាន​សាកល្បង​ស្វែងព័ត៌មានសម្ងាត់ពាក់ព័ន្ធ​នឹងលោក​ក្នុង​​​សំណុំ​រឿង​ផ្សេង​មួយ​ទៀត តាមរយៈ​​មិត្ត​ជំនិតជាមេធាវី​លោក  Thierry Herzog ពី​​លោកចៅក្រម Gilbert Azibert ​ ជា​ថ្នូរ​នឹង​ការ​ធ្វើ​អន្តរាគមន៍ជួយ​ឱ្យ​បាន​ទទួលតំណែង​ធំមួយ​នៅ​ម៉ូណាកូ។

បើ​តាម​មេធាវី​ លោក​អតីត​ប្រធានាធិបតី​មិន​បាន​ទទួល​ព័ត៌មាន​សម្ងាត់​ដែល​ចង់​បាន​ទេ ហើយ​ចៅក្រម​ ក៏​​មិន​បាន​​ទទួល​តំណែងនៅ​ម៉ូណាកូដែរ ប៉ុន្តែ​តុលាការ​យល់​ថា​ទោះ​គ្រប់​ភាគី​មិន​បានទទួល​​ផល​អ្វីនិង​មិន​បានប្រើ​​ឥទ្ធិពលដោយ​ជាក់​ស្តែង​ក៏​ដោយ​ ក៏​នេះ​ជា​បទ​ល្មើស​ពុករលួយ​និង​ជាការ​ប្រើ​អំណាច​ដែរ។ ជាការ​​ឃុបឃិត​ប្រព្រឹត្ត​អំពើ​ពុករលួយ​រវាងមនុស្ស​បី​នាក់។ ធ្លាប់​ជា​អ្នក​ធានា​ឯករាជ្យ​នៃ​អំណាច​តុលាការ ​តែ​បែ​រជា​ប្រើឈ្មោះ​ជា​អតីត​ប្រធានាធិបតី​ដើម្បី​ដំឡើង​ថាន្តរសក្តិចៅក្រម​ម្នាក់​ដែល​បំរើ​ប្រយោជន៍​ផ្ទាល់​ខ្លួន​ទៅវិញ។ នេះបើ​តាម​សេចក្តី​ថ្លែងការណ៍​របស់​ប្រធាន​ក្រុម​ចៅក្រម​នៃ​តុលាការ​បទ​ល្មើស​មជ្ឈឹម​ក្រុង​ប៉ារីស។

ចំណែកមេធាវី Herzog ​ និង​ចៅក្រម Gilbert Azibert ត្រូវ​បាន​តុលាការ​ដាក់​ទោសឱ្យ​ជាប់​​ពន្ធនាគារ​​បី​ឆ្នាំ តែ​ពីរ​ឆ្នាំ​នៅ​ក្រៅ​ឃុំ​ ​​ពី​បទ​ប្រព្រឹត្ត​អំពើ​ពុក​រលួយ​សកម្ម និង​រំលោភ​ការ​សម្ងាត់​វិជ្ជាជីវៈ។

សូមបញ្ជាក់​ថាបន្ទាប់​ពី​សាលក្រម​នេះ លោកអតីត​ប្រធានាធិបតី​​នីកូឡាសាកូហ្ស៊ី ត្រូវ​បង្ហាញ​ខ្លួន​នៅ​មុខ​តុលាការ​នៅ​ថ្ងៃ​ទី ១៧​មីនា​សប្តាហ៍​ខាង​មុខ ក្នុង​សំណុំរឿង​ក្តីមួយ​ទៀត​ ពាក់ព័ន្ធ​នឹង​ការ​ប្រើ​ថវិកា​មិន​ត្រឹមត្រូវ​ក្នុង​យុទ្ធនាការ​ឃោសនា​បោះឆ្នោត​ឆ្នាំ​២០១២។ ដក​ខ្លួន​ចេញ​ពី​នយោបាយ​នៅ​ឆ្នាំ​២០១៦ លោកនីកូឡា សាកូហ្ស៊ី​ នៅ​តែមាន​ប្រជាប្រិយភាព​ខ្ពស់ក្នុង​រង្វង់​អ្នក​ស្តាំនិយម។ តែ​​នៅ​មួយ​ឆ្នាំ​មុន​ការ​បោះឆ្នោត​ប្រធានាធិបតី​បារាំង​ជា​ថ្មី លោក​អតីតប្រធានាធិបតី​ស្ថិត​ក្រោមសម្ពាធ​តុលាការ​ជាងពេល​ណាៗ​ទាំង​អស់។  លោក​នីកូឡា​សាកូហ្ស៊ី ជា​​អតីត​ប្រធានាធិបតីទីពីរ​​ បន្ទាប់​ពី​លោក​​ ហ្សាក់ ស្ហ៊ីរ៉ាក់ ដែល​ត្រូវ​បាន​តុលាការ​កាត់​ទោស៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI