នុយក្លេអ៊ែរអ៊ីរ៉ង់

នុយក្លេអ៊ែរអ៊ីរ៉ង់៖ ​AIEA​បារម្ភ​ខ្លាំង ខណៈអ៊ីរ៉ង់​គំរាម​​លែងសហការឲ្យ​ត្រួត​ពិនិត្យ

លោកអគ្គនាយក​ទីភ្នាក់ងារអន្តរជាតិថាមពលនុយក្លេអ៊ែរ IAEA​/AIEA Rafael Mariano Grossi នៅទីស្នាក់ការកណ្តាល ក្នុងទីក្រុងវីយែន ថ្ងៃទី១មីនា ២០២១
លោកអគ្គនាយក​ទីភ្នាក់ងារអន្តរជាតិថាមពលនុយក្លេអ៊ែរ IAEA​/AIEA Rafael Mariano Grossi នៅទីស្នាក់ការកណ្តាល ក្នុងទីក្រុងវីយែន ថ្ងៃទី១មីនា ២០២១ AP - Ronald Zak

នៅសប្តាហ៍នេះ ក្រុមប្រឹក្សាប្រទេសសមាជិក នៃទីភ្នាក់ងារថាមពលនុយក្លេអ៊ែរអន្តរជាតិ បានបើកការប្រជុំពិភាក្សាគ្នា ដើម្បី​រកវិធីការពារ​កិច្ចព្រមព្រៀងនុយក្លេអែរអ៊ីរ៉ង់។ ខណៈដែល​អ៊ីរ៉ង់បានគំរាមថា នឹងលុបចោលនូវ​ការអនុញ្ញាត លែង​​ឲ្យ​អ្នកជំនាញ​អន្តរជាតិ ចុះទៅពិនិត្យ​នៅតាមទីតាំងនុយក្លេអ៊ែររបស់ខ្លួន ប្រទេសអឺរ៉ុបធំៗទាំងបី បារាំង អង់គ្លេស អាល្លឺម៉ង់ ឯណោះវិញ មាន​​គំរោង​ស្នើសេចក្តីសម្រេចចិត្តរួមមួយ ដើម្បី​ប្រឆាំងអ៊ីរ៉ង់។ ទីភ្នាក់ងារថាមពលនុយក្លេអ៊ែរអន្តរជាតិ កំពុងតែបារម្ភ ថាស្ថាន​ភាពតានតឹងទាំងនេះ នឹងបំផ្លាញការប្រឹងប្រែង ក្នុងការការពារ​កិច្ចព្រមព្រៀងនុយក្លេអ៊ែរអ៊ីរ៉ង់។

ផ្សាយពាណិជ្ជកម្ម

យោងតាម​ប្រភពពីមន្ត្រីការទូត ភាគីបារាំង អាល្លឺម៉ង់ និងអង់គ្លេស នឹងស្នើទៅកាន់ក្រុមប្រឹក្សាប្រទេសសមាជិក នៃទីភ្នាក់ងារថាមពល​នុយក្លែអ៊ែរអន្តរជាតិ (AIEA) ឲ្យ​ចេញសេចក្តី​សម្រេចចិត្តរួម​មួយ ដើម្បី​ថ្កោលទោសអ៊ីរ៉ង់ ដែលចង់​បិទផ្លូវ លែងឲ្យ​អ្នកជំនាញ​អន្តរជាតិ ចុះទៅពិនិត្យ​នៅតាម​ទីតាំងនុយក្លេអ៊ែរ។ គំរោងសេចក្តីសម្រេចចិត្តរួមនេះ អាចនឹងត្រូវ​យកទៅឲ្យ​គេបោះឆ្នោត​សម្រេច នៅថ្ងៃសុក្រក្រោយ ហើយ​សហរដ្ឋអាមេរិក ក៏គាំទ្រដែរ។

សូមបញ្ជាក់ថា ដោយសារតែភាគីសហរដ្ឋអាមេរិក មិនព្រម​ដកទណ្ឌកម្មសេដ្ឋកិច្ចចេញ ភាគីអ៊ីរ៉ង់បានសម្រេចលុបចោលការអនុញ្ញាតការត្រួតពិនិត្យ នៅតាមទីតាំងខ្លះ នៃកម្មវិធីនុយក្លេអ៊ែររបស់ខ្លួន។ ​នៅថ្ងៃទី​២១កុម្ភៈ ទីភ្នាក់ងារនុយក្លេអ៊ែរអន្តរជាតិ បានបញ្ចុះបញ្ចូលអ៊ីរ៉ង់បានសម្រេច​ ដោយ​អ៊ីរ៉ង់ បានចុះកិច្ចព្រមព្រៀងបច្ចេកទេសមួយ សុខចិត្ត​ឲ្យ​អ្នកជំនាញ​បន្តការត្រួតពិនិត្យ នៅទីតាំងខ្លះ។

នៅក្នុងកិច្ចព្រមព្រៀងនេះដែរ ភាគីអ៊ីរ៉ង់ សន្យាថានឹងផ្តល់ឲ្យ​នូវ​រូបភាពកាម៉េរ៉ាវីដេអូ ព្រមទាំងទិន្នន័យទាំងអស់ មកឲ្យ​ទីភ្នាក់ងារនុយក្លេអ៊ែរអន្តរជាតិ ប្រសិនបើ ទណ្ឌកម្មសេដ្ឋកិច្ចនឹងត្រូវដកចេញ ក្នុងរវាង​៣ខែទៀត។ បើផ្អែកតាមប្រភព ពី​ទីភ្នាក់ងារថាមពលនុយក្លេអ៊ែរអន្តរជាតិ អ៊ីរ៉ង់បានគំរាមចង់ប្តូរចិត្ត ហើយ​លុបចោលកិច្ចព្រមព្រៀងបច្ចេក​ទេសនេះ ដោយសារតែគ្មានពន្លឺថាអាមេរិកយល់ព្រមដកទណ្ឌកម្ម។

បញ្ហានេះ កំពុងតែ​ធ្វើ​ឲ្យ​ទីភ្នាក់ងារថាមពលនុយក្លេអ៊ែរអន្តរជាតិ ត្រូវស្ថិតនៅក្នុង​កាលៈទេសៈមួយ​ ដ៏លំបាក។ លោក Rafael Grossi អគ្គនាយកទីភ្នាក់ងារនេះ បានលើកឡើងថា បេសកកម្មត្រួតពិនិត្យ​ មិនអាចយក​មកធ្វើជាការ​មធ្យោបាយ​គំរាមសំឡុតបានទេ។ លោក​Rafael Grossi បានអំពាវនាវឲ្យភាគីទាំងអស់ បន្តអត់ធ្មត់ និយាយគ្នារកដំណោះស្រាយ ពុំនោះទេ ការប្រឹងប្រែងដ៏លំបាក ក្នុងការព្យាយាមការពារកិច្ចព្រមព្រៀងនុយក្លេអ៊ែរអ៊ីរ៉ង់ ប្រមាណ៥ឆ្នាំមកនេះ គឺ​វានឹងរលាយ​។

យ៉ាងណាមិញ លោកស្រី Kelsey Davenport អ្នកជំនាញផ្នែកនុយក្លេអ៊ែរ នៃសមាគមគ្រប់គ្រងអាវុធ បាន​លើកឡើងថា អ៊ីរ៉ង់បានសុខចិត្តចុះកិច្ចព្រមព្រៀងបច្ចេកទេស កាលពីថ្ងៃទី​២១កុម្ភៈ គឺវាបង្ហាញពីការអត់ធ្មត់របស់អ៊ីរ៉ង់ទៅហើយ។ ដូច្នេះបើសហរដ្ឋអាមេរិក នៅតែបន្តព្រងើយ មិនព្រមធ្វើសម្បទានជាក់ស្តែងណាមួយទេ នោះសហរដ្ឋអាមេរិក នឹងជាអ្នកបំផ្លាញចោលកិច្ចប្រឹងប្រែងទាំងអស់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI