វ៉ាក់សាំងកូវីដ១៩

ការសិក្សា ៖ អត្រា​ពលរដ្ឋសុខចិត្ត​ចាក់​ថ្នាំ​បង្ការ​កូវីដ​១៩​កើន​ឡើង​ខ្លាំង

អត្រា​ពលរដ្ឋ​សុខចិត្ត​ចាក់​ថ្នាំ​បង្ការ​កើន​ឡើង​ខ្លាំង
អត្រា​ពលរដ្ឋ​សុខចិត្ត​ចាក់​ថ្នាំ​បង្ការ​កើន​ឡើង​ខ្លាំង Christophe ARCHAMBAULT AFP

អត្រា​ប្រជាជនសុខចិត្ត​​ចាក់​វ៉ាក់សាំង​ប្រឆាំង​កូវីដ​១៩ បាន​កើន​ឡើង​នៅក្នុង​ស្ទើរ​គ្រប់​ប្រទេស​ មិន​ថា​​នៅ​អង់គ្លេស​ សហរដ្ឋអាមេរិក ឬ​បារាំង​ដែល​ល្បី​ខាង​មិន​សូវ​ទុក​ចិត្ត​លើ​ថ្នាំ​បង្ការ​ទេ។ នេះ​បើ​តាមលទ្ធផល​នៃ​ការ​សិក្សា​អន្តរជាតិរបស់​ការិយាល័យ​​ Kekst CNC នៅក្នុង​៦ប្រទេស កាលពី​ពាក់កណ្តាលខែ​កុម្ភៈ និង​ដែល​ទើប​ចេញ​ផ្សាយ​នៅ​ថ្ងៃ​ចន្ទ​ទី ១​មីនា ២០២១។

ផ្សាយពាណិជ្ជកម្ម

ការ​សិក្សា​​នៅក្នុង​ប្រទេស​ចំនួន ៦ ៖ បារាំង អង់គ្លេស អាល្លឺម៉ង់ ជប៉ុន សហរដ្ឋ​អាមេរិក​និង​ស៊ុយអែត បាន​បង្ហាញពេល​នេះ មាន​​ប្រជាពលរដ្ឋ កាន់​តែ​ច្រើន​ឡើងៗ​ ​​សុខចិត្ត​ចាក់​ថ្នាំបង្ការ​ប្រឆាំង​នឹង​ជំងឺ​កូវីដ១៩។ កាលពី​ខែ​ធ្នូ​២០២០កន្លងទៅ នៅ​ប្រទេស​បារាំង​មាន​អ្នក​ព្រម​ចាក់​ថ្នាំបង្ការ​តែ​​ប្រមាណ​៤០%​ប៉ុណ្ណោះ តែ​ពេល​នេះ​អត្រា​អ្នក​ចង់​ចាក់​បាន​ឡើង​ដល់​៥៩%។ គួរ​ឱ្យ​សម្គាល់ថែមទៀត គឺនៅ​ប្រទេស​ស៊ុយអែត អត្រា​អ្នក​សុខ​ចិត្ត​ចាក់​ថ្នាំ​បង្ការ​ ឡើង​កាន់​តែ​ខ្ពស់​ខ្លាំង​ ​ដល់​ទៅ​៧៦%​ ទល់​នឹង​៥១%​កាលពី​ខែ​កញ្ញា២០២០។ អង់គ្លេស​ជា​ប្រទេស​មាន​អត្រា​ប្រជាជន​ព្រមចាក់​ថ្នាំ​បង្ការ ច្រើន​ជាង​គេ​បំផុត​ គឺ​ដល់​ទៅ​៨៩% មិន​មែន​ត្រឹម​តែ​៦៥%​ដូច​កាលពី​ខែកញ្ញា​២០២០ទេ។

មាន​ប្រជាពលរដ្ឋ​​កាន់​តែ​ច្រើន​ព្រម​ចាក់​ថ្នាំ​បង្ការ​ ការ​រិះគន់​ក៏​មានកាន់​តែ​ច្រើន​និង​ខ្លាំង​ដែរ ជុំ​វិញ​​​ដំណើរការ​​ចាក់​ថ្នាំ​បង្ការកូវីដ​នេះ។ មាន​តែ​ពលរដ្ឋ​អង់គ្លេស​ (បី​ភាគ​បួន) មួយ​ទេ​ដែល​​ពេញ​ចិត្ត​នឹង​ចំណាត់ការ​ចាក់​ថ្នាំ​បង្ការ​ដ៏​លឿន​រហ័ស​របស់​រដ្ឋាភិបាល​ តែ​អត្រា​នេះ​បានធ្លាក់​ចុះ​ខ្លាំង​នៅ​ប្រទេ​សផ្សេង ៖ ៣២%​នៅ​សហរដ្ឋ​អាមេរិក ២៦%​នៅ​បារាំង​និង​តែ​២០​ប៉ុណ្ណោះ នៅ​ស៊ុយអែត។ យុទ្ធនាការ​ចាក់​ថ្នាំបង្ការរបស់​អង់គ្លេស​ បន្ទាប់​មកអ៊ីស្រាអែល​មាន​ប្រសិទ្ធ​ភាពជាង​គេ។ នេះ​ការ​សិក្សា​ដដែល។

ស្តី​អំពី​អាទិភាព​សុខភាព​និង​សេដ្ឋកិច្ច​វិញ ប្រជាពលរដ្ឋ​ភាគ​ច្រើន​ចង់​ឃើញ​រដ្ឋាភិបាលរក្សា​វិធានការ​​ការពារ​សុខភាព មុន​​គិត​គូរ​លើកស្ទួយ​សេដ្ឋកិច្ច ៖  នៅ​អង់គ្លេស​ ក្នុង​ចំណោម​ពលរដ្ឋ១០​នាក់ ​៦នាក់​ចង់​ឱ្យ​រដ្ឋាភិបាល​គិត​គូរ​កំរិត​ការ​ចម្លង​មេរោគ​កូវីដ​១៩​- ៥០%​នៅ​ជប៉ុន ​(ទល់​នឹង​១៨%គាំទ្រ​វិធានការ​សេដ្ឋកិច្ច) និង​៤៧%​នៅ​អាល្លឺម៉ង់និង​ស៊ុយអែត (ទល់នឹងអាទិភាពសេដ្ឋកិច្ច ៣១%និង​២៩%)។ មាន​តែ​ពលរដ្ឋ​បារាំង​មួយ​ទេ​ដែល​ចង់​ឃើញ​រដ្ឋាភិបាល​ផ្តល់​អាទិភាពសេដ្ឋកិច្ច (៣៨%)​ច្រើន​ជាង​សុខភាព (៣៦%)។

មួយ​ឆ្នាំក្រោយ​ការរាតត្បាត​សកល ប្រជាពលរដ្ឋ​ភាគ​ច្រើន​នៅ​តែ​មិន​ទាន់ឱ្យ​ដក​វិធានការការពារ​សុខភាព បើ​ទោះ​បី​ចំនួន​អ្នក​ស្លាប់​និង​អ្នកឆ្លង​ចាប់​ចុះ​ថយ​ក៏​ដោយ។ ហើយ​ជា​ចុងក្រោយ​ ការស្ទង់​មតិ​បាន​បង្ហាញ​ថា​ពល​រដ្ឋ​ភាគច្រើន​មិន​ចង់​ឱ្យ​មាន​ការ​ប្រកួត​កីឡា​អូឡាំពិក​នៅ​តូក្យូ​ទេ។ ពលរដ្ឋ​ជប៉ុន​ផ្ទាល់​តែ​១៦%​ប៉ុណ្ណោះចង់​ឱ្យ​មាន​ព្រឹត្តិការណ៍​នេះ​ជា​ធម្មតា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI