អាល្លឺម៉ង់-ថាមពល

អាល្លឺម៉ង់បង់ប្រាក់ឲ្យក្រុមហ៊ុនអគ្គិសនីសម្រាប់ការបិទមជ្ឈមណ្ឌលនុយក្លេអ៊ែរទាំងអស់នៅដំណាច់ឆ្នាំ ២០២២

នាយករដ្ឋមន្រ្តីអាល្លឺម៉ង់លោកស្រីមែរកិល
នាយករដ្ឋមន្រ្តីអាល្លឺម៉ង់លោកស្រីមែរកិល AP - John MacDougall

នៅ​ថ្ងៃ​សុក្រ ទី៥ មីនា រដ្ឋាភិបាល​អាល្លឺម៉ង់​បាន​ប្រកាស​ពី​ការ​មាន​កិច្ចព្រមព្រៀង​មួយ​ជាមួយ​ក្រុមហ៊ុន​ថាមពល​ចំនួន ៤ក្រុមហ៊ុន​ដែល​ផលិត​អគ្គិសនី​ដោយ​ប្រើ​នុយក្លេអ៊ែរ។ នៅ​ក្នុង​កិច្ចព្រមព្រៀង​នោះ រដ្ឋាភិបាល​បាន​យល់​ព្រម​បង់ប្រាក់សំណង​ចំនួន ២ ៤០០លានអឺរ៉ូ​ឲ្យ​ក្រុមហ៊ុន​ទាំង៤ សម្រាប់​ការ​បិទ​មជ្ឈមណ្ឌល​នុយក្លេអ៊ែរ​ទាំង​អស់​ពី​ពេល​នេះ​ទៅ​ដំណាច់​ឆ្នាំ ២០២២។ គួរ​រម្លឹក​ថា​កាល​ពី ១០ឆ្នាំ​មុន នាយករដ្ឋមន្រ្តី​អាល្លឺម៉ង់​លោកស្រី​មែរកិល​បាន​ប្រកាស​ពី​ការ​ដក​ប្រទេស​ចេញ​ពី​នុយក្លេអ៊ែរ​ទាំង​ស្រុង​នៅ​ឆ្នាំ ២០២២។ តែ​ការ​ប្រកាស​របស់​លោកស្រី​កាលណោះ​បាន​ធ្វើ​ឲ្យ​ក្រុមហ៊ុន​អគ្គិសនី​មួយ​ចំនួន​ប្រឆាំង​តវ៉ា​មក​ដល់​សព្វ​ថ្ងៃ។

ផ្សាយពាណិជ្ជកម្ម

នៅ​ក្នុង​ចំនួន​ទឹកប្រាក់សំណង​ទាំង ២ ៤០០លានអឺរ៉ូ​ដែល​រដ្ឋាភិបាល​អាល្លឺម៉ង់​យល់ព្រម​បង់​ឲ្យ​ក្រុមហ៊ុន​ថាមពល​ទាំង ៤ ក្រុមហ៊ុន មាន ២ ២៨៥លានអឺរ៉ូ​ជា​ប្រាក់សំណង​អគ្គិសនី​មិន​បាន​ផលិត និង ១៤២ ៥០០ ០០០អឺរ៉ូ​ជា​ប្រាក់សំណង​ដែល​ក្រុមហ៊ុន​បាន​ចំណាយ​លើ​ការ​ជួសជុល​ដើម្បី​បន្ត​ជីវិត​របស់​មជ្ឈមណ្ឌល។ ជា​ថ្នូរ​នឹង​ទទួល​ប្រាក់សំណង​ទាំង ២ ៤០០លានអឺរ៉ូ ក្រុមហ៊ុន​ថាមពល​ទាំង ៤ បាន​សន្យា​ដក​បណ្តឹង​ទាំង​អស់​ដែល​មាន​នៅ​តុលាការ និង​មិន​ធ្វើ​សកម្មភាព ឬ​ដាក់​ពាក្យ​បណ្តឹង​ថ្មី​ប្រឆាំង​នឹង​ចំនួន​ទឹកប្រាក់សំណង​ដែល​បាន​ព្រមព្រៀង។

ក្រុមហ៊ុន​មួយ​បាន​បញ្ចេញ​ប្រតិកម្ម​សាទរ​ចំពោះ​កិច្ចព្រមព្រៀង និង​បញ្ជាក់​ពី​ការ​ដក​ពាក្យ​បណ្តឹង​ចេញ​ពី​តុលាការ។ ចំណែក​ក្រុមហ៊ុន​មួយ​ទៀត​ក៏​បាន​សាទរ​ដូច​គ្នា​ដោយ​ចាត់​ទុក​កិច្ចព្រមព្រៀង​ថា​ជា​សញ្ញា​ល្អ​មួយ​ដែល​ពង្រឹង​លើ​សេចក្តីទុកចិត្ត។ គួរ​រម្លឹក​ថា​កាល​ពី ១០ឆ្នាំ​មុន ពោល​ក្រោយ​ព្រឹត្តិការណ៍​គ្រោះ​មហន្តរាយ​នុយក្លេអ៊ែរ​នៅ​ហ៊្វូគូស្ហ៊ីម៉ា ប្រទេស​ជប៉ុន​ក្នុង​ខែ​មីនា ឆ្នាំ ២០១១ នាយករដ្ឋមន្រ្តី​អាល្លឺម៉ង់​លោកស្រី​មែរកិល​បាន​ប្រកាស​យ៉ាង​ភ្ញាក់ផ្អើល​ពី​ការ​ដក​ប្រទេស​ចេញ​ពី​នុយក្លេអ៊ែរ​នៅ​ដំណាច់​ឆ្នាំ ២០២២។

ការ​ប្រកាស​របស់​លោកស្រី​ម៊ែរកិល​កាលណោះ​ត្រូវ​បាន​ក្រុមហ៊ុន​ផលិតអគ្គិសនី​ប្រឆាំង​តវ៉ា​ដោយ​ប្តឹង​រដ្ឋាភិបាល​ទៅ​តុលាការ។ ក្នុង​ឆ្នាំ ២០១៦ តុលាការកំពូល​បាន​សម្រេច​ឲ្យ​ក្រុមហ៊ុន​ផលិតអគ្គិសនី​ឈ្នះ​ដោយ​តម្រូវ​ឲ្យ​រដ្ឋាភិបាល​បង់​ប្រាក់សំណង។ ដូច្នេះ​គេ​អាច​និយាយ​បាន​ថា កិច្ចព្រមព្រៀង​រវាង​រដ្ឋាភិបាល​អាល្លឺម៉ង់ និង​ក្រុមហ៊ុន​ថាមពល​ទាំង ៤ ពេល​នេះ​អាច​ជា​ការ​បិទបញ្ចប់​ទាំង​ស្រុង​នូវ​ភាព​ប្រទូស្រ្តាយ​ផ្លូវ​តុលាការ​រវាង​ភាគី​ទាំង​ពីរ ពិសេស​ទាក់ទង​នឹង​ចំនួន​ទឹកប្រាក់សំណង។

ដោយឡែក និង​នៅ​ក្នុង​ក្របខណ្ឌ​នៃ​កំណែទម្រង់​លើ​វិស័យ​ថាមពល​ដដែល រដ្ឋាភិបាល​អាល្លឺម៉ង់​ក៏​បាន​សម្រេច​បញ្ឈប់​ការ​ប្រើ​ធ្យូងថ្ម​ពី​ពេល​នេះ​ទៅ​ឆ្នាំ ២០៣៨។ នៅ​ក្នុង​រឿង​នេះ រដ្ឋាភិបាល​ក៏​បាន​ចុះ​ហត្ថលេខា​លើ​កិច្ចព្រមព្រៀង​ដូច​គ្នា​ដោយ​យល់ព្រម​បង់ប្រាក់សំណង​ដល់​ទៅ ៤ ៣៥០លានអឺរ៉ូ​ឲ្យ​ក្រុមហ៊ុន​ផលិត​ធ្យូងថ្ម​សម្រាប់​ការ​បិទ​រោងចក្រ​ធ្យូងថ្ម​ទាំង​អស់​នៅ​ឆ្នាំ ២០៣៨៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI