តួកគី

តួកគី៖ចាប់ខ្លួនអតីតមន្រ្តីយោធាជាន់ខ្ពស់ចូលនិវត្តន៍ចំនួន ១០រូបពីបទរិះគន់ ទិតៀនប្រធានាធិបតី

ប្រធានាធិបតី​តួកគី​លោក​អ៊ែរដូហ្កាន
ប្រធានាធិបតី​តួកគី​លោក​អ៊ែរដូហ្កាន Adem Altan AFP/Archivos

នៅ​ក្នុង​ប្រទេស​តួកគី អតីត​មន្រ្តីយោធា​ជាន់ខ្ពស់​ចូល​និវត្តន៍​ចំនួន ១០រូប​ត្រូវ​បាន​ចាប់​ខ្លួន​នា​ថ្ងៃ​ចន្ទ ទី៥ មេសា។ ការ​ចាប់​ខ្លួន​នេះ​បាន​ធ្វើ​ឡើង មួយ​ថ្ងៃ​ក្រោយ​ពី​មាន​ការ​ផ្សព្វផ្សាយ​នូវ​លិខិត​មួយ​ចុះ​ហត្ថលេខា​ដោយ​អតីត​មន្រ្តីយោធា​ប្រមាណ​ជា ១០០នាក់។ នៅ​ក្នុង​លិខិត​នោះ ពួក​គេ​បាន​រិះគន់ ទិតៀន​លើ​គម្រោង​សាងសង់​ព្រែកជីក​អ៊ីស្តង់ប៊ុល​របស់​ប្រធានាធិបតី​លោក​អ៊ែរដូហ្កាន។ តាម​ការិយាល័យ​របស់​អគ្គរដ្ឋអាជ្ញា ការ​ស៊ើបអង្កេត​មួយ​បាន​បើក​ឡើង​ដើម្បី​ប្រឆាំង​នឹង​ក្រុម​មន្រ្តីយោធា​ចូល​និវត្តន៍​ក្នុង​បទឧក្រិដ្ឋកម្ម​ប្រឆាំង​សន្តិសុខជាតិ និង​រដ្ឋធម្មនុញ្ញ។

ផ្សាយពាណិជ្ជកម្ម

នៅ​ក្នុង​លិខិតចំហ​មួយ​ចុះ​ហត្ថលេខា​ដោយ​អតីត​ក្រុម​មន្រ្តីយោធា​ចូល​និវត្តន៍​ជាង ១០០នាក់ ពួក​គេ​បាន​ទាញ​សញ្ញា​អាសន្ន​ពី​ផលវិបាក​ដែល​អាច​បង្ក​ចេញ​ពី​គម្រោង​សាងសង់​ព្រែកជីក​អ៊ីស្តង់ប៊ុល​របស់​ប្រធានាធិបតី​លោក​អ៊ែរដូហ្កាន។ អតីត​ក្រុម​មន្រ្តីយោធា​ចូល​និវត្តន៍​ទាំង​ជាង ១០០នាក់​បាន​យល់​ឃើញ​ថា គម្រោង​សាងសង់​ព្រែកជីក​អ៊ីស្តង់ប៊ុល​របស់​លោក​អ៊ែរដូហ្កាន​ជា​ការ​គំរាមកំហែង​លើ​សន្ធិសញ្ញា​អន្តរជាតិ​ម៉ុងទ្រឺ​ចុះ​ហត្ថលេខា​ឆ្នាំ ១៩៣៦។ លិខិត​ចំហ​ដដែល​បាន​បារម្ភ​ពី​ផលប៉ះពាល់​លើ​សន្ធិសញ្ញា​អន្តរជាតិ​ម៉ុងទ្រឺ​ដែល​ធានា​ពី​សេរីភាព​ធ្វើ​ចរាចរណ៍​ផ្លូវទឹក​ដោយ​សេរី​តាម​ច្រកសមុទ្រ​បូស្វ័រ និង​បាន​ការពារ​ច្រើន​លើ​ផលប្រយោជន៍​តួកគី។

គួរ​រម្លឹក​ថា​កាល​ពី​ខែ​មីនា​កន្លង​ទៅ ប្រទេស​តួកគី​បាន​អនុម័ត​លើ​ផែនការ​មួយ​ដើម្បី​សាងសង់​ព្រៃកជីក​អ៊ីស្តង់ប៊ុល​ដោយ​យក​គំរូ​តាម​ព្រែកជីក​ប៉ាណាម៉ា ឬ​ព្រែកជីក​ស៊ុយអេ។ ព្រែកជីក​អ៊ីស្តង់ប៊ុល​ជា​មហាគម្រោង​ប្រកប​ដោយ​មហិច្ឆតា​ធំធេង​របស់​ប្រធានាធិបតី​លោក​អ៊ែរដូហ្កាន​នៅ​ក្នុង​រយៈពេល​នៃ​ការ​កាន់​អំណាច ១៨ឆ្នាំ​របស់​លោក។ ជាមួយ​នឹង​មហាគម្រោង​មួយ​នេះ លោក​អ៊ែរដូហ្កាង​ចង់​ផ្លាស់ប្តូរ​ហេដ្ឋារចនាសម្ព័ន្ធ​របស់​តួកគី​ដោយ​ធ្វើ​ការ​សាងសង់​ថ្មី​នូវ​ស្ពាន អាកាសយានដ្ឋាន និង​ផ្លូវ​ក្រោម​ដី។ រដ្ឋាភិបាល​បើក​លើក​យក​ហេតុផល​ទៅ​ពន្យល់​ថា ព្រៃកជីក​អ៊ីស្តង់ប៊ុល​នឹង​អនុញ្ញាត​ឲ្យ​ក្រុង​អ៊ីស្តង់ប៊ុល​បំពាក់​នូវ​ប៉ូល​ថ្មី​នៃ​ការ​ទាក់ទាញ​បន្ថែម​ដើម្បី​ជួយ​បន្ធូរ​ភាព​មមាញឹក​ខ្លាំង​នៅ​ច្រកសមុទ្រ​បូស្វ័រ។

តែ​ក្រុម​ប្រឆាំង​មិន​បាន​យល់​ឃើញ​ដូច​រដ្ឋាភិបាល​ដោយ​ពួក​គេ​បាន​មើល​ឃើញ​ពី​ផល​ប៉ះពាល់​លើ​បរិស្ថាន និង​អាច​ជា​ការ​គំរាមកំហែង​លើ​សន្ធិសញ្ញា​អន្តរជាតិ​ម៉ុងទ្រឺ​ចុះ​ហត្ថលេខា​ឆ្នាំ ១៩៣៦។ តាម​ក្រុម​ប្រឆាំង សន្ធិសញ្ញា​អន្តរជាតិ​ម៉ុងទ្រឺ​បាន​ធានា​ពី​ការ​ធ្វើ​ចរាចរណ៍​ដោយ​សេរី​របស់​នាវា​ស៊ីវិល​នៅ​ក្នុង​ច្រកសមុទ្រ​បូស្វ័រ និង​ដារដានែល​ទាំង​នៅ​ក្នុង​សម័យ​សន្តិភាព​ក៏​ដូច​ជា​សម័យសង្រ្គាម។ យ៉ាង​ណា​ក៏​ដោយ ប្រហែល​ជា​គ្មាន​នរណា​អាច​រារាំង​មហា​គម្រោង​របស់​លោក​អ៊ែរដូហ្កាន​បាន​ឡើយ។ ប្រធាន​ទំនាក់ទំនង​របស់​លោក​អ៊ែរដូហ្កាន​បាន​ថ្លែង​តាម​បណ្តាញសង្គម Twitter នា​ថ្ងៃ​អាទិត្យ ទី៤ មេសា​ថា អ្នក​ដែល​បាន​ចុះ​ហត្ថលេខា​លើ​លិខិត​ចំហ និង​អ្នក​ដែល​បាន​ជួយ​លើក​ទឹកចិត្ត​ត្រូវ​តែ​ទទួល​ការ​កាត់ទោស​នៅ​តុលាការ​ដូច​គ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI